చాలా మంది చేసే సాధారణమైన హెచ్చరిక.. చక్కెర ఎక్కువగా తింటే డయాబెటిస్ వస్తుంది అని. కానీ చక్కెర డయాబెటిస్ను కలిగించదని పలువురు వైద్య నిపుణులు చెబుతున్నారు.
నిజానికి డయాబెటిస్ వ్యాధికి కారణం అయిన విషయాలు వేరే ఉన్నాయని అంటున్నారు. ఈ సందర్భంగా పలువురు వైద్య నిపుణులు మాట్లాడుతూ.. జన్యుశాస్త్రం, జీవనశైలి, స్క్రీన్ సమయం అనేది ఇన్సులిన్ను ప్రభావితం చేస్తాయని వెల్లడించారు. పిల్లలు ఎక్కువగా చాక్లెట్లు తినడం వల్ల కాదు కానీ, వారు తక్కువగా శరీరాన్ని కదపడం, ఎక్కువగా స్నాక్స్ తినడం, ప్రమాద కారకాలను వారసత్వంగా పొందడం వల్ల డయాబెటిస్ కేసులు దేశంలో పెరుగుతున్నాయని వెల్లడించారు.
డయాబెటిస్ అనేది పెద్దలలోనే కాదు, పిల్లలలో కూడా ఈ రోజుల్లో ఒక సాధారణ సమస్యగా మారిందని చెబుతున్నారు. వాస్తవానికి ఈ రోజుల్లో చాలా మంది చిన్నారులు ఈ వ్యాధితో పోరాడుతున్నారని, నిశ్శబ్దంగా ఈ వ్యాధితో బాధపడుతున్నారని చెబుతున్నారు. తల్లిదండ్రులు “డయాబెటిస్” అనే పదాన్ని విన్నప్పుడు, వాళ్లకు మొదట గుర్తుకు వచ్చేది చక్కెర. కానీ వాస్తవానికి ఈ వ్యాధి స్వీట్లు తినడం కారణంగానే రాదని పలువురు వైద్య నిపుణులు చెబుతున్నారు. వాస్తవానికి “నేటి పిల్లలు ఇంట్లోనే గాడ్జెట్లతో ఎక్కువ సమయం గడుపుతున్నారు, తక్కువ కదలుతున్నారు, తరచుగా అధిక కేలరీలు, తక్కువ పోషకాలు కలిగిన ఆహారాన్ని తింటున్నారు. ఈ క్రమంలో శరీరం ఇన్సులిన్ను సమర్థవంతంగా ఉపయోగించనప్పుడు ఇన్సులిన్ నిరోధకత ప్రమాదాన్ని పెంచుతుంది. కాబట్టి తల్లిదండ్రులు పిల్లలలో మధుమేహం హెచ్చరిక సంకేతాలను అర్థం చేసుకోవాలి. తద్వారా దీనిని ముందుగానే నివారించవచ్చు” అని వైద్యులు చెబుతున్నారు. కింద పేర్కొన్న అంశాలపై తల్లిదండ్రులు అవగాహన కలిగి ఉండాలని నిపుణులు సూచించారు.
చక్కెర తినడం వల్ల డయాబెటిస్ వస్తుంది: చాలా మంది తల్లిదండ్రులు కేవలం స్వీట్లు తినడం వల్ల డయాబెటిస్ వస్తుందని నమ్ముతారు. వాస్తవానికి రోగనిరోధక వ్యవస్థ పొరపాటున క్లోమంలోని ఇన్సులిన్ ఉత్పత్తి చేసే కణాలపై దాడి చేసినప్పుడు టైప్ 1 డయాబెటిస్ వస్తుంది. దీనికి చక్కెర తీసుకోవడంతో సంబంధం లేదని వైద్య నిపుణులు చెబుతున్నారు. ఈ వ్యాధికి జన్యుశాస్త్రం, కుటుంబ చరిత్ర వంటి ఇతర అంశాలు కూడా కారణమవుతాయని అన్నారు.
పెద్దలకు మాత్రమే డయాబెటిస్ వస్తుంది: ఒకప్పుడు పెద్దవారిలో మాత్రమే కనిపించే టైప్ 2 డయాబెటిస్, ఇప్పుడు పిల్లలలో సరైన ఆహారం తీసుకోకపోవడం, వ్యాయామం చేయకపోవడం, ఊబకాయం కారణంగా పెరుగుతోంది. ఎక్కువ గంటలు స్క్రీన్ సమయం, ప్రాసెస్ చేసిన ఆహారం, చక్కెర పానీయాలు అతిగా తీసుకోవడం కారణంగా చిన్నారులలో ఈ ప్రమాదాన్ని పెంచుతాయని వెల్లడించారు. డయాబెటిస్ ఉన్న పిల్లలు మితంగా తినవలసి ఉంటుందని అన్నారు. అయితే తల్లిదండ్రులు పిల్లలు తినే పరిమాణాన్ని గమనించాలని, ఇందులో ముఖ్యమైనది ఏమిటంటే పిల్లలు మితంగా తినేలా చూసుకోవాలని, అందులో కూడా ఫైబర్, తృణధాన్యాలు, పండ్లు, కూరగాయలు అధికంగా ఉండే ఆరోగ్యకరమైన భోజనాన్ని వారికి అందించాలని చెబుతున్నారు.
ఈ చిట్కాలతో సమస్యను దూరం చేసుకోవచ్చు..
చిన్నారుల్లో స్క్రీన్ సమయాన్ని పరిమితం చేయాలని అన్నారు. ఎలక్ట్రానిక్స్కు బదులుగా ఆటలు లేదా శారీరక శ్రమను ప్రోత్సహించాలని చెప్పారు. రోజువారీ స్క్రీన్ వాడకాన్ని తగ్గించడం వల్ల జీవక్రియ ప్రమాదాన్ని తగ్గించవచ్చని నిపుణులు సూచించారు. పిల్లల్లో క్రమం తప్పకుండా వ్యాయామాన్ని ప్రోత్సహించాలని అన్నారు. క్రీడల నుంచి సాధారణ ఆటల వరకు ప్రతిరోజూ కనీసం 60 నిమిషాల కార్యాచరణను లక్ష్యంగా నిర్దేశించాలని చెప్పారు. పిల్లలు తీసుకునే ఆహార నాణ్యతపై దృష్టి పెట్టాలని సూచించారు. పిల్లలకు చక్కెర పానీయాలకు బదులుగా కూరగాయలు, తృణధాన్యాలు, లీన్ ప్రోటీన్లు, నీరు వంటి తృణధాన్యాల ఆహారాలకు ఎక్కువగా ప్రాధాన్యత ఇవ్వాలని అన్నారు. కుటుంబంలో ఎవరికైనా మధుమేహ చరిత్ర ఉంటే, పిల్లలకు క్రమం తప్పకుండా రక్తంలో చక్కెర పరీక్షలు చేయించడం, అధిక దాహం లేదా వివరించలేని బరువు తగ్గడం వంటి లక్షణాలను నిత్యం గమనించాలని అన్నారు.
