వీడీఏ (వేరియెబుల్ డియర్నెస్ అలొవెన్స్)ని పెంచుతున్నట్టు కేంద్రం ప్రకటించింది. 2024 అక్టోబర్ 1న ఈ నిర్ణయం అమల్లోకి వస్తుందని స్పష్టం చేసింది. ఫలితంగా అసంఘటిత సెక్టార్లో పనిచేసే లక్షలాది మంది కార్మికులకు లబ్ధిచేకూరనుంది.
పండగ సీజన్ నేపథ్యంలో అసంఘటిత సెక్టార్లోని ఉద్యోగులకు కేంద్ర ప్రభుత్వం తీపి కబురును అందించింది. పెరుగుతున్న ఖర్చులను దృష్టిలో పెట్టుకుని వీడీఏ (వేరియెబుల్ డియర్నెస్ అలొవెన్స్)ని పెంచుతున్నట్టు ప్రకటించింది. 2024 అక్టోబర్ 1న ఈ నిర్ణయం అమల్లోకి వస్తుందని స్పష్టం చేసింది. కేంద్ర ప్రభుత్వ తాజా చర్యల కారణంగా లక్షలాది మంది కార్మికుల కనీస వేతనం పెరగనుంది.
వీడీఏ పెంపు..
ఈ వీడిఏ పెంపుతో భవన నిర్మాణం, లోడింగ్-అన్లోడింగ్, పారిశుద్ధ్యం, హౌస్కీపింగ్, మైనింగ్, వ్యవసాయ రంగాల్లోని వర్కర్లు లబ్ధిపొందనున్నారు.
ఈ తరహా రంగాల్లో కనీస వేతనం అనేది స్కిల్ లెవల్స్పై ఆధారపడి ఉంటుంది. అన్స్కిల్డ్, సెమీ స్కిల్డ్, స్కిల్డ్, హై-స్కిల్డ్తో పాటు ఏ,బీ,సీ అంటూ భౌగోళిక ప్రాంతాలకూ కెటగిరీలు ఉంటాయి.
తాజా వీడీఏ పెంపుతో ఏరియా ‘ఏ’లోని అన్స్కిల్డ్ సెక్టార్ (నిర్మాణం, క్లీనింగ్)లో పనిచేసే వారికి రోజుకు కనీస వేతం రూ. 783గా ఉంటుంది. నెలవారీగా ఇది రూ. 20,358. సెమీ-స్కిల్డ్ వర్కర్లకు రోజుకు రూ. 864, నెలకు రూ. 22,568 లభిస్తుంది. వేరియెబుల్ డియర్నెస్ అలొవెన్స్ పెంపుతో స్కిల్డ్ వర్కర్లకు అక్టోబర్ 1 నుంచి రోజుకు రూ. 954,అంటే నెలకు రూ. 24,804 లభిస్తుంది. హై-స్కీల్డ్ వర్కర్లకు రోజుకు రూ. 1035, మొత్తం మీద నెలకు రూ. 26,910 జీతం అందుతుంది.
2024లో వర్కర్ల జీతాల సవరణ ఇది రెండోసారి. ఏప్రిల్లో ఒకసారి అప్డేట్ అయ్యింది. పరిశ్రమ వర్కరల కోసం సీపీఐని దృష్టిలో పెట్టుకుని ప్రతియేటా రెండుసార్లు వీడీఏని ప్రభుత్వం సవరిస్తుంది.
వేతన పెంపుతో పాటు ఇతర వివరాలను చీఫ్ లేబర్ కమిషన్ వెబ్సైట్ clc.gov.in లో చూడవచ్చు.
డీఏ పెంపు పరిస్థితేంటి..?
మరోవైపు డీఏ పెంపు (డియర్నెస్ అలొవెన్స్) వార్త కోసం కేంద్ర ప్రభుత్వ ఉద్యోగులు, పింఛనుదారులకు ఎదురుచూస్తున్నారు. 7వ పే కమిషన్ ఆధారంగా ఉండే డీఏ, డీఆర్ (డియర్నెస్ రిలీఫ్) పెంపుపై కేంద్రం త్వరలోనే ఓ ప్రకటన విడుదల చేయనుందని ఇటీవలే సమాచారం వచ్చింది.
ప్రభుత్వ ఉద్యోగుల డీఏని ప్రతియేటా రెండుసార్లు (జనవరి, జులై) సవరిస్తుంది కేంద్రం. అనంతర నెలల్లో వీటిపై ప్రకటనలు వెలువడతాయి. పండుగ సీజన్ కూడా సమీపిస్తుండటంతో ఈ ఏడాది రెండో డీఏ పెంపుపై త్వరలోనే ప్రకటన వచ్చే అవకాశం ఉంది. వాస్తవానికి సెప్టెంబర్ నెలలోనే ఓ ప్రకటన వస్తుందని అంచనాలు వెలువడ్డాయి. కానీ ఇప్పటివరకు ఇంకా ఎలాంటి ప్రకటన బయటకు రాలేదు. డీఏ పెంపు ప్రకటన ఎప్పుడు వచ్చినా, దాని అమలు మాత్రం 2024 జులై నుంచే ఉంటుంది. ఫలితంగా 7వ పే కమిషన్ సిఫార్సుల ఆధారంగా ఉండే డీఏ పెంపుతో లక్షలాది మంది ప్రభుత్వ ఉద్యోగులు, పింఛనుదారులకు లబ్ధిచేకూరనుంది.
ఈ ఏడాది ఇప్పటికే ఒకసారి డీఏ పెంపు జరిగింది. ఈ ఏడాది 2024 మార్చ్లో కేంద్రం డీఏని పెంచింది. ఇది జనవరి 1 నుంచి అమల్లోకి వచ్చింది. ఆయా నెలలకు ఏరియర్స్ పడతాయి
