చలికాలం ప్రారంభమైంది. రానున్న రోజుల్లో చలి తీవ్రత ఎక్కువగా ఉంటుందని వాతావరణ నిపుణులు తెలిపారు. ఈ సీజన్‌లో సూర్య రశ్మి అంతగా ఉండదు. సూర్య రశ్మి లేకపోవడం వల్ల శరీరానికి కావాల్సిన విటమిన్ డి అందదు. విటమిన్ డి శరీరంలో కాల్షియం పెంచుతుంది. ఎముకల్ని బలంగా మార్చడానికి కాల్షియం, విటమిన్ డి చాలా అవసరం. కాల్షియం, విటమిన్ డి ఎముకల సాంద్రతను పెంచుతాయి. దీంతో.. బోలు ఎముకలు వంటి వ్యాధుల నుంచి తప్పించుకోవచ్చు. అంతేకాకుండా ఈ రెండు కండరాల బలాన్ని పెంచుతాయి. కాల్షియం నాడీ వ్యవస్థ పనితీరు మెరుగుపరుస్తుంది. రక్తం గడ్డకట్టడంలో సహాయపడుతుంది. హార్మోన్లు, ఎంజైమ్‌ల స్రావాన్ని నియంత్రిస్తుంది.
కాల్షియం కోసం ఏం తినాలి?
ఆహారంలో కొన్ని పండ్లను చేర్చుకోవడం ద్వారా ఎముకలు దృఢంగా ఉంటాయని నిపుణులు చెబుతున్నారు. Detoxpri వ్యవస్థాపకుడు, హోలిస్టిక్ న్యూట్రిషనిస్ట్ ప్రియాంషి భట్నాగర్ ప్రకారం, చలికాలంలో నాలుగు నెలల పాటు పూర్తి కాల్షియం పొందడానికి కొన్ని పండ్లను డైట్‌లో చేర్చుకోవాలి. ఈ పండ్లను తింటే కాల్షియం స్థాయి పెరిగి ఎముకలు బలంగా మారతాయి. ఇంతకీ ఆ పండ్లు ఏంటో ఇక్కడ చుద్దాం.
జామపండ్లు తినడం వల్ల ఆరోగ్య ప్రయోజనాలు..
ఖర్జూరాలు..
ఖర్జూరాలు డ్రై ఫ్రూట్స్‌లో సూపర్ ఫుడ్ అని చెప్పొచ్చు. ఖర్జూరంలో ఎన్నో పోషకాలు ఉంటాయి. కాల్షియంతో పాటు ఇతర ఖనిజాల అద్భుతమైన మూలం. ఖర్జూరంలో ఐరన్, మినరల్, అమినో యాసిడ్స్, ఫాస్పరస్, విటమిన్లు అధికంగా ఉంటాయి. ఇవి శరీరానికి శక్తిని, ఎముకలకు బలాన్ని అందిస్తాయి. 100 గ్రాముల ఖర్జూరాల్లో దాదాపు 64 mg కాల్షియం ఉంటుంది.
కివి..
కివిలో కాల్షియం, విటమిన్ సి అధికంగా ఉంటుంది. ఇవి రోగనిరోధక శక్తిని బలోపేతం చేస్తాయి. ఎముకలకు ప్రయోజనం చేకూరుస్తాయి. 100 గ్రాముల కివీ పండులో దాదాపు 34 mg కాల్షియం ఉంటుంది. ఇందులో ఫైబర్ ఎక్కువగా ఉంటుంది. దీంతో.. జీర్ణక్రియ మెరుగుపడుతుంది. ఈ పండ్లలో విటమిన్ ఇ తో పాటు యాంటీ ఆక్సిడెంట్లు ఉంటాయి. ఇవి చర్మ ఆరోగ్యాన్ని ఎంతో మేలు చేస్తాయి.
జామ..
జామపండులో ఎన్నో పోషకాలు ఉన్నాయి. చలికాలంలో జామపండు తింటే ఎన్నో ఆరోగ్య ప్రయోజనాలు పొందవచ్చు. జామపండులో విటమిన్ సి ఎక్కువగా ఉంటుంది. దీంతో.. ఇమ్యూనిటీ పవర్ పెరుగుతుంది. రోగాలు రాకుండా అడ్డుకుంటుంది. ఇందులో డైటరీ ఫైబర్ అధికంగా ఉంటుంది. దీంతో.. మలబద్ధక సమస్యతో బాధపడేవారికి జామపండు అద్భుతంగా పనిచేస్తుంది. చలికాలంలో జామకాయ తినడం వల్ల శరీరానికి విటమిన్ డి, కాల్షియం అందుతాయి. 100 గ్రాముల జామపండులో దాదాపు 18 మిల్లీగ్రాముల కాల్షియం ఉంటుంది.
అంజీర్..
అంజీర్‌ను పోషకాల గని అంటారు. విటమిన్ ఎ, విటమిన్ కే, పొటాషియం, కాల్షియం, మెగ్నీషియం, ఐరన్, యాంటీ ఆక్సిడెంట్లు అత్తి పండులో ఉన్నాయి. ఎండిన లేదా తాజా అత్తి పండ్లలో కాల్షియం పుష్కలంగా ఉంటుంది. ఇవి చలికాలంలో శరీరాన్ని వెచ్చగా, ఎముకలు దృఢంగా ఉంచడంలో సహాయపడతాయి. 100 గ్రాముల ఎండిన అత్తి పండ్లలో 162 mg కాల్షియం ఉంటుంది. అయితే 100 గ్రాముల తాజా అంజీర్‌లో 35 mg కాల్షియం ఉంటుంది.
నారింజ..
ఆరెంజ్ విటమిన్ సితో పాటు కాల్షియం యొక్క మంచి మూలం. ఆరెంజ్ జ్యూస్ తాగడం వల్ల శరీరానికి క్యాల్షియం అందడంతో పాటు రోగనిరోధక శక్తి కూడా పెరుగుతుంది. 100 గ్రాముల నారింజలో దాదాపు 40 mg కాల్షియం ఉంటుంది. నారింజలో ఉండే విటమిన్ సి, యాంటీ ఆక్సిడెంట్లు చర్మాన్ని, జుట్టును ఆరోగ్యంగా ఉంచుతాయి. ఆరెంజ్ తినడం వల్ల ఎముకలతో పాటు దంతాలు కూడా బలపడతాయి.
ఈ రెండు పండ్లు కూడా తినండి..
బొప్పాయి, స్ట్రాబెర్రీలో కాల్షియం ఎక్కువగా ఉంటుంది. ఈ రెండూ కాల్షియం పరిమాణం పెంచడంలో సాయపడతాయి. 100 గ్రాముల స్ట్రాబెర్రీలో దాదాపు 27 mg కాల్షియం ఉంటుంది. ఇక, బొప్పాయి తినడం వల్ల ఎముకల ఆరోగ్యం మెరగవుతుంది. అంతేకాకుండా శరీరానికి కావాల్సిన కాల్షియం అందుతుంది.
గమనిక..
ఇది సోషల్ సమాచారం మాత్రమే. కొన్ని అధ్యయనాలు, సంబంధిత నిపుణుల ప్రకారం ఈ వివరాలు అందించాం. వ్యక్తుల ఆరోగ్యాన్ని బట్టి ఫలితాలుంటాయి. వీటిని పాటించేముందు.. సంబంధిత నిపుణుడిని సంప్రదించడం శ్రేయస్కరం. అలాగే, హెల్తీ లైఫ్ స్టైల్, సరైన ఆహారం కూడా తీసుకోవడం మీ ఆరోగ్యానికి ఎంతో మేలు.
