చిన్నప్పటి నుంచీ చూస్తున్నా.. ఏళ్లకు ఏళ్లు గడుస్తున్నా.. చందమామపై ఉన్న క్రేజ్ ఏమాత్రం తగ్గలేదు. జాబిలి చుట్టూ కథలు అల్లారు. కొన్నాళ్ల కిందట ఆ జాబిలిపైనే అడుగుపెట్టారు. అక్కడ నీటి జాడను కనుగొన్నారు. భారీగా ఖనిజాలు ఉన్నాయన్నారు. వీటన్నింటినీ దాటి.. చైనా శాస్త్రవేత్తలు మరో అడుగు ముందుకేశారు. చంద్రుడి మీదున్న మట్టి నుంచి నీటిని ఉత్పత్తి చేసి.. మరో కొత్త సంగతిని ప్రపంచానికి చాటి చెప్పారు. చంద్రుడిపై నీటి జాడలు ఉన్నాయని తెలుసు కాని.. దాని పైన ఉండే మట్టి నుంచి వాటర్ ని తయారుచేయడం కూడా సాధ్యమేనని ఇప్పుడు నిరూపించారు. అసలే.. భూమిపై వాటర్ సోర్స్ తగ్గిపోతున్న సమయంలో.. ఈ న్యూస్ చాలా కీలకమైనదే. ఇంతకీ చంద్రుడిపై ఉన్న మట్టి నుంచి వాటర్ ను ఎలా బయటకు తీశారు? దీనికోసం చైనా శాస్త్రవేత్తలు అనుసరించిన మార్గమేంటి? ఇప్పుడీ ప్రయోగం సక్సెస్ అయ్యింది కనుక.. జాబిలిపై నివాసముండడానికి మార్గం సుగుమం అయినట్టేనా? ఈ రిజల్ట్.. భవిష్యత్ ప్రయోగాల తీరుతెన్నులను ఎలా మార్చనుంది?
CAS – చైనీస్ అకాడమీ ఆఫ్ సైన్సెస్ శాస్త్రవేత్తలు ఈ ప్రయోగం చేశారు. CASలోని నింగ్ బో ఇన్స్టిట్యూట్ ఆఫ్ మెటీరియల్స్ టెక్నాలజీ అండ్ ఇంజనీరింగ్ కు చెందిన సైంటిస్టులు ఈ విషయంలో ముందడుగు వేశారు. చాంగ్ ఈ-5 మిషన్ లో భాగంగా చంద్రుడిపై మట్టిని భూమికి తీసుకువచ్చారు. తరువాత దీనిని బాగా వేడి చేశారు. ఆ తరువాత ఈ మట్టి నుంచి నీటిని వెలికితీయడానికి స్పెషల్ మెథడ్ ను ఉపయోగించారు. ఈ ప్రయోగంలో తేలింది ఏంటంటే.. 500 లీటర్ల నీటిని తయారుచేయాలంటే.. ఒక టన్ను మట్టి కచ్చితంగా అవసరం. అయితే ఈ ప్రయోగంలోనే సైంటిస్టులకు మరో విషయంలో కూడా క్లారిటీ వచ్చింది. జాబిలి నుంచి తీసుకువచ్చిన మట్టి నుంచి తయారుచేసిన నీటిని.. అటు హైడ్రోజన్, ఇటు ఆక్సిజన్ గా విడగొట్టవచ్చు. దీంతో చంద్రుడిపై ఉన్న మట్టిపై శాస్త్రవేత్తలు పూర్తిగా దృష్టి సారించారు. భూమి తరువాత అంతటి నివాసయోగ్యమైన గ్రహం కోసం ఎప్పటి నుంచో అన్వేషణ జరుగుతోంది. భూమికి దగ్గరగా ఉండేవాటిపైనా ఫోకస్ పెట్టారు. అక్కడ నీటి నిల్వలు ఉంటేనే మానవ మనుగడ సాధ్యం. అందుకే ఇప్పుడీ ప్రయోగం కొత్త ఆశలు పుట్టిస్తోంది.
