ప్రస్తుతం ఎలక్ట్రిక్ వాహనాలకు డిమాండ్ పెరుగుతోన్న విషయం తెలిసిందే. అన్ని దిగ్గజ సంస్థలు ఈవీ వాహనాలను తయారు చేస్తున్నాయి. అయితే తాజాగా మార్కెట్లోకి సోలార్ కారు సందడి చేయడానికి సిద్ధమవుతోంది. ఇప్పటికే అధికారికంగా లాంచ్ అయిన ఈ కారు ప్రీబుకింగ్స్ను మొదలు పెట్టింది. ఈ సోలార్ కారుకు సంబంధించి పూర్తి వివరాలు మీకోసం..
Vayve Eva Sloar Car
మొదట్లో పెట్రోల్, డీజిల్ కార్లు.. ఆ తర్వాత సీఎన్జీ. ప్రస్తుతం ఎలక్ట్రిక్ కార్లు మార్కెట్లో సందడి చేస్తున్నాయి. అయితే మరికొన్ని రోజుల్లో రోడ్లపై సోలార్ కార్లు అందుబాటులోకి వచ్చేస్తున్నాయి. కారును కనీసం ఛార్జింగ్ చేయాల్సిన అవసరం కూడా లేకుండా కాస్త ఎండ తగిలితే చాలు రయ్యిమని దూసుకుపోనున్నాయి. భారతదేశంలో తొలి సోలార్ కారు అందుబాటులోకి వచ్చేసింది.
జనవరి 17 నుంచి 22 వరకు నిర్వహించిన ఆటో ఎక్స్పో 2025లో ఈ సోలార్ కారును ప్రదర్శించారు. వేవ్ ఈవా (Vayve Eva) పేరుతో తీసుకొచ్చిన ఈ కొత్త కారు ఇంకా రోడ్లపైకి రాకముందే అందరి దృష్టిని ఆకర్షించింది. ఈ కారు ప్రారంభ వేరియంట్ ధర కేవలం రూ. 3 లక్షలు మాత్రమే కావడం విశేషం. ధర తక్కువ అని ఫీచర్ల విషయంలో అస్సలు రాజీ పడాల్సి అవసరం లేదు.
అన్ని ఇతర కార్లలోలాగే ఇందులో కూడా మంచి ఫీచర్లను అందించారు. కంపెనీ అధికారిక వెబ్సైట్లో ప్రీ బుకింగ్స్ను స్వీకరిస్తున్నారు. ఇక ఈ కారును నోవా, స్టెల్లా, వేగా అనే మూడు వేరియంట్స్లో తీసుకొస్తున్నారు. కంపెనీ అధికారిక వెబ్సైట్లో ఉన్న వివరాల ప్రకారం ఈ కారులో ఎలాంటి ఫీచర్లు ఉండనున్నాయో ఇప్పుడు తెలుసుకుందాం.
Vayve Eva Nova:
ఈ కారు బేస్ వేరియంట్గా చెప్పొచ్చు. దీని ఎక్స్ షోరూమ్ ధర కేవలం రూ. 3.25 లక్షలుగా ప్రకటించారు. ఒక్కసారి ఫుల్ చార్జీ చేస్తే 125 కి.మీలు నాన్స్టాప్గా దూసుకెళ్లొచ్చు. ఇందులో ఎకో డ్రైవింగ్ మోడ్ను ఇచ్చారు. ఈ సోలార్ కారు గంటకు గరిష్టంగా 60 కిలోమీటర్ల వేగంతో వెళ్తుంది. ఈ కారులో 9kWh కెపాసిటీ బ్యాటరీని అందించారు. హోమ్ ఛార్జర్ సహాయంతో కూడా బ్యాటరీ ఛార్జ్ చేసుకోవచ్చు.
Vayve Eva Stella:
ఈ సిరీస్లో వస్తున్న రెండో వేరియంట్ స్టెల్లా కూడా మంచి ఫీచర్లను అందిస్తున్నారు. ఈ కారు గరిష్టంగా గంటకు 60 కి.మీ వేగంతో వెళ్తుంది. ఈ కారును ఒక్కసారి ఛార్జ్ చేస్తే 175 కి.మీల మైలేజ్ అందిస్తుంది. ఇందులో ఎయిర్ కూల్డ్ టెక్నాలజీ ఆధారిత 12.6kWh సామర్థ్యం గల బ్యాటరీని అందించారు. ధర విషయానికొస్తే ఈ కారు ఎక్స్ షోరూమ్ ధర రూ. 3.25 లక్షలుగా ఉంది.
Vayve Eva Vega:
ఇక టాప్ వేరియంట్ వేగా విషయానికొస్తే ఈ కారు గరిష్టంగా గంటకు 70 కి.మీల వేగంతో దూసుకెళ్తుంది. అలాగే బ్యాటరీని ఒక్కసారి ఛార్జ్ చేస్తే గరిష్టంగా 250 కి.మీల మైలేజ్ను అందిస్తుంది. ఇక ఇందులో లిక్విడ్ కూల్డ్ టెక్నాలజీతో కూడిన 18kWh సామర్థ్యం గల బ్యాటరీని అందించారు.
