ప్రస్తుతం ఇది మొక్క జొన్న సీజన్. ఈ కాలంలో ఎక్కువగా మొక్క జొన్నలు, స్వీట్ కార్న్ లభ్యమవుతాయి. ఇవి ఆరోగ్యానికి చాలా మంచిది. కార్న్, స్వీట్ కార్న్‌లో శరీరానికి కావాల్సిన పోషకాలు ఎన్నో ఉంటాయి.
వీటిని తినడం వల్ల చాలా రకాల సమస్యలను తగ్గించుకోవచ్చు. వీటితో ఎన్నో రకాల వంటలు కూడా తయారు చేసుకోవచ్చు. మొక్కజొన్నతో ఎలాంటి వంటలు చేసినా చాలా రుచిగా ఉంటాయి. చాలా మంది వీటితో వడలు వేస్తూ ఉంటారు. ఎప్పుడూ అవే తింటే బోర్ కొడుతూ ఉంటాయి. కాబట్టి కాస్త వెరైటీగా కట్ లెట్స్ తయారు చేసుకుంటే చాలా రుచిగా ఉంటాయి. తక్కువ నూనె పడుతుంది. మరి ఈ మొక్క జొన్న కట్ లెట్స్ ఎలా తయారు చేస్తారు? వీటికి కావాల్సిన పదార్థాలు ఏంటో ఇప్పుడు తెలుసుకుందాం.
మొక్క జొన్న కట్లెట్స్‌కి కావాల్సిన పదార్థాలు:
మొక్క జొన్న, ఉడికించిన బంగాళదుంపలు, క్యారెట్ తురుము, క్యాప్సికమ్ ముక్కలు, ఉల్లిపాయ, పచ్చి మిర్చి, కారం, పసుపు, ఉప్పు, ధనియాల పొడి, జీలకర్ర పొడి, బ్రెడ్ క్రంబ్స్, కార్న్ ఫ్లోర్, ఆయిల్.
మొక్క జొన్న కట్లెట్స్ తయారీ విధానం:
ముందుగా మొక్క జొన్నను శుభ్రంగా కడిగి.. మిక్సీలో వేసి కాస్త బరకగా పేస్ట్ చేసుకోవాలి. వీటిని ఒక పెద్ద బౌల్‌లోకి తీసుకోవాలి. ఇందులో ఉడికించిన ఆలూ, క్యారెట్ తురుము, క్యాప్సికమ్ ముక్కలు, ఉల్లిపాయ, పచ్చి మిర్చి, కారం, పసుపు, ఉప్పు, ధనియాల పొడి, జీలకర్ర పొడి అన్నీ వేసి బాగా కలుపుకోవాలి. చివరగా కార్న్ ఫ్లోర్, బ్రెడ్ క్రంబ్స్ కూడా వేసి గట్టిగా ముద్దలా కలుపుకోవాలి. ఇప్పుడు వీటిని మీకు నచ్చిన షేపులో చిన్న చిన్న ముద్దలుగా చేసుకోవచ్చు. ఇప్పుడు ఒక పాన్ తీసుకుని అందులో కొద్దిగా ఆయిల్ వేసి.. కట్లెట్స్ ఉంచాలి.
చిన్న మంట మీద రెండు వైపులా ఎర్రగా వేయించుకోవాలి. డీప్ ఫ్రై కూడా చేసుకోవచ్చు. కానీ పాన్ ఫ్రై చేస్తేనే ఆరోగ్యానికి చాలా మంచిది. ఆ తర్వాత వీటిని సర్వింగ్ ప్లేట్స్‌లోకి తీసుకుని సర్వ్ చేసుకోవడమే. అంతే ఎంతో రుచిగా ఉండే మొక్క జొన్న కట్లెట్స్ సిద్ధం. వీటిని టమాటా కిచెప్, పుదీనా చట్నీతో తింటే చాలా రుచిగా ఉంటాయి. కావాలంటే.. నేరుగా కూడా తినవచ్చు. మరి ఇంకెందుకు లేట్ మీరు కూడా ఓ సారి ట్రై చేయండి.
