సాధారణంగా మనం గూగుల్ మ్యాప్స్ను రూట్ తెలుసుకునేందుకు వాడుతుంటాం. అయితే ఇప్పుడు అందులోంచి టిక్కెట్ కూడా బుక్ చేసుకోవచ్చని తెలుసా? ఎస్.. ఇది నిజం.
గూగుల్ మ్యాప్స్లో ఓ ప్లేస్ నుంచి మరో ప్లేస్కు వెళ్లేందుకు సెర్చ్ చేస్తే.. ఆ రూట్లో తిరిగే ఆర్టీసీ రిజర్వేషన్ సదుపాయం ఉన్న బస్సుల వివరాలు కనిపిస్తాయి. అందులో మీకు కావాల్సిన బస్సును ఎంచుకొని టికెట్ బుక్ చేసుకునే అవకాశం అందుబాటులోకి రానుంది. ఈ మేరకు ఏపీఎస్ఆర్టీసీ పలు వివరాలను గూగుల్కు అందజేసింది. ఇప్పటికే ఆర్టీసీలో బస్టాండ్లలోని కౌంటర్లు, ఏజెంట్లు, వెబ్సైట్, యాప్లో రిజర్వేషన్ చేసుకునే సదుపాయం ఉంది. ఇప్పుడు కొత్తగా గూగుల్ మ్యాప్స్ ద్వారా కూడా రిజర్వేషన్ చేసుకోవచ్చు.
ఎలా చేసుకోవాలి..?
గూగుల్ మ్యాప్స్లో విజయవాడ నుంచి హైదరాబాద్ అని టైప్ చేస్తే.. వీటి మధ్య దూరం ఎంత, బైక్, కారు, బస్, రైళ్లలో ప్రయాణించడానికి ఎంత సమయం పడుతుందనే వివరాలు జనరల్ ట్రాన్సిట్ స్పీడ్ స్పెసిఫికేషన్ (జీటీఎస్ఎఫ్) ద్వారా కనిపిస్తాయి. అందులో బస్ సింబల్ ఉన్నచోట క్లిక్ చేస్తే విజయవాడ నుంచి హైదరాబాద్కి ఎన్ని ఆర్టీసీ బస్సులు అందుబాటులో ఉన్నాయి, అవి ఏ సమయాల్లో బయలుదేరతాయి? ఎన్ని గంటల్లో చేరుకుంటాయనే వివరాలు కనిపిస్తాయి. మీకు అనుకూలమైన సమయానికి ఉన్న బస్సుపై క్లిక్ చేస్తే నేరుగా ఆర్టీసీ వెబ్సైట్లోకి తీసుకెళ్తుంది. అక్కడ మీరు రిజర్వేషన్ చేసుకోవచ్చు. ఆన్లైన్ ద్వారా పేమెంట్ చేయవచ్చు.
ఆర్టీసీ అధికారులు, గూగుల్ ప్రతినిధులతో చర్చించి ప్రయోగాత్మకంగా విజయవాడ- హైదరాబాద్ మార్గంలో దీనిని అమలు చేశారు. కొద్ది రోజులపాటు దీనిని పరిశీలించగా విజయవంతంగా బుకింగ్స్ జరిగాయి. ఇదంతా మూడు నెలల కిందట పూర్తయింది. దీంతో ఆర్టీసీ రిజర్వేషన్ సదుపాయమున్న ఏసీ, సూపర్ లగ్జరీ, డీలక్స్ సర్వీసులు ఏయే రూట్లలో తిరుగుతాయో వాటి వివరాలను గూగుల్కు అందజేశారు. గూగుల్ ఆయా రూట్లలో బస్టాప్ల వారీగా లాటిట్యూడ్, లాంగిట్యూడ్ వంటివన్నీ ఆడిట్ టెస్ట్ జరిపి, మూడు రోజుల కిందట ఆమోదం తెలిపింది. వారంలో అన్ని రూట్లలో గూగుల్ మ్యాప్స్ ద్వారా బస్ టికెట్ల బుకింగ్కు అవకాశం కల్పించనున్నారు.
