స్టేట్ బ్యాంక్ ఆఫ్ ఇండియా ఖాతాదారులను లక్ష్యంగా చేసుకుని సైబర్ నేరగాళ్లు కొత్త రకం దోపిడీకి తెరలేపారు. వాట్సాప్, సోషల్ మీడియా వేదికల ద్వారా ఒక ప్రమాదకరమైన సందేశం వైరల్ అవుతోంది.
మీ ఆధార్ వివరాలను వెంటనే అప్డేట్ చేయాలని, లేదంటే యోనో (YONO) యాప్ నిలిచిపోతుందని ఆ మెసేజ్ హెచ్చరిస్తోంది. దీని కోసం ఒక ఏపీకే (APK) ఫైల్ను డౌన్లోడ్ చేసి ఇన్స్టాల్ చేసుకోవాలని వారు సూచిస్తున్నారు. ఈ వార్తతో ఆందోళన చెందిన వినియోగదారులు నిజానిజాలు తెలుసుకునే ప్రయత్నం చేయగా, ప్రభుత్వ అధికారిక సంస్థ పిఐబి (PIB) రంగంలోకి దిగి ఇది ముమ్మాటికీ నకిలీ సమాచారమని తేల్చి చెప్పింది.
హ్యాకర్లు పంపే ఈ ఏపీకే ఫైల్స్ చాలా ప్రమాదకరమైనవి. వీటిని ఫోన్లో ఇన్స్టాల్ చేసిన వెంటనే అవి మీ వ్యక్తిగత సమాచారాన్ని దొంగిలిస్తాయి. ముఖ్యంగా కెమెరా, మైక్రోఫోన్, ఎస్ఎమ్ఎస్ (SMS) వంటి వాటిని నియంత్రించే అనుమతులను మనం తెలియకుండానే ఇచ్చేస్తాం. దీనివల్ల మనకు వచ్చే ఓటీపీలు నేరుగా నేరగాళ్లకు కనిపిస్తాయి. బ్యాంక్ ఖాతా వివరాలు, పాస్వర్డ్లు వారి చేతుల్లోకి వెళ్లడం వల్ల సెకన్ల వ్యవధిలోనే మన సొమ్ము మాయం అవుతుంది. ఇలాంటి లింక్స్పై క్లిక్ చేయడం అంటే దొంగలను మన ఇంట్లోకి ఆహ్వానించడమే అని నిపుణులు హెచ్చరిస్తున్నారు.
పర్సనల్ ఫైనాన్స్, ఇన్వెస్ట్మెంట్స్, మ్యూచువల్ ఫండ్స్ లేదా మనీ సేవింగ్ టిప్స్ గురించి ప్రశ్నలు, సందేహాలు ఉన్నాయా? మీ ప్రశ్నను ఇక్కడ సబ్మిట్ చేయండి. ఫైనాన్స్ ఎక్స్పర్ట్స్ నుండి సమాధానాలు పొందొచ్చు. ఎంపిక చేసిన ప్రశ్నలకు సమాధానాలను మా వెబ్సైట్లో ఆర్టికల్స్ రూపంలో మరుసటి రోజు చూడొచ్చు.
ఈ వ్యవహారంపై స్టేట్ బ్యాంక్ ఆఫ్ ఇండియా తీవ్రంగా స్పందించింది. తమ బ్యాంక్ ఎప్పుడూ ఎస్ఎమ్ఎస్ లేదా వాట్సాప్ ద్వారా యాప్లను డౌన్లోడ్ చేయమని కోరదు. ఆధార్ వివరాల అప్డేట్ కోసం ఎలాంటి లింకులు పంపదు. కేవలం ప్లే స్టోర్ లేదా యాప్ స్టోర్ వంటి అధికారిక వేదికల నుండి మాత్రమే బ్యాంకు యాప్లను డౌన్లోడ్ చేసుకోవాలి. నకిలీ లింకులు క్లిక్ చేసి ఆర్థికంగా నష్టపోవద్దని తన ఖాతాదారులకు సూచించింది. ఏదైనా సందేహం ఉంటే నేరుగా బ్యాంక్ శాఖను సంప్రదించడం ఉత్తమ మార్గం.
ఫిషింగ్ మోసాల నుండి తప్పించుకోవడానికి ప్రజలు కొన్ని జాగ్రత్తలు పాటించాలి. తెలియని వ్యక్తుల నుండి వచ్చే ఈమెయిల్ అటాచ్మెంట్లు లేదా మెసేజ్ లింక్లను అసలు తెరవకూడదు. పంపిన సందేశంలో అక్షర దోషాలు ఉన్నాయా లేదా అని గమనించాలి. వెబ్సైట్ అడ్రస్ సరిగ్గా ఉందో లేదో తనిఖీ చేయడం అవసరం. బ్యాంకులు ఎప్పుడూ వ్యక్తిగత రహస్య సమాచారాన్ని అడగవనే విషయాన్ని గుర్తుంచుకోవాలి. అధిక లాభాలు వస్తాయని లేదా ఖాతా మూతపడుతుందని బెదిరించే సందేశాల పట్ల మరింత అప్రమత్తంగా ఉండాలి.
ఒకవేళ మీరు ఇప్పటికే ఇలాంటి మోసపూరిత లింకులు అందుకుంటే వెంటనే పోలీసులకు సమాచారం ఇవ్వాలి. సైబర్ క్రైమ్ హెల్ప్లైన్ నంబర్ 1930 కు ఫోన్ చేసి ఫిర్యాదు చేయవచ్చు. అలాగే ఎస్బిఐ వారి అధికారిక ఈమెయిల్ అడ్రస్ కు ఆ సమాచారాన్ని పంపాలి. సైబర్ క్రైమ్ వెబ్సైట్ ద్వారా కూడా ఆన్లైన్లో కేసు నమోదు చేసే అవకాశం ఉంది. మనం అప్రమత్తంగా ఉంటేనే మన కష్టార్జితాన్ని కాపాడుకోగలం. సాంకేతికతను వాడేటప్పుడు కనీస అవగాహన కలిగి ఉండటం నేటి కాలంలో చాలా ముఖ్యం.
