మన భారతీయ వంటకాల్లో పచ్చి మిరపకాయలు విస్తృతంగా ఉపయోగిస్తారు.. వివిధ వంటకాలకు, రుచి, కారంగా ఉండేలా చేయడానికి పచ్చిమిర్చి బెస్ట్ ఎంపిక అవుతుంది.
ఎర్ర మిరపకాయల కంటే కూడా పచ్చి మిరపకాయలు ఆరోగ్యానికి ఎక్కువ ప్రయోజనకరం. పచ్చి మిరపకాయలలో అధిక ఆరోగ్య ప్రయోజనాలను అందించే అనేక పోషకాలు ఉన్నాయి. బరువు తగ్గడం నుండి గుండె ఆరోగ్యాన్ని మెరుగుపరచడం వరకు పచ్చి మిరపకాయలు చాలా ఉపయోగకరంగా ఉంటాయి. పచ్చి మిరపకాయలు ప్రపంచవ్యాప్తంగా విస్తృతంగా ఉపయోగించే సుగంధ ద్రవ్యాలలో ఒకటి. ఈ రోజు, పచ్చి మిరపకాయలు తినడం వల్ల కలిగే కొన్ని అద్భుతమైన ప్రయోజనాలు తెలుసుకుందాం..అది తెలిస్తే మీరు ఖచ్చితంగా ఆశ్చర్యపోతారు.
బరువు తగ్గడానికి ప్రయోజనకరం – పచ్చి మిరపకాయలు తినడం వల్ల బరువు తగ్గవచ్చునని ఆయుర్వేద ఆరోగ్య నిపుణులు చెబుతున్నారు. పచ్చి మిరపకాయలలో ఉండే కాప్సైసిన్ అనే సమ్మేళనం ఆకలిని అణిచివేసి కొవ్వును కాల్చేస్తుందని నిపుణులు చెబుతున్నారు. ఇది వేగంగా బరువు తగ్గడానికి దారితీస్తుంది. 10 గ్రాముల పచ్చి మిరపకాయలు పురుషులు, స్త్రీలలో కొవ్వును కాల్చడాన్ని గణనీయంగా పెంచుతాయని అనేక అధ్యయనాలు చూపిస్తున్నాయి.
నొప్పి నుండి ఉపశమనం అందిస్తుంది – పచ్చి మిరపకాయలను సహజ నొప్పి నివారిణిగా పరిగణిస్తారు.. మిరపకాయలలో లభించే కాప్సైసిన్ అనే సమ్మేళనం శరీరంలో నొప్పిని తగ్గిస్తుంది. ఈ సమ్మేళనం మన నాడీ వ్యవస్థలోకి ప్రవేశించి నొప్పిని తగ్గించడం ద్వారా పనిచేస్తుంది. పచ్చి మిరపకాయలు తినడం వల్ల యాసిడ్ రిఫ్లక్స్ వల్ల కలిగే గుండెల్లో మంట నుండి కూడా ఉపశమనం లభిస్తుంది. ఒక అధ్యయనంలో రోజుకు 2.5 గ్రాముల మిరపకాయలు తినడం వల్ల ఐదు వారాల తర్వాత గుండెల్లో మంట గణనీయంగా తగ్గుతుందని తేలింది.
గుండె ఆరోగ్యానికి మేలు – పచ్చి మిరపకాయలు తినడం వల్ల గుండె ఆరోగ్యానికి కూడా చాలా మేలు జరుగుతుంది. పచ్చి మిరపకాయలు తినడం వల్ల శరీరంలోని చెడు కొలెస్ట్రాల్ తగ్గుతుందని అనేక అధ్యయనాలు చెబుతున్నాయి. ఇది రక్తపోటును కూడా నియంత్రిస్తుంది. ఇది గుండె ఆరోగ్యాన్ని బలపరుస్తుంది. గుండె జబ్బుల ప్రమాదాన్ని గణనీయంగా తగ్గిస్తుంది. గుండె ఆరోగ్యాన్ని పెంచడానికి పచ్చి మిరపకాయలను తినవచ్చు.
రక్తంలో చక్కెరను నియంత్రిస్తుంది – పచ్చిమిర్చి మధుమేహ రోగులకు కూడా అద్భుతంగా పరిగణించబడుతుంది. పచ్చిమిర్చి తినడం వల్ల రక్తంలో చక్కెర స్థాయిలు తగ్గుతాయి. ఇది ఒక అధ్యయనంలో వెల్లడైంది. మిరపకాయలలోని రసాయన క్యాప్సైసిన్ ఇన్సులిన్ స్రావాన్ని ప్రోత్సహిస్తుంది. ఇది రక్తంలో గ్లూకోజ్ స్థాయిలను నియంత్రించడంలో సహాయపడుతుంది. అయితే, మధుమేహ రోగులు పచ్చిమిర్చి తినే ముందు వైద్యుడిని సంప్రదించాలి.
రోగనిరోధక శక్తిని బలపరుస్తుంది – పచ్చి మిరపకాయలు శరీర రోగనిరోధక శక్తిని పెంచడంలో కూడా ప్రభావవంతంగా పరిగణించబడతాయి. పచ్చి మిరపకాయలలో బీటా-కెరోటిన్, విటమిన్ సి పుష్కలంగా ఉంటాయి. బీటా-కెరోటిన్ రోగనిరోధక శక్తిని పెంచే శక్తివంతమైన యాంటీఆక్సిడెంట్. విటమిన్ సి వ్యాధితో పోరాడే సామర్థ్యాన్ని పెంచడానికి కూడా సహాయపడుతుంది.
(NOTE: ఇందులోని అంశాలు కేవలం అవగాహన కోసం మాత్రమే. నిపుణులు అందించిన సమాచారం ప్రకారం ఇక్కడ తెలియజేయడమైనది. ఆరోగ్య రీత్యా ఎలాంటి సమస్యలు ఉన్నానేరుగా వైద్య నిపుణులను సంప్రదించడం మంచిది)
