విద్యా సంవత్సరం మధ్యలో రిటైరైనా ఏడాదంతా కొనసాగించేలా వ్యూహం

ఎన్నికలకు ముందు ఉపాధ్యాయులకు వల

రిటైర్మెంట్‌ ప్రయోజనాలు సకాలంలో ఇచ్చే అవకాశం లేకుండా తప్పించుకునే ఎత్తుగడ

అమరావతి, ఫిబ్రవరి 7(ఆంధ్రజ్యోతి): ఉపాధ్యాయుల పదవీ విరమణ విషయంలో జగన్‌ ప్రభుత్వం కొత్త ఎత్తు వేస్తోంది. సర్వీసు నిబంధనలకు విరుద్ధంగా రిటైర్మెంట్‌ సమయాన్ని మార్చే ఆలోచన చేస్తోంది. తద్వారా వారిని ఎన్నికలకు ముందు మచ్చిక చేసుకోవడం ఒక ఎత్తయితే, రిటైర్మెంట్‌ ప్రయోజనాలను సకాలంలో అందించకుండా జాప్యం చేసే మరో ఎత్తుగడ ఈ వ్యూహం వెనుక దాగి ఉండడం గమనార్హం. వాస్తవానికి ఉపాధ్యాయులైనా, ఉద్యోగులైనా రిటైర్మెంట్‌ అనేది వారి పుట్టిన తేదీ ఆధారంగా ఉంటుంది.

గత ప్రభుత్వంలో 58 ఏళ్ల రిటైర్మెంట్‌ వయసును 60 ఏళ్లు చేస్తే, వైసీపీ ప్రభుత్వం దానిని 62 ఏళ్లకు పెంచింది. అయితే రిటైర్మెంట్‌ వయసు ఏదైనా పుట్టిన తేదీ ఆధారంగా నిర్దేశిత సమయం చేరుకున్నప్పుడు ఆ నెలలోనే రిటైర్‌ అవుతారు. కానీ, వైసీపీ ప్రభుత్వం టీచర్లు రిటైర్‌ అయినా విద్యా సంవత్సరం ముగిసే వరకు కొనసాగించాలని ప్రతిపాదించింది. ఏటా పాఠశాలలకు విద్యా సంవత్సరం జూన్‌లో ప్రారంభమై, ఏప్రిల్‌లో ముగుస్తుంది.
ఈ మధ్య కాలంలో ఎవరైనా టీచర్‌ రిటైర్‌ అయితే, వారిని ఆ విద్యా సంవత్సరం ముగిసే వరకు కొనసాగాలించాలనేది ప్రభుత్వ ఆలోచన. అంటే జూన్‌ నుంచి మార్చి మధ్యలో ఏ నెలలో రిటైర్‌ అయినా ఏప్రిల్‌ వరకు వారు కొనసాగనున్నారు. దీనివల్ల విద్యార్థులకు టీచర్ల కొరత ఉండదని ప్రభుత్వం చెబుతోంది. కానీ, గతంలో ఎప్పుడూ ఇలాంటి విధానం ఎక్కడా అమలుచేయలేదు.

సాధారణంగా విద్యా సంవత్సరం మధ్యలోనూ టీచర్లను బదిలీ చేస్తుంటారు. అప్పుడు కూడా విద్యార్థులకు ఇబ్బంది ఏర్పడుతుంది. అలాగే, ఒక టీచర్‌ రిటైర్‌ అయితే ఆ స్థానంలో కొత్తవారు పాఠాలు చెబుతారు. ఈ ప్రభుత్వంలోనూ ఇదే విధానం ఉంది.

ఇప్పుడు కొత్తగా విద్యార్థుల ఇబ్బంది గుర్తుకొచ్చింది. ఇకపై ఒక్క టీచర్‌ ఖాళీ కూడా ఉండకూడదనే లక్ష్యంతో ఇలా ఆలోచన చేసినట్లు చెబుతోంది. కానీ, గత నాలుగున్నరేళ్లుగా వేల సంఖ్యలో పోస్టులు ఖాళీగా ఉన్నా పట్టించుకోలేదు. 10 వేలకు పైగా పోస్టులు ఖాళీగా ఉంటే భర్తీ చేయకుండా వదిలేసింది.

ఇంతకాలం టీచర్ల కొరత ఉన్నా పట్టించుకోకుండా, ఇప్పుడు రిటైర్మెంట్‌ విధానాన్నే మార్చాలని చూస్తోంది. ఎన్నికలకు ముందు టీచర్లను ఆకర్షించడానికి రాజకీయ కోణంలో ఈ ఆలోచన చేస్తోందనే అభిప్రాయం వ్యక్తమవుతోంది. దీనివల్ల నిరుద్యోగులకు అన్యాయం జరుగుతుంది. అంతేకాదు, ఎప్పటి ఖాళీలు అప్పుడు భర్తీ చేయడంలో ఈ విధానం అడ్డంకిగా మారుతుంది. ఇప్పటికే రిటైర్‌ అయిన వారికి సకాలంలో పదవీ విరమణ ప్రయోజనాలు అందడం లేదని ఉద్యోగ, ఉపాధ్యాయులు గగ్గోలు పెడుతుంటే మళ్లీ ఈ కొత్త విధానాలు ఎందుకని ప్రశ్నిస్తున్నారు. కొత్త ఆలోచనతో ప్రయోజనాలను ఇంకా ఆలస్యం చేసే అవకాశం ప్రభుత్వానికి లభిస్తుంది. ఈ కొత్త విధానం అమల్లోకి వస్తే ఎవరైనా టీచర్‌ జూలైలో రిటైర్‌ అయినా వారికి ఆ తర్వాత ఏడాది ఏప్రిల్‌ వరకు ప్రయోజనాలు అందవు.

AP Elections 2024: ఏపీ ఎన్నికల వేళ పొత్తు రాజకీయాలు ఊపందుకుంటున్నాయి. అధికార వైఎస్సార్ కాంగ్రెస్ పార్టీ ఒంటరిగా బరిలో దిగుతుంటే ప్రతిపక్షపార్టీలు తెలుగుదేశం-జనసేన ఇప్పటికే జతకట్టాయి.
ఇక బీజేపీ కలుస్తుందా లేదా అనేది మరో 4-5 రోజుల్లో తేలిపోనుంది. ఈ క్రమంలో బీజేపీ కొన్ని కండీషన్స్ విధించింది. వాటికి చంద్రబాబు సిద్దంగా ఉన్నారో లేదో తేలాల్సి ఉంది.

ఏపీలో బలంగా పాతుకుపోయున్న వైఎస్ జగన్‌ను ఓడించాలంటే జనసేనతో పాటు బీజేపీ పొత్తు కూడా అవసరమనేది తెలుగుదేశం పార్టీ అధినేత చంద్రబాబు ఆలోచనగా ఉంది. అందుకే బీజేపీ పొత్తు గురించి స్పష్టం చేయకపోయినా వేచి చూస్తోంది. పొత్తులపై త్వరలోనే స్పష్టత రావచ్చని తెలుస్తోంది. తెలుగుదేశం అధినేత చంద్రబాబు ఇవాళ ఢిల్లీ వెళ్తున్నారు. కేంద్ర హోంమంత్రి అమిత్ షా, బీజేపీ ఛీప్ జేపీ నడ్డాతో భేటీ కానున్నారు. ఆంధ్రప్రదేశ్ ఎన్నికల్లో పొత్తులపై చర్చలు జరగనున్నాయి. పొత్తులో భాగంగా బీజేపీకు కేటాయించే ఎంపీ, లోక్‌సభ స్థానాలపై చర్చించనున్నారు. ఇవాళ చంద్రబాబు-అమిత్ షా-జేపీ నడ్డాతో జరిగే చర్చల్లో అంశాలపై ఈ నెల 9వ తేదీన జరిగే బీజేపీ పార్లమెంటరీ బోర్డు సమావేశంలో నిర్ణయం తీసుకోనున్నారు. తెలుగుదేశం-జనసేనతో కలిస్తే బీజేపీ కొన్ని షరతులు విధించనున్నట్టు సమాచారం.

పొత్తులో భాగంగా బీజేపీ 10-15 ఎమ్మెల్యే స్థానాలు, 4-5 ఎంపీ స్థానాలు ఆశిస్తున్నట్టు తెలుస్తోంది. 2014 బీజేపీ 4 అసెంబ్లీ, రెండు పార్లమెంట్ స్థానాలు గెల్చుకుంది. గతంలో గెలిచిన స్థానాలతో పాటు అదనంగా కొన్ని స్థానాలు ఆశిస్తోంది. గతంలో గెలిచిన విశాఖపట్నం, నర్శాపురంతో పాటు రాజమండ్రి, ఏలూరు, కాకినాడ స్థానాల్ని ఆశిస్తోంది. హీనపక్షం 10-12 స్థానాలు, 2-3 ఎంపీ స్థానాలకు తగ్గదని తెలుస్తోంది.

జనసేన-టీడీపీ పొత్తులో భాగంగా ఇప్పటికే జనసేనకు 25 అసెంబ్లీ, 2 పార్లమెంట్ స్థానాలకు తగ్గకుండా కేటాయించాల్సి వస్తుంది. అంటే బీజేపీ-జనసేన రూపంలో 35-37 అసెంబ్లీ, 4-6 ఎంపీ స్థానాలు తెలుగుదేశం పార్టీకు తగ్గిపోతాయి. అంటే తెలుగుదేశం పార్టీ నుంచి టికెట్ ఆశిస్తున్న దాదాపు 40 మందిపై ప్రభావం పడవచ్చు.

ఎన్నికల షెడ్యూల్ విడుదల కానున్న తరుణంలో అధికార పార్టీ అన్ని సామాజిక సమీకరణాలతో అభ్యర్ధుల్ని ప్రకటిస్తున్నప్పుడు తెలుగుదేశం-జనసేన-బీజేపీ పొత్తు పొడిస్తే సమీకరణాలు దాటుకుని టికెట్ కేటాయించడం కష్టం కానుంది.

ప్రస్తుత కాలంలో కెరీర్ పరంగా సక్సెస్ సాధించాలంటే ఎన్నో అవరోధాలను అధిగమించి సత్తా చాటాల్సి ఉంటుంది. ఒకప్పుడు సర్పంచ్ గా పని చేసిన సంతోషలక్ష్మి తన ప్రతిభతో జూనియర్ సివిల్ జడ్జిగా ఎంపికై ప్రశంసలు అందుకుంటున్నారు.
ఏపీలోని శ్రీకాకుళం జిల్లా వజ్రపు కొత్తూరు మండలం నగరంపల్లి గ్రామంలో జన్మించిన కర్రి సంతోషలక్ష్మి ( Karri Santhoshlakshmi )న్యాయమూర్తిగా ఎంపికై ప్రశంసలు అందుకుంటున్నారు.

గ్రామంలో సర్పంచ్ గా సేవలు అందించి ప్రజల అభిమానాన్ని చూరగొన్న సంతోషలక్ష్మి ఆ తర్వాత న్యాయశాస్త్రం చదివారు. ఒకవైపు న్యాయశాస్త్రం చదువుతూనే మరోవైపు న్యాయమూర్తి కావాలనే ఆలోచనతో పోటీ పరీక్షలకు ప్రిపేర్ అయిన సంతోషలక్ష్మి తాజాగా రిలీజైన జూనియర్ సివిల్ జడ్జి పరీక్ష ఫలితాలలో సత్తా చాటారు. ఆమె సివిల్ జడ్జిగా ఎంపిక కావడంతో గ్రామస్తుల సంతోషానికి అవధులు లేకుండా పోయాయి.

భర్త దువ్వాడ వెంకట్ కుమార్ చౌదరి( Duvvada Venkat Kumar Chaudhary ) ప్రోత్సాహం వల్లే కెరీర్ పరంగా సక్సెస్ దక్కిందని ఆమె పేర్కొన్నారు. ఈ తరానికి చెందిన ఎంతోమందికి ఆమె స్పూర్తిగా నిలిచారని చెప్పవచ్చు. సంతోషలక్ష్మి ఐదు సంవత్సరాల పాటు గ్రామానికి సర్పంచ్ గా సేవలు అందించారు. ఆమెకు సంబంధించిన ఫోటోలు సైతం నెట్టింట తెగ వైరల్ అవుతున్నాయి. సంతోషలక్ష్మి సక్సెస్ స్టోరి నెటిజన్లను ఎంతగానో ఆకట్టుకుంటోంది.

భవిష్యత్తులో సంతోషలక్ష్మి మరిన్ని విజయాలను సాధించాలని నెటిజన్ల నుంచి అభిప్రాయాలు వ్యక్తమవుతున్నాయి. సంతోషలక్ష్మి టాలెంట్ కు సామాన్యులు సైతం ఫిదా అవుతున్నారు. చిన్న వయస్సులోనే జూనియర్ సివిల్ జడ్జిగా( Junior Civil Judge ) ఎంపికైన ఆమెను నెటిజన్లు తెగ మెచ్చుకుంటున్నారు. జూనియర్ సివిల్ జడ్జిగా ఎంపికైన సంతోషలక్ష్మిని ఇన్స్పిరేషన్ గా తీసుకుంటే ఈ తరం విద్యార్థినులు సైతం ఎన్నో విజయాలను సొంతం చేసుకునే అవకాశాలు అయితే ఉంటాయని నెటిజన్ల నుంచి కామెంట్లు వ్యక్తమవుతూ ఉండటం గమనార్హం.