తెలుగు రాష్ట్రాల్లోని ఈ ప్రాంతాల్లో వర్షాలు

బంగాళాఖాతంలో ఏర్పడిన తీవ్ర వాయుగుండం శనివారం మధ్యాహ్నం నాటికి తీరం దాటే అవకాశం ఉంది. దీని ప్రభావంతో తెలుగు రాష్ట్రాల్లో అక్కడక్కడ వర్షాలు కురిసే అవకాశం ఉందని వాతావరణ శాఖ తెలిపింది.. ఆంధ్రప్రదేశ్, తెలంగాణలో పొడి వాతావరణంతోపాటు చలి తీవ్రత ఉంటుందని తెలిపింది.. అయితే.. కొన్ని ప్రాంతాల్లో తేలికపాటి నుంచి మోస్తరు వర్షాలు కూడా కురుస్తాయని వాతావరణ శాఖ అలర్ట్ జారీ చేసింది. ఈ మేరకు శుక్రవారం కీలక ప్రకటన విడుదల చేసింది. అమరావతి వాతావరణ కేంద్రం ప్రకారం.. నిన్నటి నైరుతి బంగాళాఖాతంలో నున్న తీవ్ర వాయుగుండం దాదాపు వాయువ్య దిశగా గడచిన 6 గంటల్లో గంటకు 10కిలోమీటర్లు వేగంతో ప్రయాణిస్తూ ఈరోజు అనగా జనవరి 9వ తేదీ 2026 ఉదయం 08.30గంటలకు అదే ప్రాంతంలో అనగా 7.4° ఉత్తర అక్షాంశము & 83.2° తూర్పు రేఖాంశం, పొట్టువిల్ (శ్రీలంక)కి తూర్పు-ఈశాన్యంగా 160 కి.మీ., బట్టికలోవాకు తూర్పు-ఆగ్నేయంగా 170 కి.మీ. (శ్రీలంక), ట్రింకోమలీకి తూర్పు-ఆగ్నేయంగా 250 కి.మీ (శ్రీలంక), హంబన్‌తోట (శ్రీలంక)కు తూర్పు-ఈశాన్యముగా 270 కి.మీ, పుద్దుచేరి కి ఆగ్నేయంగా 540 కి.మీ. చెన్నై (తమిళనాడు)కి దక్షిణ-ఆగ్నేయంగా 710 కి.మీ దూరములో కేంద్రీకృతమై ఉన్నది. ఇది 2026 జనవరి 10వ తేదీ వాయువ్య దిశగా కదులుతూ ఉత్తర శ్రీలంక తీరాన్ని ట్రింకోమలీ, జాఫ్నాల మధ్య మిట్ట మధ్యాహ్నం సమయంలో తీరము దాటే అవకాశం ఉంది.

ఆంధ్రప్రదేశ్ లోని ఈ ప్రాంతాల్లో వర్షాలు

ఆంధ్ర ప్రదేశ్, యానములో దిగువ ట్రోపో ఆవరణములో ఈశాన్య, తూర్పు దిశగా గాలులు వీస్తున్నాయి. వీటి ఫలితంగా ఆంధ్రప్రదేశ్ రాష్ట్రంలో రాగల మూడు రోజుల వరకు వాతావరణ సూచనలు ఈ కింది విధంగా ఉన్నాయి..

ఉత్తర కోస్తా ఆంధ్రప్రదేశ్ & యానాం:- శనివారం, ఆదివారం, సోమవారం పొడి వాతావరణం ఏర్పడే అవకాశము ఉంది. పొగమంచు ఒకటి లేదా రెండు చోట్ల కురిసే అవకాశము ఉంది.

దక్షిణ కోస్తా ఆంధ్ర ప్రదేశ్:-

శనివారం పొడి వాతావరణం ఏర్పడే అవకాశము ఉంది.

ఆదివారం, సోమవారం తేలికపాటి నుండి మోస్తరు వర్షాలు ఒకటి లేదా రెండు చోట్ల కురిసే అవకాశముంది.

రాయలసీమ:-

శనివారం తేలికపాటి వర్షాలు ఒకటి లేదా రెండు చోట్ల కురిసే అవకాశముంది.

ఆదివారం తేలికపాటి నుండి మోస్తరు వర్షాలు ఒకటి లేదా రెండు చోట్ల కురిసే అవకాశముంది.

సోమవారం తేలికపాటి నుండి మోస్తరు వర్షాలు కొన్ని చోట్ల కురిసే అవకాశముంది.

గమనిక :- రాగల 5 రోజుల్లో కోస్తా ఆంధ్రప్రదేశ్, యానాం, రాయలసీమలో కనిష్ట ఉష్ణోగ్రతలు నమోదులో గణనీయమైన మార్పు ఉండదు.

తెలంగాణ రాష్ట్రంలో రాగల 3 రోజుల వరకు వాతావరణ విశ్లేషణ, వాతావరణ హెచ్చరికలు:

హైదరాబాద్ వాతావరణ కేంద్రం ప్రకారం.. తెలంగాణ రాష్ట్రంలో క్రింది స్థాయి గాలులు ప్రధానముగా తూర్పు/ఈశాన్య దిశల నుండి వీచుచున్నవి. వీటి ప్రభావంతో రాగల 3 రోజులకు వాతావరణ సూచనలు ఈ కింది విధంగా ఉన్నాయి.

శనివారం, ఆదివారం, సోమవారం తెలంగాణ రాష్ట్రంలో పొడి వాతావరణం ఏర్పడే అవకాశం ఉంది. రాబోయే రెండు రోజుల్లో రాష్ట్రంలోని కొన్ని ప్రాంతాల్లో కనిష్ట ఉష్ణోగ్రతలు సాధారణం కంటే 2°C నుండి 4°C తక్కువగా నమోదయ్యే అవకాశం ఉంది.