బంగారం ధర భారీగా తగ్గే అవకాశం కనిపిస్తోంది. ముఖ్యంగా బంగారం ధర తగ్గడానికి అంతర్జాతీయంగా అనేక కారణాలు తోడయ్యే అవకాశం ఉంది. ప్రధానంగా పసిడి ధరలు తగ్గడానికి ఉక్రెయిన్ – రష్యా మధ్య జరుగుతున్న యుద్ధం వాతావరణం ముగుస్తున్న నేపథ్యంలో ఈ సానుకూలమైన పరిస్థితులు ఏర్పడుతున్నాయి.
ముఖ్యంగా అమెరికా అధ్యక్షుడు డోనాల్డ్ ట్రంప్ చొరవతో రష్యా అధ్యక్షుడు పుతిన్, ఉక్రెయిన్ తో యుద్ధవిరమణ చేసేందుకు రాజీ అయ్యారు. దీంతో సుదీర్ఘకాలంగా ప్రపంచ వాణిజ్య రంగానికి ఇబ్బందులు తెస్తున్న ఈ యుద్ధ వాతావరణం దాదాపు ముగిసింది. ఫలితంగా స్టాక్ మార్కెట్లలో లాభాలు ప్రారంభం అవుతున్నాయి. దీని ప్రభావం బంగారంపై కూడా పడే అవకాశం కనిపిస్తోంది. ఎందుకంటే బంగారం ధర ప్రస్తుతం ఒక ఔన్సు 3000 డాలర్ల ఎగువన ఉంది. ఇది చరిత్రలోనే అత్యధిక స్థాయి అని చెప్పవచ్చు. ఈ రికార్డు స్థాయి నుంచి బంగారం ధర ఎంత మేర తగ్గుతుంది అనేది ప్రస్తుతం ఒక ప్రశ్నగా మారింది.
బంగారం ధర తగ్గడానికి దోహదపడే అవకాశాలు ఇవే:
ఫెడరల్ రిజర్వ్ వడ్డీరేట్లు పెంచితే..?
ఫెడరల్ రిజర్వ్ వడ్డీ రేట్లు పెంచితే బంగారం డిమాండ్ తగ్గే అవకాశం పుష్కలంగా కనిపిస్తోంది. అప్పుడు ఒక ఔన్స్ బంగారం ధర 2900 డాలర్ల నుంచి 2850 డాలర్ల స్థాయికి పడిపోయే అవకాశం ఉంటుంది.
రష్యా, ఉక్రెయిన్ యుద్ధం ముగింపు
ప్రస్తుతం రష్యా ఉక్రెయిన్ యుద్ధ ముగింపు వార్తలు వస్తున్నాయి. ఈ నేపథ్యంలో బంగారం ధర భవిష్యత్తులో 2,800 – 2,750 డాలర్ల వరకూ దిగి రావచ్చు.
అమెరికా డాలర్ బలపడితే
డాలర్ ఇండెక్స్ పెరిగితే, బంగారం డిమాండ్ తగ్గి ఒక ఔన్స్ బంగారం ధ 2,700 – 2,650 డాలర్ల స్థాయికి పడిపోవచ్చు.
కేంద్ర బ్యాంకుల కొనుగోలు తగ్గితే
చైనా సెంట్రల్ బ్యాంకు, భారతీయ రిజర్వు బ్యాంకు, యూరోపియన్ బ్యాంకులు పెద్ద ఎత్తున బంగారం కొనుగోలు చేస్తున్నాయి. ఒకవేళ ఈ ట్రెండ్ మారితే 2,600 – 2,550 డాలర్ల వరకూ పడిపోవచ్చు.
దీనికి తోడు ప్రపంచవ్యాప్తంగా స్టాక్ మార్కెట్లలో కూడా రికవరీ కనిపిస్తోంది. భారతీయ స్టాక్ మార్కెట్ కూడా రికవరీ మూడ్ లో ఉంది. ఇది బంగారం ధర తగ్గడానికి ఒక మార్గం అని చెప్పవచ్చు. ఎందుకంటే స్టాక్ మార్కెట్ పెరిగినప్పుడల్లా బంగారం ధర తగ్గుతుంది. ఈ లెక్కన చూస్తే బంగారం ధర ప్రస్తుతం ఉన్న రేంజ్ నుంచి దాదాపు 300 డాలర్ల నుంచి 400 డాలర్ల వరకు తగ్గే అవకాశం కనిపిస్తోంది. ఒకవేళ అదే జరిగితే ఒక తులం బంగారం దేశీయంగా పదివేల వరకు తగ్గే వీలుంది.
