ఏపీలోని గుంటూరు జిల్లా తాడేపల్లిలో నిర్మాణంలో ఉన్న వైసీపీ ఆఫీసును ఇవాళ తెల్లవారుజామున బుల్‌డోజర్లతో కూల్చివేయడంపై విమర్శలు వస్తున్నాయి. తాడేపల్లి మండలం సీతానగరం వద్ద ఉదయం ఐదు గంటల ప్రాంతంలో సీఆర్డీయఏ సిబ్బంది బుల్‌డోజర్లతో దీన్ని కూల్చివేశారు.

ఈ కూల్చివేతపై వైసీపీ మండిపడింది. ఇది ప్రభుత్వ కక్షసాధింపు చర్యేనంటూ మాజీ సీఎం వైఎస్ జగన్ ట్వీట్ చేశారు.

“ఆంధ్రప్రదేశ్‌లో రాజకీయ కక్షసాధింపు చర్యలకు దిగిన చంద్రబాబు తన దమనకాండను స్థాయికి తీసుకెళ్లారు. ఒక నియంతలా తాడేపల్లిలో దాదాపు పూర్తికావొచ్చిన @YSRCParty కేంద్ర కార్యాలయాన్ని బుల్డోజర్లతో కూల్చివేయించారు. హైకోర్టు ఆదేశాలనూ బేఖాతరు చేశారు. రాష్ట్రంలో చట్టం, న్యాయం పూర్తిగా కనుమరుగైపోయాయి. ఎన్నికల తర్వాత చోటుచేసుకుంటున్న హింసాత్మక ఘటనలతో రక్తాన్ని పారిస్తున్న చంద్రబాబు, ఈ ఘటన ద్వారా ఈ ఐదేళ్లపాటు పాలన ఏవిధంగా ఉండబోతుందనే హింసాత్మక సందేశాన్ని ఇవ్వకనే ఇచ్చారు.” అంటూ జగన్ ట్వీట్ లో పేర్కొన్నారు.

అలాగే “ఈ బెదిరింపులకు, ఈ కక్షసాధింపు చర్యలకు @YSRCParty తలొగ్గేది లేదు, వెన్నుచూపేది అంతకన్నా లేదు. ప్రజల తరఫున, ప్రజలకోసం, ప్రజలతోడుగా గట్టిపోరాటాలు చేస్తాం. దేశంలోని ప్రజాస్వామ్య వాదులంతా చంద్రబాబు దుశ్చర్యల్ని ఖండించాలని కోరుతున్నాను.” అంటూ జగన్ ట్వీట్ లో కోరారు. నిర్మాణంలో ఉన్న వైసీపీ కేంద్ర కార్యాలయం కూల్చివేతపై రాష్ట్రవ్యాప్తంగా వైసీపీ నేతలు మండిపడుతున్నారు.

ఆంధ్రప్రదేశ్‌లో రాజకీయ కక్షసాధింపు చర్యలకు దిగిన చంద్రబాబు తన దమనకాండను మరోస్థాయికి తీసుకెళ్లారు. ఒక నియంతలా తాడేపల్లిలో దాదాపు పూర్తికావొచ్చిన @YSRCParty కేంద్ర కార్యాలయాన్ని బుల్డోజర్లతో కూల్చివేయించారు. హైకోర్టు ఆదేశాలనూ బేఖాతరు చేశారు. రాష్ట్రంలో చట్టం, న్యాయం పూర్తిగా…

— YS Jagan Mohan Reddy (@ysjagan) June 22, 2024

వైసీపీ అధికారంలో ఉండగా తాడేపల్లిలోని జలవనరులశాఖకు చెందిన రెండెకరాల స్ధలాన్ని పార్టీ కేంద్ర కార్యాలయం నిర్మాణం కోసం కేటాయిస్తూ ఉత్తర్వులు ఇచ్చింది. ఇందులో నిర్మాణాలు స్లాబ్ దశను కూడా దాటాయి. అయితే ఈ నిర్మాణం కోసం అనుమతి తీసుకోలేదన్న కారణంతో సీఆర్డీయే, జలవనరులశాఖ, ఇతర ప్రభుత్వ శాఖలు సంయుక్తంగా ఇవాళ కూల్చివేతలు చేపట్టాయి. ఇప్పటికే వైసీపీ దీనిపై హైకోర్టును ఆశ్రయించింది.

అమరావతి: అసెంబ్లీలో అత్యంత సీనియర్‌ సభ్యుల్లో అయ్యన్నపాత్రుడు ఒకరని సీఎం చంద్రబాబు అన్నారు. స్పీకర్‌గా అయ్యన్న ఎన్నిక అనంతరం ఆయన మాట్లాడారు. అందరి ఆమోదంతో ఏకగ్రీవంగా ఎన్నిక కావడం సంతోషమన్నారు. ఎన్టీఆర్‌ పిలుపుతో 25 ఏళ్ల వయసులో అయ్యన్నపాత్రుడు రాజకీయాల్లోకి వచ్చారని తెలిపారు. 7 సార్లు ఎమ్మెల్యే, ఒకసారి ఎంపీగా ఎన్నికయ్యారని గుర్తు చేశారు. ఎమ్మెల్యే, ఎంపీ, మంత్రిగా తెలుగు రాష్ట్రాల్లో ప్రత్యేక ముద్ర వేశారని కొనియాడారు. ఏ పదవి ఇచ్చినా వన్నె తెచ్చారని పేర్కొన్నారు.

‘‘66 ఏళ్ల వయసు ఉన్నా అయ్యన్న ఇప్పటికీ ఫైర్‌ బ్రాండే. నీతి, నిజాయతీ, నిబద్ధతను పుణికి పుచ్చుకొని రాజకీయాలు చేశారు. గత ఐదేళ్లుగా ఎన్నో ఇబ్బందులు ఎదుర్కొన్నారు. ఉత్తరాంధ్ర అభివృద్ధికి ఎనలేని కృషి చేశారు. ఆయనపై అనేక పోలీసు స్టేషన్లలో కేసులు పెట్టి వేధించారు. 23 కేసులు పెట్టినా రాజీలేని పోరాటం చేశారు. ఆయన చట్టసభకు రావడం అరుదైన గౌరవం. మనందరిపై పవిత్ర బాధ్యత ఉందని గుర్తుంచుకోవాలి. సమర్థంగా పనిచేస్తే గౌరవం దానంతట అదే వస్తుంది.

ఎంతో పవిత్రమైన అసెంబ్లీని గత ప్రభుత్వం దెబ్బతీసింది. 23 మంది గెలిచి అసెంబ్లీకి వస్తే చాలా ఇబ్బంది పెట్టారు. నా కుటుంబం గురించి ఇష్టానుసారం మాట్లాడారు. మైకు ఇవ్వకుండా చేసి అవమానపరిచారు. సీఎంగానే అసెంబ్లీకి వస్తానని ఆరోజే గట్టిగా చెప్పా. కౌరవ సభకు రాను.. గౌరవ సభకే వస్తానని స్పష్టం చేశా. రాష్ట్రంలోని ఆడపడుచులను అవమానించారు. సోషల్‌మీడియాలో ఇష్టానుసారం పోస్టులు పెట్టారు. ప్రజలు అంతా గమనించి నన్ను గౌరవసభకు పంపారు. భవిష్యత్తులో ఏ ఆడబిడ్డకు అవమానం జరగకుండా చూడాలి. నా గౌరవాన్ని కాపాడిన ప్రజానీకానికి మనస్ఫూర్తిగా ధన్యవాదాలు. మరో జన్మ ఉంటే తెలుగువాడిగానే పుట్టాలి. తెలుగు గడ్డ రుణం తీర్చుకోవాలనేదే నా కోరిక’’

ఎక్కడ తగ్గాలో .. ఎక్కడ గెలవాలో తెలిసిన వ్యక్తి పవన్
‘‘ఆనాడు 23 సీట్లు వస్తే దేవుడు రాసిన స్క్రిప్ట్‌ అని హేళన చేశారు. నేడు కూటమికి 164 సీట్లు వచ్చాయి.. ఇది దేవుడు రాసిన స్క్రిప్ట్‌. పవన్‌ను అసెంబ్లీ గేటు కూడా తాకనీయమని విమర్శించారు. పోటీ చేసిన 21 స్థానాల్లో పార్టీని గెలిపించిన వ్యక్తి పవన్‌. ఎక్కడ తగ్గాలో .. ఎక్కడ గెలవాలో తెలిసిన వ్యక్తి పవన్‌. వైకాపా వైనాట్‌ 175 అని చెప్పి 11 సీట్లు తెచ్చుకున్న పరిస్థితిని చూశాం. నా జీవితంలో ఎప్పుడూ చూడని సభ 15వ శాసన సభ. 15వ శాసనసభను కౌరవసభగా మనం భావించాం. అత్యున్నత, గౌరవప్రదమైన సభగా 16వ సభను తీర్చిదిద్దాలి’’ అని చంద్రబాబు అన్నారు.

రాష్ట్ర ప్రజలు మీ హుందాతనం చూస్తారు..: పవన్‌

‘‘సుదీర్ఘ రాజకీయ అనుభవం ఉన్న వ్యక్తి స్పీకర్‌గా రావడం సంతోషం. ఇన్ని దశాబ్దాల్లో ప్రజలు మీ వాడివేడి చూశారు. ఇన్నాళ్లూ ప్రజలు మీ వాగ్దాటి చూశారు. ఇవాళ్టి నుంచి రాష్ట్ర ప్రజలు మీ హుందాతనం చూస్తారు. గత ప్రభుత్వం వ్యక్తిగత దూషణలతో రాష్ట్ర పురోభివృద్ధిని ఆపేసింది. భాష మనసులను కలపడానికే.. విడగొట్టడానికి కాదు. ఎంత జఠిల సమస్య అయినా చర్చల ద్వారా పరిష్కరించుకోవచ్చు’’ అని ఉప ముఖ్యమంత్రి పవన్‌ కల్యాణ్‌ అన్నారు.

అక్రమ కేసులు పెట్టి వేధించినా భయపడలేదు..

‘‘ఎప్పుడూ ప్రజల గురించి ఆలోచించే వ్యక్తి అయ్యన్న. ఏడుసార్లు ఎమ్మెల్యేగా మీకు చాలా అనుభవం ఉంది. మీ నాయకత్వంలో అనేక మంచి పనులు జరిగాయి. నాకు ఎప్పుడూ సలహా కావాలన్నా మీతో సంప్రదించా. ఒకే పార్టీ.. ప్రజలే అజెండాగా ముందుకెళ్లిన వ్యక్తి అయ్యన్న. అనేక అక్రమ కేసులు పెట్టి వేధించినా ఆయన భయపడలేదు’’ అని మంత్రి నారా లోకేశ్‌ అన్నారు.

ఏపీలో తొలి అసెంబ్లీ సమావేశాలు జరుగుతున్నాయి. రెండు రోజుల పాటు జరుగుతున్న సమావేశాల్లో భాగంగా నిన్న తొలిరోజు సభ్యుల ప్రమాణస్వీకారాలు కొనసాగాయి.

అయితే మరో ముగ్గురు ఎమ్మెల్యేలు వివిధ కారణాలతో అసెంబ్లీ సమావేశాలకు రాలేకపోవడంతో వారితో ఇవాళ ప్రొటెం స్పీకర్ ప్రమాణం చేయించనున్నారు. దీంతో పాటు స్పీకర్ గా ఎన్నికైన చింతకాయల అయ్యన్నపాత్రుడు బాధ్యతలు చేపట్టే కార్యక్రమం కూడా నిర్వహిస్తారు. ఈ నేపథ్యంలో వైసీపీ సభను బాయ్ కాట్ చేసింది.

నిన్న అసెంబ్లీకి హాజరై ఎమ్మెల్యేలుగా ప్రమాణ స్వీకారం చేసిన వైసీపీ ప్రజాప్రతినిధులు ఇవాళ మాత్రం సభకు హాజరు కాకూడదని నిర్ణయం తీసుకున్నారు. మాజీ సీఎం వైఎస్ జగన్ ఇవాళ సొంత నియోజకవర్గం పులివెందులకు వెళ్లాలని నిర్ణయించారు. దీంతో ఎమ్మెల్యేలు కూడా అసెంబ్లీకి హాజరు కావడం లేదు. మరోవైపు ఇవాళ అసెంబ్లీకి గైర్హాజరు కావాలన్న వైసీపీ నిర్ణయం వెనుక రెండు ప్రధాన కారణాలు కనిపిస్తున్నాయి.

ఇందులో ఇప్పటికే తమ పార్టీ అధ్యక్షుడు, మాజీ సీఎం కూడా అయిన వైఎస్ జగన్ పై అనుచిత వ్యాఖ్యలు చేసిన టీడీపీ ఎమ్మెల్యే చింతకాయల అయన్నపాత్రుడును స్పీకర్ గా ఏకగ్రీవంగా ఎన్నుకున్న నేపథ్యంలో.. అసెంబ్లీకి వెళ్లి కూడా తమకు న్యాయం జరగదని వైసీపీ బావిస్తోంది. స్పీకర్ గా అయన్న ఉంటే తమకు న్యాయం జరగదని జగన్ ఇప్పటికే పార్టీ ఎమ్మెల్యేల భేటీలో చెప్పేశారు.

ఇలాంటి వ్యక్తిని స్పీకర్ చేయడమేంటని కూడా ప్రశ్నించారు. అలాగే గతంలో తమ ప్రభుత్వ హయాంలో కేటాయించుకున్న భూముల్లో నిర్మిస్తున్న పార్టీ కేంద్ర కార్యాలయాన్ని ఇవాళ ఉదయం సీఆర్డీయే అధికారులు కూల్చివేయడంపై వైసీపీ ఆగ్రహంగా ఉంది. ఈ నేపథ్యంలో అసెంబ్లీని బాయ్ కాట్ చేస్తోంది.

అమరావతి: ఆనాడు 23 సీట్లు వస్తే దేవుడు రాసిన స్క్రిప్ట్ అని హేళన చేశారని ముఖ్యమంత్రి చంద్రబాబు నాయుడు గుర్తు చేశారు. ఇవాళ కూటమికి 164 సీట్లు వచ్చాయని, ఇది దేవుడు రాసిన స్క్రిప్ట్ అని రీకౌంటర్ ఇచ్చారు.

రెండో రోజు ఎపి శాసన సభ సమావేశాలు ప్రారంభమయ్యాయి. 16వ శాసనసభ స్పీకర్‌గా చింతకాయల అయ్యన్నపాత్రుడిని ఎంఎల్ఎలు ఏకగ్రీవంగా ఎన్నుకున్నారు. ఈ సందర్భంగా చంద్రబాబు నాయుడు శాసన సభలో మాట్లాడారు. ఉప ముఖ్యమంత్రి పవన్ కల్యాణ్‌ను అసెంబ్లీ గేటు కూడా తాకనీయమని విమర్శించారని, ఇవాళ 21 సీట్లలో పోటీ చేసి అన్ని స్థానాలలో గెలిపించిన వ్యక్తి పవన్ అని ప్రశంసించారు.

ఎక్కడ తగ్గాలో.. ఎక్కడ గెలవాలో తెలిసిన వ్యక్తి పవన్ అని కొనియాడారు. వైనాట్ 175 అని చెప్పి 11 తెచ్చుకున్నారని ఎద్దేవా చేశఆరు. తన జీవితంలో ఎప్పుడూ చూడని సభ 15వ శాసన సభ అని, 15వ శాసన సభను కౌరవ సభగా మనం భావించామని చంద్రబాబు ధ్వజమెత్తారు. అత్యున్నత గౌరవప్రదమైన సభగా 16వ సభను మనం తీర్చిదిద్దాలని, ప్రజా జీవితాలను మార్చే శక్తి ప్రభుత్వ విధానాలకు ఉందని, కానీ ఈ సభ ప్రభుత్వ విధానాలను రూపకల్పన చేస్తుందన్నారు. తెలుగు బిడ్డ, మాజీ ప్రధాని పివి నరసింహారావు ఆర్థిక సంస్కరణలు ప్రవేశపెట్టారని, పివి సంస్కరణలు ఆదర్శంగా తీసుకొని అనేక పాలసీలు తీసుకొచ్చామన్నారు.