చుట్టూ చీకటి అలుముకుంది. రోడ్డు వెంట వెలుగుతున్న లైట్లు.. ఆ చీకటిని చేధించేందుకు కష్టపడుతున్నాయి. వాటికి తోడుగా తన బైక్ లైటు కూడా ఆ చీకటిని చేధిస్తూ ముందుకు సాగుతోంది.
ఇలా వెళ్తున్న సమయంలోనే.. బైక్ లైట్ వెలుగులో దూరంగా ఓ మహిళ కనిపించింది. ఆమె ఒంటరిగా ఉందనుకుంటా. బైక్ వస్తున్నట్టు గమనించిన ఆ మహిళ.. లిఫ్ట్ అడుగుతున్నట్టుగా తన ఎడమ చేయి ఎత్తి సంజ్ఞలు చేయటం తన బైక్ లైట్ వెలుగులో స్పష్టంగా కనిపించింది. ఇంత రాత్రి వేళ చీకట్లో రోడ్డుపై ఓ మహిళ ఒంటరిగా ఉండటమేంటి..? పాపం ఏం కష్టమొచ్చిందో ఏమో..? ఇలా మెదడులో ప్రశ్నల ఊట ఉప్పొంగుతుండగానే.. అనివార్యంగానే బండి స్లో అయ్యింది.. గేర్లు డౌన్ అయ్యాయి.. బ్రేక్ పడింది.
“ఏమైందండీ..? ఏమైనా సమస్యా..? ఎక్కడికి వెళ్లాలి..?” అంటూ ఆమెను తను ఆరా తీశాడు. ఆయన అడిగిన ఏ ప్రశ్నకు సమాధానం ఇవ్వకుండా.. ప్లీజ్ అండీ.. కాస్త ముందు వరకు లిఫ్ట్ ఇస్తారా.. ప్లీజ్ అంటూ కొంచెం టెన్షన్, ఇంకొంచెం అమాయకత్వంతో అడిగితే ఎవరు మాత్రం కాదంటారు. అందులోనూ రాత్రి పూట ఒక మహిళ రోడ్డు మీద ఉందంటే.. ప్రతి ఒక్కరిలో పడుకున్న మానవత్వమే కాదు సమాజ సేవకుడు కూడా నిద్రలేస్తుంటాడు. ఆమె అడగటంతోనే కాదనలేక “ఎక్కండి..” అంటూ ఆమెను ఎక్కించుకుని బండిని ముందుకు పోనిచ్చాడు.
తాను వెళ్లాల్సిన రూటు కాకపోయినా.. ఆమె చెప్పిన మార్గంలో బండిని పోనిస్తూనే ఉన్నాడు. ఇలా కాస్త దూరం వెళ్లిన తర్వాత.. ఇక్కడ ఆపండి అని చెప్పింది. చుట్టూ చూస్తే పెద్దగా ఇండ్లేమీ కనిపించట్లేదు. నిర్మానుష్యంగా పైగా చీకటిగా కూడా ఉంది. “ఇక్కడెందుకండి.. మీ ఇల్లు ఎక్కడో చెప్పండి అక్కడే దింపేస్తాను.. ఇంత చీకట్లో ఎలా వెళ్తారు..?” అని మన సమాజసేవకుడు అమాయకంగా అడిగాడు. ఆ ప్రశ్నతో.. “నువ్వు చేసిన సమాజ సేవ చాళ్లే గానీ.. డబ్బులు తీయ్..” అంటూ గొంతు కాస్త గట్టిగా చేసి అటు నుంచి బెదిరింపు వచ్చింది. అప్పటివరకు అమాయకంగా ఉన్న మహిళ.. ఒక్కసారిగా చంద్రముఖిలో జ్యోతిక మారిపోయినట్టు.. బెదిరించటంతో మనోడి గుండెలు కాస్త తీన్మార్ డబ్బులు కొట్టటం మొదలుపెట్టాయి.
డబ్బులేంటీ.. నేనెందుకు ఇవ్వాలి.. అసలు ఎవరు నువ్వు.. పోలీసులకు ఫోన్ చేస్తా ఆగు.. అంటూ లోపల భయమేస్తున్నా బయటికి మాత్రం ఆమెను బెదిరిస్తున్నట్టు బిల్డప్ ఇచ్చాడు. కానీ.. అటువైపు ఉన్నది లేడీ కాదు కిలేడీ అన్నది మనోడికి కాస్త ఆలస్యంగా అర్థమైంది. నువ్వు పోలీసులకు ఫోన్ చేసినా ఇంకెవ్వరికి చేసినా.. నాకు మాయమాటలు చెప్పి.. నిర్మానుష్య ప్రదేశానికి తీసుకొచ్చి రేప్ చేయబోయాడు.. అంటూ తిరిగి నేనే చెప్తాను. అప్పుడు నిన్ను ఎవడూ నమ్మడు. నన్నే అందరూ నమ్ముతారు. కతలు పడకుండా సక్కగా పైసలు ఇచ్చి దొబ్బెయ్. అంటూ సవివరంగా అర్థమయ్యేలా చెప్పటంతో.. పర్సులో జాగ్రత్తగా దాచుకున్న జీతం డబ్బులు మొత్తం తీసి ఆమె చేతిలో పెట్టి దండం పెట్టి.. బైక్ స్టార్ట్ చేసి.. రూమ్ వచ్చే వరకు ఎక్కడా ఆపకుండా వెళ్లిపోయాడు. ఇక జీవితంలో ఎవరికీ లిఫ్ట్ ఇవ్వనని ఫిక్స్ అయిపోయాడు.
ఇలా.. ఒకరికో ఇద్దరికో కాదు.. ఇలా చాలా మంది అబ్బాయిలకు జరిగింది. హైదరాబాద్‌లో వాహనదారులను లిఫ్ట్ అడిగి నిర్మానుష్య ప్రాంతాలకు తీసుకెళ్లి వారిని బెదిరించి ఇద్దరు కిలేడీలు డబ్బులు వసూలు చేస్తున్న విషయం ఆలస్యంగా వెలుగులోకి వచ్చింది. ఆ కిలేడీలో చేతిలో మోసపోయిన కొందరు మగమహారాజులు పోలీసులకు ఫిర్యాదు చేయగా.. విషయం వెలుగు చూసింది.
మరోవైపు.. నవంబర్‌ 6న సాయంత్రం జెన్‌కోలో పని చేస్తున్న వ్యక్తి బైక్‌పై నాగారంలోని తన ఇంటికి వెళ్తున్నాడు. తార్నాక బస్టాండ్‌ వద్ద నిలుచుని ఉన్న భాగ్య అతడిని లిఫ్ట్ అడిగింది. లాలాపేటలోని జీహెచ్‌ఎంసీ గ్రౌండ్ వద్దకు తీసుకెళ్లి డబ్బులు డిమాండ్‌ చేసింది. అతను డబ్బులు ఇచ్చేందుకు నిరాకరించగా.. తనను బలవంతం చేసి ఇక్కడికి తీసుకొచ్చావని పోలీసులకు ఫిర్యాదు చేస్తానని బెదిరించి ఫోన్‌పే ద్వారా ఏకంగా రూ. 95 వేలు బదిలీ చేయించుకుంది. అనంతరం అతడితో పాటు కుషాయిగూడకు వెళ్లి ఏటీఎం ద్వారా రూ. 55 వేలు విత్‌డ్రా చేయించి లాక్కుంది.
ఈ ఘటనను సీరియస్‌గా తీసుకున్న లాలాగూడ పోలీసులు రంగంలోకి దిగి ఆ ఇద్దరు మహిళలను రెడ్ హ్యాండెడ్‌గా పట్టుకుని అరెస్ట్ చేసి రిమాండ్‌కు తరలించారు. మల్కాజ్‌గిరి ప్రాంతానికి చెందిన భాగ్య, సఫీల్‌గూడకు చెందిన వెన్నెల ఇద్దరు బంధువులు. గత కొంతకాలంగా వీరు వాహనాలపై వెళ్తున్న వారిని లిఫ్ట్ అడిగి.. ఏవో మాటలు చెప్పి నిర్మానుష్య ప్రాంతాలకు తీసుకెళ్లి డబ్బులు డిమాండ్‌ చేస్తున్నారు. వాహనదారులు డబ్బులివ్వకపోతే తమపై లైంగికదాడికి యత్నించాడని కేసు పెడతామని బెదిరించి డబ్బులు లాక్కుంటున్నారు.
