“ఇరానీ ఛాయ్” కోసం బయటకు వెళ్లాల్సిన అవసరం లేదు.. ఇంట్లోనే సులువుగా చేసుకోవచ్చు

హైదరాబాద్‌లోని అనేక ప్రముఖ కేఫ్‌లలో ఈ ఇరానీ చాయ్ లభిస్తుంది. ఇప్పుడు ఈ చాయ్‌ను ఎక్కడైనా సులభంగా పొందవచ్చు,

కానీ దీన్ని బయటే తాగాల్సి ఉంటుంది. ఇంట్లో ఇరానీ చాయ్‌ను ఎలా తయారు చేయాలో చాలా మందికి తెలియదు. కింద తెలిపిన విధానాన్ని అనుసరిస్తే, ఇంట్లోనే సులభంగా రుచికరమైన ఇరానీ చాయ్‌ను తయారు చేసుకోవచ్చు. ఇప్పుడు దీన్ని ఎలా తయారు చేయాలో తెలుసుకుందాం.

ఇరానీ చాయ్ తయారీకి కావలసిన పదార్థాలు:
అల్లం – కొద్దిగా
యాలకులు – 3
నీళ్లు – 1 గ్లాసు
టీ పొడి – 2.5 టీ స్పూన్లు
చక్కెర – 3 టీ స్పూన్లు
కాచి చల్లార్చిన పాలు – 1 గ్లాసు

ఇరానీ చాయ్ తయారీ విధానం:
ముందుగా అల్లం, యాలకులను కచ్చాపచ్చాగా దంచుకోవాలి.ఒక గిన్నెలో 1 గ్లాసు నీళ్లు పోసి, దానిపై శుభ్రమైన వస్త్రాన్ని అడ్డంగా ఉంచాలి. వస్త్రం నీటిని కొద్దిగా తాకేలా చూసి, దారం సహాయంతో గిన్నెకు గట్టిగా కట్టాలి.

వస్త్రంపై టీ పొడి, దంచిన అల్లం, యాలకులను వేయాలి.ఈ గిన్నెను ఒక ప్రెషర్ కుక్కర్‌లో నీళ్లు పోసి ఉంచాలి.కుక్కర్ మూత పెట్టి, 4 విజిల్స్ వచ్చే వరకు ఉడికించాలి.తరువాత కుక్కర్ మూత తీసి, గిన్నెపై ఉన్న వస్త్రాన్ని టీ పొడితో సహా తొలగించాలి.

గిన్నెలో ఉన్న డికాషన్‌ను మరో గిన్నెలోకి పోసి, దానిలో చక్కెర, కాచి చల్లార్చిన పాలను కలిపి మరిగించాలి.ఈ విధంగా చేస్తే రుచికరమైన ఇరానీ చాయ్ సిద్ధమవుతుంది. ఈ చాయ్‌ను ఎక్కువసేపు మరిగిస్తే మరింత రుచిగా ఉంటుంది.ఈ సులభమైన విధానంతో ఇంట్లోనే అద్భుతమైన ఇరానీ చాయ్‌ను సిద్ధం చేసి ఆస్వాదించవచ్చు!