భక్తులకు త్వరితగతిన శ్రీవారి దర్శనం అయ్యేందుకు తితిదే చర్యలు చేపడుతోంది. ఇందుకు సాంకేతికత వినియోగమే ఉత్తమమార్గమని ముఖ్యమంత్రి చంద్రబాబు సూచించిన నేపథ్యంలో గూగుల్‌తో ఒప్పందానికి తితిదే సిద్ధమవుతోంది. కృత్రిమ మేధ(ఏఐ)ను ఉచితంగా అందించడానికి ఆ సంస్థ ముందుకొచ్చింది. వారం, పది రోజుల్లో తితిదే-గూగుల్ మధ్య అవగాహన ఒప్పందం(ఎంవోయూ) కుదరనుంది. తర్వాత గూగుల్ అధికారులు క్షేత్రస్థాయిలో పర్యటించి కసరత్తు పూర్తిచేస్తారు. ప్రయోగాత్మకంగా తిరుమలలో ఏఐని వాడతారు. ఎదురైన అనుభవాలను దృష్టిలో ఉంచుకుని మార్పులు చేర్పులు చేస్తారు. ప్రస్తుతం కొన్ని దేవస్థానాలు ఏఐని వినియోగిస్తున్నా భక్తులకు సమాచారం అందించడానికే పరిమితమయ్యాయి.
తితిదే ఇందుకు భిన్నంగా దర్శనాలతోపాటు వసతి, వివిధ సేవల కోసమూ గూగుల్ సాయం తీసుకోనుంది. ఏ సమయంలో, ఏ సీజన్‌లో ఎక్కువ మంది భక్తులు వస్తున్నారు? అనే సమాచారమూ తితిదేకి వస్తుంది. తదనుగుణంగా భవిష్యత్తులో సమస్యలు తలెత్తకుండా ఏర్పాట్లు చేసుకోవచ్చు. దర్శన విధివిధానాలు, వస్త్రధారణ, స్థానికంగా అనుసరించాల్సిన నియమాల గురించి ఏఐ సాయంతో యాత్రికులూ తెలుసుకోవచ్చు. దేశవిదేశాల నుంచి భక్తులు వస్తున్న నేపథ్యంలో సౌలభ్యం కోసం వారి స్థానిక భాషల్లోనే సమాచారం అందించనున్నారు.
ఎప్పటికప్పుడు రద్దీ తెలుసుకుంటూ
మరోవైపు గూగుల్ మ్యాప్‌ల ద్వారా ఎప్పటికప్పుడు పలుచోట్ల రద్దీ గురించి భక్తులు సులభంగా తెలుసుకోవచ్చు. సామాన్యులు ఎక్కువగా గదుల కోసం వచ్చే కేంద్రీయ విచారణ కార్యాలయం(సీఆర్వో), ఆరోగ్య కేంద్రాలు, అన్న ప్రసాద కేంద్రం, కల్యాణకట్ట వద్ద రద్దీ ఎలాఉందో ఎవరినీ అడగకుండా ఫోన్‌ ద్వారానే సమాచారం రాబట్టవచ్చు. ఫోన్‌లకే నోటిఫికేషన్లు వస్తాయి. ఈ సమాచారం తితిదేకి కూడా ఎంతో ఉపయుక్తంగా ఉంటుంది. క్యూ లైన్ల నియంత్రణ, షెడ్లలో ఎక్కువ సమయం భక్తులు నిరీక్షించకుండా ఉండేందుకూ తోడ్పడుతుంది.
రద్దీ నియంత్రణ చర్యలు వేగంగా చేపట్టవచ్చు. ఏఐ కెమెరాలను తిరుమలలో గూగుల్ ఏర్పాటు చేయనుంది. తద్వారా అనుమానితులు, నిందితులైన వ్యక్తులు ఎవరైనా సంచరిస్తున్నారా? అన్నదీ పోలీసులు, విజిలెన్స్‌ సిబ్బందికి తెలుస్తుంది. వారిపై నిఘా ఉంచుతారు. నిందితుల ఫొటోలూ నిక్షిప్తంగా ఉంటాయి. ఏఐ సాంకేతికత ద్వారా దళారులకూ అడ్డుకట్ట వేయవచ్చు. ఫలితంగా మోసపోయే భక్తుల సంఖ్యా తగ్గడం ఖాయం.
ప్రతి ఒక్కరికీ ఐడీ
గూగుల్ కృత్రిమ మేధ ప్రాజెక్టు విజయవంతమైతే ఒక్కో భక్తుడికి ఒక్కో ప్రత్యేక శాశ్వత ఐడీ వస్తుంది. భవిష్యత్తులో ఆ వ్యక్తి.. ఆ ఐడీ ద్వారానే దర్శనం, సేవలు, గదుల బుకింగ్‌ చేసుకోవాల్సి ఉంటుంది. ఎవరు ఎన్నిసార్లు శ్రీవారి దర్శనానికి వచ్చారు? ఎన్ని గదులు తీసుకున్నారు? అన్న సమస్త సమాచారమూ తితిదేకి తెలుస్తుంది.
తిరుమలలో భక్తులకు ఎలాంటి ఇబ్బందులు తలెత్తినా ఏ సమయంలోనైనా విన్నవించవచ్చు.
వారి అభిప్రాయాలు, సూచనలు, సలహాలు అందించే అవకాశమూ ఉంది.
సామాన్య భక్తులు తిరుమలలో ఎలాంటి ఇబ్బందీ పడకూడదని సీఎం చంద్రబాబు ఆదేశించారు. ఆయన సూచనలకు అనుగుణంగానే గూగుల్‌తో ఒప్పందానికి కసరత్తు చేస్తున్నాం. కృత్రిమ మేధను వినియోగించి తక్కువ సమయంలో దర్శనం, గదుల కేటాయింపు చేయించాలన్నది మా లక్ష్యం. తొలుత పైలట్‌ ప్రాజెక్టుగా అధ్యయనం చేసి ఆచరణలో ఎదురయ్యే సమస్యలు తెలుసుకుంటాం. వాటిని సరిదిద్ది ప్రభుత్వ ఆదేశాల మేరకు పూర్తిస్థాయిలో అమలు చేస్తాం.
