ఆంధ్రప్రదేశ్ ప్రభుత్వం తిరుమల తిరుపతి దేవస్థానం (టీటీడీ) కొత్త పాలకమండలిని ఏర్పాటు చేసింది. ఏపీలో టీడీపీ-జనసేన – బీజేపీ కూటమి ప్రభుత్వం అధికారం చేపట్టిన నాలుగు నెలల తర్వాత చైర్మన్‌తో సహా 24 మంది సభ్యులతో టీటీడీ ట్రస్టు బోర్డును ఏర్పాటు చేసింది.
టీటీడీ కొత్త చైర్మన్‌గా చిత్తూరు జిల్లాకు చెందిన బొల్లినేని రాజగోపాల్ నాయుడు (బీఆర్ నాయుడు) నియమించింది. టీటీడీ బోర్డులో తెలంగాణ నుంచి ఐదుగురికి అవకాశం కల్పించారు. అందులో తెలంగాణ తెలుగుదేశం పార్టీ సీనియర్ నేత నన్నూరి నర్సిరెడ్డి పేరు కూడా ఉంది. అయితే నర్సిరెడ్డికి తిరుమల తిరుపతి దేవస్థానం పాలకమండలిలో అవకాశం కల్పించడంపై టీడీపీ శ్రేణులు హర్షం వ్యక్తం చేస్తున్నారు. తెలుగుదేశం పార్టీ జాతీయ అధినేత, ఆంధ్రప్రదేశ్ ముఖ్యమంత్రి చంద్రబాబు నాయుడు.. పార్టీ కోసం నిస్వార్దంగా పనిచేసిన నర్సిరెడ్డికి మంచి అవకాశం కల్పించారని వారు పేర్కొంటున్నారు.
అయితే టీడీపీ సభలలో తన డైలాగ్‌లతో ప్రత్యర్థులపై విరుచుకుపడుతూ.. పార్టీ శ్రేణుల్లో జోష్ నింపే నన్నూరి నర్సిరెడ్డి బ్యాక్‌గ్రౌండ్ గురించి తెలుసుకునే ప్రయత్నం చేద్దాం. తెలుగుదేశం పార్టీ తరఫున బలంగా వాయిస్ వినిపించేవారిలో నన్నూరి నర్సిరెడ్డి ఒకరు. 2014లో ఆంధ్రప్రదేశ్ పునర్విభజన.. ఆ తర్వాత చోటుచేసుకున్న పరిణామాలతో తెలంగాణలో టీడీపీకి ఇబ్బందికర పరిస్థితులు నెలకొన్నాయి. టీడీపీ నుంచి ఎమ్మెల్యేలుగా గెలిచిన నేతలు ఒక్కొక్కరికి దూరం అయినప్పటికీ.. నర్సిరెడ్డి వంటి నేతలు పార్టీని నమ్ముకుని ఉన్నారు. మంచి వక్త కూడా అయిన నర్సిరెడ్డి అప్పటి అధికార బీఆర్ఎస్‌కు వ్యతిరేకంగా తన వాయిస్‌ను బలంగా వినిపించేవారు. ఈ క్రమంలోనే ఆయన పార్టీలో మంచి గుర్తింపు సొంతం చేసుకన్నారు.
అయితే ఏపీలో కూడా నర్సిరెడ్డికి మంచి గుర్తింపు ఉంది. ఆంధ్రప్రదేశ్‌లో టీడీపీ సభలలో పాల్గొనే నర్సిరెడ్డి ప్రత్యర్థి పార్టీలపై తనదైన సెటైర్లు వేసేవారు. ముఖ్యంగా కేసీఆర్, వైఎస్ జగన్‌లను లక్ష్యంగా చేసుకుని నర్సిరెడ్డి చెప్పే కథలు టీడీపీ క్యాడర్‌లో మంచి జోష్ నింపేవి. టీడీపీ అత్యంత ప్రతిష్టాత్మకంగా నిర్వహించే మహానాడు కార్యక్రమాలలో కూడా నర్సిరెడ్డి ప్రసంగాలకు టీడీపీ క్యాడర్ నుంచి విశేషమైన స్పందన వచ్చేది. పలు సందర్భాల్లో నర్సిరెడ్డి తన స్పీచ్‌తో టీడీపీ శ్రేణుల్లో కాకుండా.. చంద్రబాబు ముఖంలో కూడా నవ్వులు పూయించారు.
అయితే తెలంగాణ టీడీపీలో కీలక నేతగా ఉన్న నర్సిరెడ్డిని.. పార్టీ రాష్ట్ర అధ్యక్షుడిగా నియమించనున్నారనే ప్రచారం జరిగింది. అయితే ఆ దిశలో అడుగులు పడలేదు. అయితే చివరకు చంద్రబాబు మాత్రం..టీడీపీకి విధేయుడుగా ఉన్న నన్నూరి నర్సిరెడ్డిని టీటీడీ బోర్డులో సభ్యునిగా అవకాశం కల్పించడం ద్వారా పార్టీ కోసం ఆయన పడిన కష్టాన్ని గుర్తించారని అంటున్నారు. ఈ క్రమంలోనే నర్సిరెడ్డి శుభాకాంక్షలు చెబుతూ టీడీపీ శ్రేణులు సోషల్ మీడియాలో పోస్టులు పెడుతున్నారు.
