ఆచార్య చాణక్యుడు మానవుడు తన జీవితంలో ఎదుర్కునే చాలా సమస్యలను, వాటి పరిష్కారాలను ఎంతో చక్కగా వివరించారు. ఆర్థికశాస్త్రం, నీతి శాస్త్రం పితామహుడిగా ప్రసిద్ధి కెక్కిన చాణక్యుడు..
మానవులు జీవితంలో ఎదగాలంటే ఎలాంటి కృషి చేయాలో కూడా తెలియజేశారు. మానవుడు సోమరిపోతులా ఉంటే జీవితంలో ఎలాంటి ఉన్నతస్థాయికి చేరుకోలేడని స్పష్టం చేశాడు. ఉదయం లేచిన తర్వాత మనం చేసే పనులు విజయాలకు కారణమవుతాయని చెప్పుకొచ్చారు.
ఉదయం లేచిన తర్వాత చేసే కొన్ని తప్పులు వారిని విజయం నుంచి దూరం చేస్తాయని హెచ్చరించారు. ఉదయం లేచిన తర్వాత చేయకూడని తప్పులు, చాణక్యుడు చెప్పిన కొన్ని జీవన సూత్రాలను ఇప్పుడు తెలుసుకుందాం.
సోమరితనం మంచిది కాదు
సోమరితనం.. మానవ జీవితంలో అతి చెడ్డ అలవాటు అని చాణక్యుడు చెప్పారు. ఉదయం నిద్ర లేచిన వెంటనే సోమరితనం మంచిది కాదన్నారు. ప్రతి రోజు ఉదయం సూర్యోదయానికి ముందే నిద్ర లేవడం అలవాటు చేసుకోవాలని సూచించారు. అలా కాకుండా ఉదయం ఆలస్యంగా నిద్రలేవడం, బద్దకంగా ఉంటూ ఏ పనులు చేయకపోవడం వల్ల మీరు మీ జీవితంలో ఎప్పటికీ విజయం సాధించలేరని స్పష్టం చేస్తున్నారు.
ప్రతికూల ఆలోచనలకు దూరంగా ఉండడం
ఆచార్య చాణక్యుడి ప్రకారం.. మనిషి రోజు ఎలా ప్రారంభిస్తాడో అదే అతని జీవిత దిశను నిర్ణయిస్తుంది. ఉదయం నిద్రలేవగానే ప్రతికూల ఆలోచనలు మన మనస్సులో చోటు చేసుకుంటే, అవే రోజంతా మనపై ఆధిపత్యం చెలాయిస్తాయి. అటువంటి ఆలోచనలు మనసులో భయం, అనిశ్చితి, ఒత్తిడిని పెంచి, సరైన నిర్ణయాలు తీసుకునే శక్తిని హరించేస్తాయి. అందుకే, ఉదయాన్ని శుభ్రమైన ఆలోచనలతో, స్థిరమైన మనసుతో ప్రారంభించాలి అని చాణక్యుడు ఉపదేశిస్తాడు. ఇది విజయానికి బాటలు వేస్తుందని చెప్పారు.
ప్రణాళిక లేకుండా రోజును ప్రారంభించకూడదు
చాణక్యుని దృష్టిలో ప్రణాళిక అనేది విజయానికి మొదటి మెట్టు. ఎలాంటి దిశ లేకుండా రోజు మొదలుపెట్టడం అంటే, గమ్యం తెలియకుండా ప్రయాణం చేయడమే. ఉదయం నిద్రలేవగానే మనం చేయబోయే పనులు, వాటికి కావలసిన క్రమం, లక్ష్యం.. ఇవన్నీ మనసులో స్పష్టంగా ఉండాలి. అలా ప్రణాళికతో రోజు ప్రారంభిస్తే సమయం సద్వినియోగం అవుతుంది, శ్రమకు ఫలితం దక్కుతుంది.
నిద్ర లేవగానే గాసిప్ చేయడం మానుకోవాలి
ఆచార్య చాణక్యుడి బోధనల ప్రకారం.. ఇతరుల గురించి చెడుగా మాట్లాడటం మన వ్యక్తిత్వాన్ని క్షీణింపజేస్తుంది. ముఖ్యంగా ఉదయం నిద్రలేవగానే గాసిప్ చేయడం మనసును అపవిత్రం చేస్తుంది. అలా పుట్టే నెగటివ్ పవర్ మన పనుల్లో ఏకాగ్రతను తగ్గించి, విజయాన్ని దూరం చేస్తుంది. మన మాటలు మన భవిష్యత్తును నిర్మిస్తాయని తెలుసుకుని, ఉదయాన్ని సానుకూల మాటలతో, మంచి ఆలోచనలతో ప్రారంభించాలని ఆచార్య చాణక్యుడు సూచిస్తున్నారు.
