ఎప్పుడెప్పుడా అని ఎదురుచూస్తున్న సినీ ప్రియులకు దీపావళి స్పెషల్ సర్ ప్రైజ్ ఇచ్చాడు డైరెక్టర్ ప్రశాంత్ వర్మ. ఈ ఏడాది సంక్రాంతి కానుకగా వచ్చిన హనుమాన్ సినిమాకు కొనసాగింపుగా జై హనుమాన్ మూవీ రాబోతున్న సంగతి తెలిసిందే. ఈ చిత్రానికి సంబంధించి ఫస్ట్ లుక్ పోస్టర్ రిలీజ్ చేశారు.
డైరెక్టర్ ప్రశాంత్ వర్మ తెరకెక్కించిన హనుమాన్ సినిమా బాక్సాఫీస్ వద్ద భారీ విజయాన్ని అందుకున్న సంగతి తెలిసిందే. సూపర్ హీరో కథకు ఇతిహాసాన్ని ముడిపెట్టి తెరకెక్కించిన ఈ చిత్రం మంచి వసూళ్లు రాబట్టింది. చిన్నా, పెద్ద ఈ చిత్రానికి అడిక్ట్ అయిపోయారు. అయితే ఈ చిత్రానికి కొనసాగింపుగా శ్రీరాముడికి హనుమంతుడు ఇచ్చిన మాటేమిటీ ? అనే ప్రశ్నకు సమాధానంగా జై హనుమాన్ మూవీని తీసుకురానున్నట్లు చిత్రయూనిట్ ప్రకటించడంతో సెకండ్ పార్ట్ పై మరింత ఆసక్తి నెలకొంది. కొన్ని రోజులుగా జై హనుమాన్ సినిమాకు సంబంధించిన ప్రతి చిన్న అప్డేట్ నెట్టింట వైరలయ్యింది. ఇక నిన్న ఈ సినిమాకు సంబంధించి క్రేజీ అప్డేట్ ఇచ్చారు మేకర్స్. జై హనుమాన్ సినిమా ఫస్ట్ లుక్ పోస్టర్ ను అక్టోబర్ 30న విడుదల చేయనున్నట్లు చిత్రయూనిట్ ప్రకటించిన సంగతి తెలిసిందే. తాజాగా ఈ మూవీ ఫస్ట్ లుక్ పోస్టర్ రిలీజ్ చేస్తూ ప్రేక్షకులకు సర్ ప్రైజ్ ఇచ్చారు డైరెక్టర్ ప్రశాంత్ వర్మ.
జై హనుమాన్ సినిమాలో ఆంజనేయుడి పాత్రలో కన్నడ స్టార్ హీరో రిషబ్ శెట్టి కనిపించనున్నారు. ఈ విషయాన్ని తెలియజేస్తూ డైరెక్టర్ ప్రశాంత్ వర్మ విడుదల చేసిన రిషబ్ శెట్టి ఫస్ట్ లుక్ పోస్టర్ ఆకట్టుకుంటుంది. హనుమాన్ సినిమాలో తేజ సజ్జా హీరోగా నటించాడు. సంక్రాంతికి విడుదలైన ఈ చిత్రం భారీ విజయాన్ని అందుకుంది. ఇక ఈ చిత్రానికి కొనసాగింపుగా రానున్న జై హనుమాన్ సినిమాలో ఆంజనేయ స్వామి పాత్రను స్టార్ హీరో పోషిస్తారని వర్మ చెప్పిన క్షణం నుంచి అడియన్స్ మదిలో ఎన్నో అంచనాలు పెరిగాయి. అలాగే టాలీవుడ్ ఇండస్ట్రీలోని పలువురు స్టార్స్ పేర్లు కూడా తెరపైకి వచ్చాయి. తాజాగా ఇప్పుడు హనుమాన్ పాత్రపై క్లారిటీ ఇచ్చింది.
శ్రీరాముడికి హనుమంతుడు ఇచ్చిన మాటేంటన్నది ఈ మూవీ సీక్వెల్ లో కీలకాంశం. ఇక ఇందులోనూ తేజ సజ్జా హనుమంతు పాత్రలోనే కనిపించనున్నట్లు తెలుస్తోంది. ఈ రెండు చిత్రాలు ప్రశాంత్ వర్మ సినిమాటిక్ యూనివర్స్ లో భాగమే. ఈ చిత్రంతోపాటు అధీర, మహాకాళి చిత్రాలను కూడా తెరకెక్కిస్తున్నారు.
