టీమ్‌ఇండియా యువ క్రికెటర్‌ శుభ్‌మన్‌ గిల్‌ మరోసారి వార్తల్లో నిలిచాడు. టీవీ నటి రిధిమా పండిత్‌ (Ridhima Pandit)తో అతడి పెళ్లి జరగనున్నట్లు నెట్టింట జోరుగా ప్రచారం జరుగుతోంది. ఈ నేపథ్యంలో స్పందించిన నటి వదంతుల (Wedding Rumours)పై క్లారిటీ ఇచ్చారు. ఆ క్రికెటర్‌తో ఎలాంటి పరిచయం లేదన్నారు.
టీవీ నటి రిధిమా, గిల్‌ (Shubman Gill) గత కొంతకాలంగా డేటింగ్‌లో ఉన్నారని, ఈ ఏడాది డిసెంబరులో వీరిద్దరూ వివాహ బంధంలోకి అడుగుపెట్టనున్నారని సోషల్‌ మీడియాలో తెగ ప్రచారం జరుగుతోంది. ఈ పోస్ట్‌లు వైరల్‌ అయినప్పటి నుంచి నటికి విపరీతమైన ఫోన్ కాల్స్ వచ్చాయట. దీంతో ఇన్‌స్టాలో ఓ పోస్ట్‌ పెట్టింది. ‘‘ఈ ఉదయం నుంచి జర్నలిస్టుల నుంచి అనేక కాల్స్ వచ్చాయి. ఇలా ఎప్పుడూ జరగలేదు. నా వివాహం గురించి చర్చ జరుగుతోంది. ప్రస్తుతానికి అలాంటిదేమీ లేదు. నా జీవితంలో ఏదైనా జరిగితే స్వయంగా ప్రకటిస్తా’’ అని రాసుకొచ్చింది.
తాజాగా ఓ ఇంటర్వ్యూలోనూ దీని గురించి స్పందించింది. ‘‘కొందరు కావాలనే ఈ కథను అల్లి సోషల్‌ మీడియాలో వైరల్‌ చేశారు. వ్యక్తిగతంగా శుభ్‌మన్‌ గిల్‌ (Cricketer Shubman Gill)తో నాకు ఎలాంటి పరిచయం లేదు. నిన్న ఉదయం నుంచి శుభాకాంక్షల మెసేజ్‌లు వస్తూనే ఉన్నాయి. విసిగెత్తిపోయి సోషల్‌ మీడియాలో పోస్ట్‌ పెట్టా’ అని తెలిపింది. ప్రస్తుతానికి తాను సింగిల్‌ అంటూ పెళ్లి వార్తలను కొట్టిపారేసింది. శుభ్‌మన్‌ గిల్‌ పెళ్లి, ప్రేమ గురించి గతంలోనూ పలుమార్లు ఊహాగానాలు చక్కర్లు కొట్టిన సంగతి తెలిసిందే.
బాలీవుడ్‌ టీవీ షో ‘బహు హమారీ రజనీకాంత్‌’తో రిధిమా పండిత్‌ (TV Actress Ridhima Pandit) బుల్లితెర ప్రేక్షకుల్లో చాలా పాపులరిటీ సంపాదించుకుంది. ఖత్రోన్‌ కీ ఖిలాడీ, బిగ్‌బాస్‌ ఓటీటీ తదితర రియాల్టీ షోస్‌లో మెరిసింది.
