ఇక ప్లాస్టిక్ కార్డులు, ఓటీపీతో పనిలేదంటున్న ‘మాస్టర్ కార్డ్’ సీఈఓ

మనం ఇప్పుడు పర్సులో పెట్టుకుని తిరుగుతున్న డెబిట్, క్రెడిట్ కార్డులు భవిష్యత్తులో కనిపించకుండా పోయే రోజులు ఎంతో దూరంలో లేవు. చెల్లింపుల ప్రపంచం పూర్తిగా డిజిటల్‌గా మారిపోనుంది. ఈ కీలక విషయాన్ని ‘మాస్టర్‌కార్డ్’ సౌత్ ఆసియా సీఈఓ గౌతమ్ అగర్వాల్ వెల్లడించారు. ‘ఎన్‌డీటీవీ వరల్డ్ సమ్మిట్ 2025’లో ఆయన మాట్లాడుతూ, భవిష్యత్ చెల్లింపుల వ్యవస్థ స్వరూపాన్ని వివరించారు.

భవిష్యత్తులో కార్డులు ప్రస్తుతం ఉన్న ప్లాస్టిక్ రూపంలో ఉండవని ఆయన స్పష్టం చేశారు. “మన కార్డులను ఫోన్లు, స్మార్ట్ వాచ్‌లు, చివరికి ఉంగరాల్లోకి కూడా డిజిటల్‌గా మార్చుకోవచ్చు. భవిష్యత్తులో చెల్లింపుల ప్రక్రియ అనేది మనం ప్రత్యేకంగా చేసే పనిలా కాకుండా, గాలి పీల్చినంత సహజంగా, మనకు తెలియకుండానే జరిగిపోతుంది” అని ఆయన వివరించారు. ఈ మార్పుకు ఎంతో కాలం పట్టదని ఆయన అభిప్రాయపడ్డారు.

చెల్లింపుల వ్యవస్థలో మరో కీలక మార్పు రానుందని అగర్వాల్ తెలిపారు. ప్రస్తుతం ప్రతీ ఆన్‌లైన్ లావాదేవీకి వస్తున్న ఓటీపీ (OTP)ల అవసరం భవిష్యత్తులో ఉండదన్నారు. “లావాదేవీల్లో భద్రత, సౌకర్యం చాలా ముఖ్యం. ఓటీపీల స్థానంలో బయోమెట్రిక్‌ విధానాన్ని తీసుకురావడానికి ప్రయత్నిస్తున్నాం. దీనివల్ల లావాదేవీలు మరింత సురక్షితంగా, వేగంగా పూర్తవుతాయి” అని ఆయన పేర్కొన్నారు.

భారత డిజిటల్ చెల్లింపుల వ్యవస్థపై గౌతమ్ అగర్వాల్ ప్రశంసలు కురిపించారు. “ప్రపంచంలోనే అత్యంత ఆధునిక చెల్లింపుల వ్యవస్థ భారత్‌లోనే ఉంది. ఇక్కడి ఆవిష్కర్తలు, ప్రగతిశీల నియంత్రణ సంస్థ, అందరి సహకార మనోభావమే ఇందుకు కారణం” అని కొనియాడారు. అయితే, భారత్ ఇప్పటివరకు సాధించింది చాలా తక్కువ అని, డిజిటల్ చెల్లింపుల రంగంలో దేశానికి ఇంకా అపారమైన అవకాశాలు ఉన్నాయని ఆయన తన ప్రసంగాన్ని ముగించారు.