పవన్ కల్యాణ్ ఫోకస్‌ మొత్తం పాలన మీదే ఉన్నా, సినిమా ఇండస్ట్రీలో మాత్రం ఆయన మాట లేకుండా రోజు అసలు గడవదు. పవర్‌ స్టామినా అలా ఉంటుంది మరి.. ఇప్పుడు లేటెస్ట్ గా ఆయన ఓజీ తో ట్రెండ్‌ అవుతున్నారు.
ఇంతకీ ఓజీ అప్‌డేట్‌ ఏంటి అంటారా.? మాట్లాడుకుందాం వచ్చేయండి.! సుజీత్‌ డైరక్ట్ చేస్తున్న సినిమా ఓజీ. ఆ సినిమాను చూద్దురుగానీ అని పవర్‌స్టార్‌ జనాలను ఊరించారంటేనే, ఆ సబ్జెక్టు మీద ఆయన ఎంత మమకారం పెంచుకున్నారో అర్థం అవుతుంది.
ఓజీ సినిమా సెప్టెంబర్‌లో విడుదల కావాల్సింది. పవన్ కల్యాణ్ వికీపీడియాలో ఈ ఏడాది రిలీజ్‌గా ఓజీకి ప్లేస్‌ దక్కి ఉండేది. కానీ ఇప్పుడు పరిస్థితులు మారాయి.
ఓజీ రిలీజ్ కావడం లేదు. సెప్టెంబర్‌లో ఓజీకి సంబంధించిన ప్రమోషనల్‌ కంటెంట్‌ మాత్రం రిలీజ్ కానుంది. సెప్టెంబర్‌లో పవర్‌స్టార్‌ ఫ్యాన్స్ ని ఖుషీ చేయడానికి ఇప్పటి నుంచే రెడీ అవుతున్నారు సుజీత్‌.
మీ వెనకే మేమూ ఉన్నాం అంటూ హరిహరవీరమల్లు అప్‌డేట్స్ తో సిద్ధమవుతున్నారు మేకర్స్. ఓటీటీ డీల్‌ ప్రకారం ఈ ఏడాదే విడుదల కావాలి హరిహరవీరమల్లు.
కానీ పరిస్థితుల దృష్ట్యా ఒన్లీ అప్‌డేట్స్ తోనే సరిపెడతారనే టాక్‌ వినిపిస్తోంది. ఈ సినిమాలు రెండూ రిలీజ్ అయ్యాకే ఉస్తాద్‌ భగత్‌సింగ్‌ వైపు చూస్తారు పవర్‌స్టార్‌. ఆ తర్వాత సురేందర్‌రెడ్డి సినిమా సెట్స్ మీదకు వెళ్తుంది.
