దాదాపుగా మనుషులందరిదీ ఒకటే ఆలోచన.. జీవితంలో కావాల్సినంత సంపాదించి, నచ్చినట్టుగా జీవించాలని. ఆ లక్ష్యాన్ని కొందరు త్వరగా చేరుకుంటారు..
మరికొందరు సాధించుకునే ప్రయత్నంలోనే చివరి అంకానికి చేరుకుంటారు. కానీ ఓ యువ వ్యాపారవేత్తకు మాత్రం విచిత్ర పరిస్థితి ఎదురైంది. చిన్న వయసులోనే వేల కోట్ల రూపాయలు సంపాదించేశాడు. ఇప్పుడింక ఏం చేయాలో తెలియట్లేదని అంటున్నాడు (Vinay Hiremath).
భారత సంతతికి చెందిన వినయ్ హిరేమత్ (Vinay Hiremath) టెక్‌ సంస్థ లూమ్‌ను స్థాపించి విజయం సాధించారు. దానిని గత ఏడాది అట్లాసియన్ సంస్థకు అమ్మేశారు. ఆ విక్రయం ద్వారా వినయ్‌కు 975 మిలియన్ డాలర్ల సొమ్ము దక్కింది. అంటే సుమారు రూ.8 వేల కోట్ల పైమాటే. అంత సంపాదించిన ఆయన వయసు 35 ఏళ్ల లోపే. అలాంటి వ్యక్తి కొత్త టెక్నాలజీ గురించి ఆలోచించుకుంటూనో, కుటుంబంతో సరదాగా గడుపుతూనో ఉంటారేమో అనుకుంటాం. కానీ రెండు రోజుల క్రితం ఆయన పెట్టిన పోస్టు మాత్రం ప్రతిఒక్కరినీ ఆశ్చర్యపరుస్తోంది. ”నేను ధనవంతుడినయ్యా.. ఇప్పుడు ఏం చేయాలో తెలియడం లేదు. కావాల్సినంత ఆర్థిక స్వేచ్ఛ ఉన్నా ఓ సందిగ్ధంలో ఉన్నాను. జీవితంపై అంత సానుకూలంగా ఏమీ లేను. ఎవరి సానుభూతి పొందడానికో నేను ఈ పోస్టు పెట్టడం లేదు. అసలు ఏ ఉద్దేశంతో ఈ సందేశం రాస్తున్నానో కూడా నాకు తెలియదు” అంటూ తన బ్లాగ్‌లో రాసుకొచ్చారు.
గత ఏడాది కంపెనీని అమ్మిన తర్వాత వినయ్ (Vinay Hiremath) తన గర్ల్‌ఫ్రెండ్‌తో కలిసి ప్రయాణాలు చేయడం మొదలుపెట్టారట. ఎన్నో ప్రాంతాలు తిరిగేశారు. కానీ తనకున్న అభద్రతాభావం వల్ల ఆమెతో విడిపోయానని అన్నారు. ”ఆమె ఈ పోస్టు చదువుతున్నట్టయితే.. ఈసందర్భంగా సారీ చెప్పాలనుకుంటున్నాను. నీకు కావాల్సినవిధంగా నేను ఉండలేకపోయాను. నీవు అందించిన అనుభూతులకు కృతజ్ఞతలు” అని వెల్లడించారు.
తన సంస్థను కొనుగోలు చేసిన సంస్థలోనే పనిచేసే అవకాశం వచ్చింది. అట్లాసియన్ 60 మిలియన్ డాలర్ల ప్యాకేజీని ఆఫర్ చేసింది. అయితే వినయ్ ఆ అవకాశాన్ని వదులుకున్నారు. రోబోటిక్ సంస్థను స్థాపించాలని చేసిన ప్రయత్నమూ నిరాశే మిగిల్చిందన్నారు. అలాగే ఎలాన్‌ మస్క్‌, వివేక్ రామస్వామి వంటి వారితో పని చేయాలన్న ప్రయత్నమూ ముందుకుసాగలేదన్నారు. ప్రస్తుతం హవాయీ ద్వీపంలో ఫిజిక్స్ నేర్చుకుంటున్నారు. దానికి సంబంధించిన అంశాలపై దృష్టిసారించారు. కానీ ఈయన పెట్టిన పోస్టు మాత్రం చర్చనీయాంశంగా మారింది.
