మహిళా పొదుపు సంఘాల చేత సోలార్​విద్యుత్ ఉత్పత్తి

మహిళా పొదుపు సంఘాల చేత సోలార్​విద్యుత్ ఉత్పత్తి చేయించే దిశగా వడివడిగా అడుగులు పడుతున్నాయి. ప్రపంచ మహిళా దినోత్సవం మార్చి 8 నాటికి సోలార్​ విద్యుత్ ​ఉత్పత్తి లక్ష్యంగా తెలంగాణ సంప్రదాయేతర ఇంధన వనరుల అభివృద్ధి సంస్థ టీజీ రెడ్కో అధికారులు పనిచేస్తున్నారు.


ఒకటి రెండు రోజుల్లో మహిళా సంఘాలకు సోలార్​ ప్లాంటు ఏర్పాటు చేస్తూ వర్క్​ ఆర్డర్​లను ఇవ్వనున్నారు. మహిళా సంఘాల చేత ప్రతి జిల్లాకు రెండు మెగా వాట్ల సోలార్ విద్యుత్ ప్లాంట్లు పెట్టించాలని భావిస్తున్న ప్రభుత్వం నేడో రేపో మహిళలకు వర్క్ ఆర్డర్లు కూడా ఇప్పించనుంది. ఒక్కో మెగావాట్​కు రూ.3 కోట్ల చొప్పున అంచనా వ్యయం చేశారు. ఎస్​హెచ్​జీలకు పెట్టుబడి వ్యయం ఇవ్వడానికి బ్యాంకులు నారా రకాలుగా తిరకాసులు పెడుతుండటంతో స్త్రీనిధి రుణం ఇవ్వడానికి ముందుకు వచ్చింది. ఒక్కో మెగావాట్​కు రూ.3కోట్ల చొప్పున 32 జిల్లాల్లో 64 మెగావాట్లకు రూ.192 కోట్ల వ్యయం కానుంది. ఇందులో 10 శాతం ఎస్​హెచ్​జీ భరించాల్సి ఉంటుంది.

మిగిలిన మొత్తాన్ని స్త్రీనిధి రుణంగా చెల్లిస్తుంది. స్వయం సహాయక మహిళా పొదుపు సంఘాలను ఇప్పటికే ప్రోత్సహిస్తున్న రాష్ట్ర ప్రభుత్వం సోలార్​ ప్లాంట్ల ద్వారా మరింతగా బాసటగా నిలిచేలా చూస్తోంది. పైలెట్ ప్రాజెక్టుగా ప్రతి జిల్లాలో రెండు మెగా వాట్ల ఉత్పత్తికి ప్రణాళికలను సిద్ధం చేశారు. మహిళా సంఘాల ద్వారా సోలార్ విద్యుత్​ఉత్పత్తికి ఆలస్యం లేకుండా అటు పంచాయతీరాజ్​గ్రామీణాభివృద్ధి శాఖ ముందుకు సాగుతోంది. ఇప్పటికే గ్రామాల్లో విలేజ్​ఆర్గనైజేషన్ల ను గుర్తించిన సెర్ప్, డిస్ట్రిక్​ రూరల్​ డెవలప్మెంట్​ ఏజెన్సీ (డీఆర్ డీఏ ) లు, బ్యాంకర్లతో ఒప్పందాలు, విధివిధానాలు పూర్తి చేయించేలా చూస్తోంది. ఈ రకంగా వారికి వచ్చే రుణాలతో మార్చి 8 అంతర్జాతీయ మహిళా దినోత్సవం నాటికి మహిళ సంఘాల ద్వారా సోలార్​పవర్ ​అందించే లక్ష్యంగా ప్రభుత్వం చర్యలు తీసుకోనుంది. బ్యాంకర్ల ద్వారా లోన్లు ఇప్పించి పలు దఫాల్లో కనీసం వేయి మెగా వాట్ల సోలార్ విద్యుత్ ఉత్పత్తి చేసేలా ముందుకు సాగనుంది.