నాన్‌ వెజ్‌ ప్రియులు చికెన్‌ను ఎంతగా ఇష్టపడతారో ప్రత్యేకంగా చెప్పాల్సిన పనిలేదు. ఆదివారం వచ్చిందంటే చాలు కచ్చితంగా చికెన్ ఉండాల్సిందే. అయితే ప్రతీసారి ఒకే రకమైన విధంగా చికెన్ చేసుకుంటే బోర్‌ కొడుతుంది కదూ!
మరి ఈరోజు ఒక వెరైటీ చికెన్ రెసిపీ గురించి తెలుసుకుందాం. అదే ఆరంజ్‌ చికెన్. ఇంతకీ ఏంటీ ఆరెంజ్‌ చికెన్.? దీనిని ఎలా తయారు చేస్తారో ఇప్పుడు తెలుసుకుందాం..
ఎప్పుడూ తినే చికెన్‌ను వెరైటీగా తినాలనుకునే వారికి ఈ ఆరంజ్‌ చికెన్ బెస్ట్‌ ఆప్షన్‌గా చెప్పొచ్చు. ఆరెంజ్‌ చికెన్ రెసిపీ చైనీస్‌-అమెరికన్‌ వంటకం. ఈ రెసిపీలో ఆరెంజ్‌తో చేసిన సాస్‌ను ఉపయోగిస్తారు. ఈ డిష్‌ చేయడానికి ఏయే వస్తువులు కావాలి.? తయారీ విధానం ఏంటో ఇప్పుడు తెలుసుకుందాం..
ఆరెంజ్‌ చికెన్ తయారు చేయడానికి బోన్లెస్ చికెన్, ఒక కప్పు కార్న్‌ ఫ్లోర్‌, ఒక గుడ్డు, రుచికి సరిపడ ఉప్పు, నల్ల మిరియాలు, నూనె, ఒక కప్పు నారింజ రసం, సోయా సాస్, పావు టీస్పూన్ వెనిగర్, ఒక చెంచా సన్నగా తరిగిన అల్లం, సన్నగా తరిగిన వెల్లుల్లి ఒక చెంచా, చిటికెడు బ్రౌన్ షుగర్, ఉల్లిపాయ ఆకులు కావాలి.
ఇక తయారీ విధానానికి వస్తే.. ముందుగా ఒక గిన్నెలో బోన్లెస్ చికెన్ తీసుకొని ముందుగా దానిపై ఉప్పు, మిరియాల పొడి వేసుకోవాలి. అనంరతం మొక్కజొన్న పిండి, గుడ్డు, కొద్దిగా నీరు కలపాలి. కాసేపు చికెన్‌ను మెరినేట్ చేసిన తర్వాత.. స్టౌవ్‌పై ప్యాన్‌ పెట్టి, అందులో నూనె వేసుకోవాలి. అనంతరం చికెన్‌ను వేసి బ్రౌన్ కలర్‌ వచ్చే వరకు ఫ్రైడ్‌ చేయాలి. ఫ్రైగా మారిన తర్వాత చికెన్‌ను మరో గిన్నెలోకి తీసుకోవాలి.
అనంతరం ఆరంజ్‌ సాస్‌ను తయారు చేసుకోవాలి. ఇందుకోసం.. కొంచెం ఆరంజ్‌ జ్యూస్‌ను తీసుకోవాలి. ఆ తర్వాత ఒక పాన్‌ను తీసుకొని స్టౌవ్‌పై పెట్టాలి. తక్కువ వేడితో ఆరెంజ్‌ జ్యూస్, సోయాసాస్‌, వెనిగర్, బ్రౌన్ షుగర్, అల్లం, వెల్లుల్లి కలపాలి. పూర్తిగా మరిగిన తర్వాత అందులో కార్న్‌ ఫ్లోర్‌ను కలపాలి. ఈ మిశ్రమం అంతా చిక్కగా మారిన తర్వాత అందులో అంతకుముందు వేయించిన చికెన్‌ను వేసి కలుపుకోవాలి. చికెన్ ఉడికిన తర్వాత తరిగిన ఉల్లిపాయ ఆకులు, కొన్న నువ్వులు వేసి డెకరేషన్‌ చేస్తే సరిపోతుంది. వేడి వేడి ఆరంజ్‌ చికెన్ రడీ అయినట్లే.
