ప్రస్తుతం బ్యాంకులు ఫిక్స్‌డ్ డిపాజిట్లపై మంచి వడ్డీ రేట్లు అందిస్తున్నాయి. అలాగే ప్రత్యేక టెన్యూర్‌తో రూపొందించిన స్పెషల్ ఎఫ్‌డీ పథకాల ద్వారా గరిష్ఠ వడ్డీ రేట్లు ఆఫర్ చేస్తుంటాయి. సాధారణంగా తక్కువ టెన్యూర్ డిపాజిట్లపై వడ్డీ రేట్లు తక్కువగా ఉంటాయి. అయితే, ప్రత్యేకంగా రూపొందించిన ఫిక్స్‌డ్ డిపాజిట్లు స్వల్ప కాలిక టెన్యూర్ ఉన్నప్పటికీ మంచి వడ్డీ రేట్లు ఇస్తుంటాయి. మీరు కూడా మీ స్వల్ప కాలిక లక్ష్యాల కోసం ఫిక్స్‌డ్ డిపాజిట్లు చేయాలనుకుంటే ప్రభుత్వ రంగ దిగ్గజ బ్యాంకుల్లో ఒకటైన ఇండియన్ బ్యాంకును పరిశీలించవచ్చు. ఈ బ్యాంకులో ఏడాది, ఆలోపు టెన్యూర్ గల రెండు ప్రత్యేక ఫిక్స్‌డ్ డిపాజిట్ పథకాలు ఉన్నాయి. అవే ఇండ్ సూపర్ 300 డేస్ ఎఫ్‌డీ స్కీమ్, ఇండ్ సూపర్ 400 డేస్ స్కీమ్.
అయితే, ఈ రెండు స్పెషల్ ఫిక్స్‌డ్ డిపాజిట్ పథకాల్లో పెట్టుబడులు పెట్టేందుకు గడువు దగ్గరపడుతోంది. ఈ నెలాఖరు అంటే నవంబర్ 30వ తేదీ వరకు మాత్రమే అవకాశం ఉంటుంది. ఇప్పటికీ ఈ స్పెషల్ స్క్సీమ్ గడువును పలుమార్లు పెంచింది బ్యాంక్. కస్టమర్ల నుంచి మంచి ఆదరణ లభిస్తున్న క్రమంలో ఈ నిర్ణయం తీసుకుంది. అంతకు ముందు సెప్టెంబర్ 30తో గడువు ముగియగా.. దానిని నవంబర్ 30, 2024కు పెంచింది. మరి రెండు స్కీమ్స్‌లో రూ.5 లక్షలు జమ చేస్తే ఎంతొస్తుంది? ఇందులో వడ్డీ రేట్లు ఎలా ఉన్నాయి అనేది తెలుసుకుందాం.
ఇండ్ సూపర్ 300 డేస్ స్కీమ్..
ఇండియన్ బ్యాంక్ ప్రస్తుతం ఇండ్ సూపర్ 300 డేస్ స్కీమ్ ద్వారా ఒక సాధారణ కస్టమర్‌కి 7.05 శాతం వడ్డీ ఇస్తోంది. అతను రూ.5 లక్షలు జమ చేసే మెచ్యూరిటీ నాటికి రూ.5,29,700 వరకు అందుతాయి. అదే ఒక సీనియర్ సిటిజన్ అయితే 7.55 శాతం మేర వడ్డీ లభిస్తోంది. 60 ఏళ్లు దాటిన వ్యక్తులు రూ.5 లక్షలు డిపాజిట్ చేసినట్లయితే వారికి 300 రోజుల తర్వాత అసలు, వడ్డీ కలిపి రు.5,31,800 వరకు లభిస్తాయి. ఇక 80 ఏళ్లు దాటిన సూపర్ సీనియర్లకు అయితే 7.80 శాతం వడ్డీ ఇస్తోంది. వారికి రూ.5 లక్షలపై రూ.32,850 మేర వడ్డీ వస్తుంది.
ఇండ్ సూపర్ 400 డేస్ స్కీమ్..
ఈ స్కీమ్ ద్వారా ఒక సాధారణ పౌరుడికి 7.25 శాతం వడ్డీ ఇస్తోంది. ఇందులో అతను రూ.5 లక్షలు జమ చేస్తే 400 రోజుల తర్వాత అసలు, వడ్డీ కలిపి రూ. 5,39,700 వరకు లభిస్తాయి. అలాగే సీనియర్ సిటిజన్‌కు 7.80 శాతం వడ్డీ ఇస్తోంది. వారికి రూ.5 లక్షలపై వడ్డీ రూ.42,700 వరకు వస్తుంది. ఇక సూపర్ సీనియర్ సిటిజన్ అయితే వడ్డీ 8 శాతం మేర ఇస్తోంది. వారు రూ.5 లక్షలను జమ చేసినట్లయితే 400 రోజుల తర్వాత చేతికి రూ.5,43,800 మేర లభిస్తాయి.
