HDFC Bank Rent Payments: భారత్‌లో ప్రైవేట్ రంగానికి చెందిన అతిపెద్ద బ్యాంకు.. హెచ్‌డీఎఫ్‌సీ బ్యాంక్ తన క్రెడిట్ కార్డు హోల్డర్లకు కీలక ప్రకటన జారీ చేసింది. కొత్త నియమ, నిబంధనల్ని అమల్లోకి తెస్తున్నట్లు ప్రకటించింది. 2024, ఆగస్టు 1 వ తేదీ నుంచి ఈ కొత్త రూల్స్ అమల్లోకి వస్తాయని స్పష్టం చేసింది. ఇప్పుడు ఈ బ్యాంక్ క్రెడిట్ కార్డులకు సంబంధించి ఎలాంటి మార్పులు చేసిందనేది చూద్దాం. ముఖ్యంగా థర్ట్ పార్టీ పేమెంట్ యాప్స్‌ను ఉపయోగించి చేసే రెంటల్ ట్రాన్సాక్షన్స్‌పై ఛార్జీల్ని ప్రకటించింది. దీంతో ఇక ఇతర యాప్స్ సాయంతో రెంట్ పేమెంట్స్ చేస్తే.. ఛార్జీలు చెల్లించాల్సి ఉంటుంది.
పేటీఎం, క్రెడ్, మొబిక్విక్, చెక్ ఇలా ఇతర థర్డ్ పార్టీ పేమెంట్ అప్లికేషన్స్ ఉపయోగించి.. రెంటల్ ట్రాన్సాక్షన్స్ చేసినట్లయితే ట్రాన్సాక్షన్ నగదు మొత్తంలో ఇకపై ఒక శాతం రుసుము చెల్లించాల్సి వస్తుంది.
ఇంకా యుటిలిటీ ట్రాన్సాక్షన్లపైనా ఛార్జీలు కొత్తవి అమల్లోకి వచ్చాయి. రూ. 50 వేల లోపు చేసే లావాదేవీలపై ఎలాంటి అదనపు రుసుములు పడవు. రూ. 50 వేల పైన ఉంటేనే.. ఒక శాతం ట్రాన్సాక్షన్ ఫీజు పడుతుంది. ఇది ఒక ట్రాన్సాక్షన్‌పై గరిష్టంగా రూ. 3 వేల వరకు ఉంటుంది. అయితే ఇన్సూరెన్స్ ట్రాన్సాక్షన్స్‌కు మాత్రం ఈ ఛార్జీల నుంచి మినహాయింపు ఉంటుందని బ్యాంక్ ప్రకటించింది.
ఫ్యూయెల్ ట్రాన్సాక్షన్లపైనా ఛార్జీలు అమల్లోకి రాబోతున్నాయి. ట్రాన్సాక్షన్ విలువ రూ. 15 వేలు దాటినట్లయితే అక్కడ మొత్తం ట్రాన్సాక్షన్ నగదుపై ఒక శాతం చెల్లించాల్సి ఉంటుంది. ఇక్కడ కూడా ట్రాన్సాక్షన్‌పై గరిష్టంగా రూ. 3 వేల వరకు చెల్లించాలి.
థర్డ్ పార్టీ యాప్స్ ఉపయోగించి చేసే ఎడ్యుకేషనల్ ట్రాన్సాక్షన్లపైనా ఒక శాతం ఫీజు వసూలు చేస్తుందని ప్రకటించింది దిగ్గజ బ్యాంకు. దీంట్లో ఇంటర్నేషనల్ ఎడ్యుకేషనల్ పేమెంట్లకు మినహాయింపు కల్పించింది. నేరుగా కాలేజీ లేదా స్కూల్ వెబ్‌సైట్స్, లేదా సంబంధిత POS మెషీన్ల ద్వారా చేసే ట్రాన్సాక్షన్లకూ ఇందులో మినహాయింపు ఉంది. క్రెడిట్, పేటీఎం వంటి వాటితో చేసే ట్రాన్సాక్షన్లపై రుసుములు వర్తిస్తాయి.
ఇంటర్నేషనల్ లేదా క్రాస్ కరెన్సీ ట్రాన్సాక్షన్లపై 3.5 శాతం మార్క్‌అప్ ఫీజు చెల్లించాలి. అవుట్‌స్టాండింగ్ అమౌంట్ ప్రాతిపదికన లేట్ పేమెంట్ ఫీజు స్ట్రక్చర్ మారింది. ఇది రూ. 100 నుంచి రూ. 300 వరకు ఉంటుంది. వీటితో పాటు ఇంకా ఇతర ఛార్జీలు కూడా ఉన్నాయి. దీని కోసం బ్యాంక్ అధికారిక వెబ్‌సైట్ సందర్శించండి.
