మనిషి జీవించడానికి ఆహారం ఎంతో ముఖ్యమని ప్రత్యేకంగా చెప్పాల్సిన పనిలేదు. మనం తీసుకునే ఆహారమే మన ఆరోగ్యాన్ని నిర్ణయిస్తుంది. ఏం తింటున్నామో అదే ఫలితం శరీరంపై పడుతుంది.
అయితే ఆహారం తీసుకునే విధానం వారి వారి ఇష్టాలపై ఆధారపడి ఉంటుంది. అయితే మితిమీరిన ఆరోగ్యం ఆహారంపై దుష్ప్రభావం పడేలా చేస్తుందని తెలిసిందే.
ఇంతకీ మనిషి మితిమీరిన ఆహారం ఎందుకు తీసుకుంటారో తెలుసా.? అదేం ప్రశ్న.. రుచిగా ఉంటేనో, ఆకలిగా ఉంటేనో తింటారు అంటారు కదూ! అయితే దీనికి ఒక శాస్త్రీయ కారణాన్ని వెతికారు పరిశోధకులు. మనుషులు మితిమీరిన ఫుడ్‌ ఎందుకు తీసుకుంటారన్న దానికి సంబంధించి అమెరికాకు చెందిన శాస్త్రవేత్తలు పరిశోధనలు చేపట్టారు. సాధారణంగా శరీరంలోని గడియారానికి అనుగుణంగా ఆహారం తీసుకుంటున్నామా లేదా అన్నదానిపై కాలేయం నుంచి మెదడుకు కొన్ని సంకేతాలు వెళుతుంటాయి.
అయితే ఈ సంకేతాల్లో అవరోధం ఏర్పడితే మనిషి మితిమీరిన తిండి తీసుకుంటారని పరిశోధకులు చెబుతున్నారు. ముఖ్యంగా నైట్‌ ఫిష్ట్స్‌లో పని చేసే వారు, వేళ కానీ వేళలో నిద్ర పోతున్న వారిలో ఈ సమస్య ఎక్కువగా వచ్చే అవకాశం ఉంటుందని అంటున్నారు. దీనివల్ల ఊబకాయం, మధుమేహం వంటి సమస్యల బారిన పడే అవకాశం ఉంటుందని చెబుతున్నారు. శరీర గడియారంలో తలెత్తే అవరోధల వల్ల ఈ సమస్య వస్తుందని చెబుతున్నారు.
రాత్రుళ్లు వేళ కానీ వేళలో పనిచేయడం వల్ల కాలేయ అంతర్గత గడియారం, దాని సంకేతాల్లో అవరోధం ఏర్పడుతున్నట్లు పెన్సిల్వేనియా వర్సిటీకి చెందిన పరిశోధకులు గుర్తించారు. దీనిని అధిగమించడానికి మెదడు చేసే ప్రయత్నాలు అతిగా తినడానకి దారి తీస్తాయని చెబుతున్నారు. నిద్రలేమి సమస్యతో బాధపడేవారు వారు జంక్‌ ఫుడ్‌ ఎక్కువగా తీసుకోవడానికి ఇదే కారణమని నిపుణులు చెబుతున్నారు.
నోట్‌: పైన తెలిపిన విషయాలు కేవలం ప్రాథమిక సమాచారం మేరకు మాత్రమే. ఆరోగ్యానికి సంబంధించి వైద్యుల సూచనలు పాటించడమే ఉత్తమం.
