ప్రముఖ బిలియనీర్, టెస్లా సీఈవో ఎలాన్ మస్క్ రాజకీయాల్లోకి ఎంట్రీ ఇస్తున్నారు. ”అమెరికా పార్టీ” పేరుతో కొత్త రాజకీయ పార్టీని ఏర్పాటు చేస్తున్నట్లు ఎలాన్ మస్క్ ప్రకటించారు.
అమెరికా అధ్యక్షుడు డొనాల్డ్ ట్రంప్, ఎలాన్ మస్క్ల మధ్య వివాదం తర్వాత ఈ ప్రకటన వెలువడింది. కొత్త పార్టీ ఏర్పాటుపై మస్క్ ఎక్స్ లో పోస్టు చేశారు. అమెరికా ప్రజలకు స్వేచ్ఛను తిరిగి ఇవ్వడానికి అమెరికా పార్టీని ఏర్పాటు చేస్తున్నట్టుగా హామీ ఇచ్చారు.
వివరాలు.. ప్రపంచంలోనే అత్యంత ధనవంతులలో ఒకరిగా ఉన్న ఎలాన్ మస్క్ గతేడాది జరిగిన అమెరికా అధ్యక్ష ఎన్నికల్లో డొనాల్డ్ ట్రంప్నకు మద్దతుగా నిలిచారు. ఈ క్రమంలోనే ఆయనకు సన్నిహితుడిగా మారారు. దీంతో అమెరికా అధ్యక్షుడిగా ట్రంప్ బాధ్యతలు చేపట్టిన తర్వాత ఎలాన్ మస్క్ కీలక సలహాదారుగా వ్యవహరించారు. ట్రంప్ పాలనలో ప్రభుత్వ సామర్థ్య విభాగం (డీవోజీఈ) కింద ఖర్చు తగ్గించే ప్రయత్నానికి ఎలాన్ మస్క్ నాయకత్వం వహించారు. అయితే గత కొంతకాలంగా ట్రంప్ తీసుకుంటున్న నిర్ణయాలపై ఎలాన్ మస్క్ అసంతృప్తి వ్యక్తం చేశారు. పన్నులు, వ్యయాలకు సంబంధించి ట్రంప్ తీసుకొచ్చిన One Big Beautiful Billను తీవ్రంగా తప్పుపట్టారు. ఈ క్రమంలోనే మే నెల చివరిలో ట్రంప్ పరిపాలన నుంచి వైదొలుగుతున్నట్టుగా ఎలాన్ మస్క్ అధికారికంగా ప్రకటన చేశారు.
అయితే అమెరికాలో బిగ్ బ్యూటిఫుల్ బిల్లు చట్టంగా మారితే తాను రాజకీయ పార్టీని ఏర్పాటు చేస్తానని ఇటీవల ఎలాన్ మస్క్ చెప్పిన విషయం తెలిసిందే. తాజాగా బిగ్ బ్యూటిఫుల్ బిల్లుపై సంతకం చేయడంతో అది చట్టంగా మారింది. ఈక్రమంలో ముందుగా చెప్పినట్టుగా ఎలాన్ మస్క్ రాజకీయ పార్టీ ఏర్పాటుపై ప్రకటన చేశారు. అయితే ఈ ప్రకటనకు ముందు ట్రంప్ ఆన్లైన్లో ఒక పోల్ నిర్వహించారు.
జూలై 4న జరిగిన అమెరికా స్వాతంత్ర్య దినోత్సవ వేడుకల సందర్భంగా ఎలాన్ మస్క్ తన ఎక్స్లో పోల్ను పోస్టు చేశారు. ”మీరు రెండు పార్టీల (కొందరు ఒకే పార్టీ అని చెబుతారు) వ్యవస్థ నుంచి స్వాతంత్ర్యం కోరుకుంటున్నారా అని మిమ్మల్ని అడగడానికి స్వాతంత్ర్య దినోత్సవం సరైన సమయం! మనం అమెరికా పార్టీని ఏర్పాటు చేయాలా?” అని ఎలాన్ మస్క్ ఆ పోల్లో ప్రజలను అడిగారు. అయితే ఈ పోల్ స్పందించిన ఎక్స్ యూజర్లలో 65.4 శాతం మంది ”అవును” అని ఓటు వేయగా, 34.6 శాతం మంది ”లేదు” అని ఓటు వేశారు.
అయితే ఈ మద్దతుపై మస్క్ స్పందిస్తూ… ఇది తనకు చోదక శక్తి అని పేర్కొన్నారు. అమెరికా పార్టీ ఏర్పాటును ప్రకటించిన మస్క్… ”మీకు కొత్త రాజకీయ పార్టీ కావాలి… ఇప్పుడు మీకు అది లభిస్తుంది! వ్యర్థాలు, అవినీతితో మన దేశాన్ని దివాలా తీయిస్తున్న విషయానికి వస్తే… మనం ప్రజాస్వామ్యంలో కాకుండా ఏక-పార్టీ వ్యవస్థలో జీవిస్తున్నాము. ఈ రోజు, అమెరికా పార్టీ మీకు మీ స్వేచ్ఛను తిరిగి ఇవ్వడానికి ఏర్పడింది” అని ఎలాన్ మస్క్ తన ఎక్స్ పోస్టులో పేర్కొన్నారు.
