ప్రతి ఒక్కరూ సుదీర్ఘమైన, ఆరోగ్యకర జీవితాన్ని గడపాలని కోరుకుంటారు. కానీ నేటి బిజీ లైఫ్స్టైల్, ఒత్తిడి, సరైన ఆహారం తీసుకోకపోవడం, శారీరక శ్రమ లేకపోవడం వంటి కారణాల వల్ల ఆరోగ్యం తీవ్రంగా దెబ్బతింటోంది.
అయితే.. శాస్త్రవేత్తలు, ఆయుర్వేద నిపుణుల అభిప్రాయం ప్రకారం.. మన దైనందిన జీవితంలో కొన్ని చిన్నపాటి మార్పులు చేసుకుంటే.. వృద్ధాప్యం వరకూ వ్యాధులకు దూరంగా ఉంటూ.. ఉల్లాసంగా ఉండవచ్చు. అటువంటి 10 ముఖ్యమైన అలవాట్ల గురించి కొన్ని విషయాలు ఈ ఆర్టికల్లో తెలుసుకుందాం.
వృద్ధాప్యం వరకూ ఆరోగ్యంగా ఉండాలంటే..
ఉదయాన్నేనిద్ర లేవడం: ఆయుర్వేదం ప్రకారం.. ఆరోగ్యవంతమైన జీవితం కోసం సూర్యోదయానికి ముందే నిద్ర లేవడం మంచిది. ఉదయాన్నే లేవడం వల్ల శరీరంలోని జీవ గడియారం సమతుల్యం అవుతుంది. సూర్యుడి తొలి కిరణాలు విటమిన్ డిని అందించి, ఎముకలను బలపరుస్తాయి, రోగనిరోధక శక్తిని పెంచుతాయి.
సమతుల్య ఆహారం: దీర్ఘాయుష్షుకు అతి పెద్ద రహస్యం సరైన పోషకాహారం. ఆహారంలో ప్రోటీన్, విటమిన్లు, ఫైబర్, మినరల్స్ సమతుల్యంగా ఉండేలా చూసుకోవాలి. ప్రాసెస్డ్ ఫుడ్స్, అధిక ఉప్పు, పంచదారకు దూరంగా ఉండాలి. పండ్లు, ఆకుపచ్చ కూరగాయలు యాంటీ ఆక్సిడెంట్లను అందించి.. వృద్ధాప్య ప్రక్రియను నెమ్మదిస్తాయి.
వ్యాయామం: ప్రతిరోజూ 30 నిమిషాలు నడవడం, యోగా, తేలికపాటి వ్యాయామం చేయడం వల్ల గుండె బలంగా, బరువు అదుపులో ఉంటుంది. క్రమం తప్పకుండా వ్యాయామం చేసేవారిలో గుండె జబ్బులు, మధుమేహం వంటివి వచ్చే ప్రమాదం 50% తక్కువగా ఉంటుందని పరిశోధనలు చెబుతున్నాయి.
తగినంత నిద్ర: శరీరం తనను తాను మరమ్మత్తు చేసుకోవడానికి రాత్రికి 7-8 గంటల నాణ్యమైన నిద్ర తప్పనిసరి. నిద్ర లేకపోవడం వల్ల హార్మోన్ల అసమతుల్యత, ఊబకాయం, గుండె జబ్బుల ప్రమాదం పెరుగుతుంది.
ఒత్తిడిని నియంత్రించడం: ఒత్తిడి శారీరక, మానసిక ఆరోగ్యం రెండింటికీ హానికరం. ధ్యానం, సంగీతం వినడం లేదా ప్రకృతిలో గడపడం వంటివి ఒత్తిడిని తగ్గించడానికి సహాయపడతాయి. సంతోషంగా ఉండటం కూడా దీర్ఘాయుష్షుకు ఒక రహస్యం.
నీరు తాగడం: శరీరంలో 70% నీరే ఉంటుంది. ప్రతిరోజూ 8-10 గ్లాసుల నీరు తాగడం వల్ల విషపదార్థాలు బయటకు పోతాయి, జీర్ణవ్యవస్థ బలపడుతుంది.
ధూమపానం, మద్యానికి దూరం: సిగరెట్లు, అధిక మద్యం సేవించడం శరీరానికి విషంతో సమానం. ఇవి ఊపిరితిత్తులు, కాలేయాన్ని దెబ్బతీయడమే కాక, క్యాన్సర్, స్ట్రోక్ వంటి తీవ్రమైన వ్యాధుల ప్రమాదాన్ని పెంచుతాయి.
సామాజిక సంబంధాలు: కుటుంబం, స్నేహితులతో మంచి సంబంధాలు కలిగి ఉండటం వల్ల డిప్రెషన్ దూరమై, మానసిక, శారీరక ఆరోగ్యం మెరుగుపడుతుందని పరిశోధనలు సూచిస్తున్నాయి.
సానుకూల దృక్పథం: మన ఆలోచనలు శరీరంపై ప్రత్యక్ష ప్రభావాన్ని చూపుతాయి. సానుకూల మనస్తత్వం ఉన్నవారు ఒత్తిడిని బాగా ఎదుర్కోగలరు, అనారోగ్యాల నుంచి త్వరగా కోలుకోగలుగుతారు.
ఆరోగ్య పరీక్షలు: ప్రతి సంవత్సరం రక్త పరీక్షలు, రక్తపోటు, షుగర్, కొలెస్ట్రాల్ వంటి పరీక్షలు చేయించుకోవడం చాలా అవసరం. వ్యాధులను ప్రారంభ దశలోనే గుర్తిస్తే చికిత్స సులభతరం అవుతుంది. ఈ పది అలవాట్లను మన దినచర్యలో భాగం చేసుకుంటే..వృద్ధాప్యం వరకూ ఆరోగ్యంగా, ఉల్లాసంగా జీవించవచ్చని నిపుణులు చెబుతున్నారు.
గమనిక:ఈ కథనం ఇంటర్నెట్లో అందుబాటులో ఉన్న సమాచారం ఆధారంగా మాత్రమే ఇచ్చినది.
