తెలుగు రాష్ట్రాల్లో ఉన్న జవహర్‌ నవోదయ విద్యాలయాల్లో 9, 11వ తరగతుల్లో ప్రవేశాలకు సంబంధించి ఆన్ లైన్ దరఖాస్తు గడువు పొడిగిస్తూ కేంద్ర మానవ వనరుల అభివృద్ధి మంత్రిత్వశాఖ ప్రకటన విడుదల చేసింది. ఈ మేరకు దరఖాస్తు గడువు పొడిగించినట్లు ..
దేశ వ్యాప్తంగా ఉన్న దాదాపు 650 జవహర్‌ నవోదయ విద్యాలయాల్లో 9, 11వ తరగతుల్లో ఖాళీల సీట్ల భర్తీకి సంబంధించి దరఖాస్తు గడువు అక్టోబర్ 30వ తేదీతో ముగిసిన సంగతి తెలిసిందే. అయితే విద్యార్ధుల అభ్యర్ధన మేరకు దరఖాస్తు గడువు పొడిగించినట్లు కేంద్ర మానవ వనరుల అభివృద్ధి మంత్రిత్వశాఖ వెల్లడించింది. అర్హులైన విద్యార్థులు నవంబర్ 9వ తేదీలోగా దరఖాస్తు చేసుకోవాలని సూచించింది. జేఎన్‌వీ లేటరల్‌ ఎంట్రీ ప్రవేశ పరీక్ష ద్వారా ప్రవేవాలు కల్పిస్తారు. ఆంధ్రప్రదేశ్‌లో 15, తెలంగాణలో 9 చొప్పున జవహర్‌ నవోదయ విద్యాలయాలు ఉన్నాయి. ప్రవేశ పరీక్ష ద్వారా ఎంపికైన విద్యార్థులకు ఆయా విద్యాలయాల్లో ఉచిత విద్యతోపాటు భోజనం, వసతి సౌకర్యాలు అందిస్తారు. బాలబాలికలకు వేర్వేరు ఆవాస, వసతి సౌకర్యాలు కల్పించడం జరుగుతుంది. ఆసక్తి కలిగిన వారు ఆన్‌లైన్‌లో జేఎన్‌వీ అధికారిక వైబ్‌సైట్‌ ద్వారా దరఖాస్తు చేసుకోవడానికి అవకాశం ఉంటుంది. వచ్చే ఏడాది ఫిబ్రవరి 8న ప్రవేశ పరీక్ష ఉంటుంది.
అంబేడ్కర్‌ వర్సిటీ డిగ్రీ, పీజీ కోర్సుల గడువు పొడిగింపు.. ఎప్పటి వరకంటే
డా.బీఆర్‌ అంబేడ్కర్‌ సార్వత్రిక విశ్వవిద్యాలయంలో 2024-25 విద్యాసంవత్సరానికి డిగ్రీ, పీజీ కోర్సుల్లో చేరడానికి చివరి తేదీని పొడిగించినట్లు విశ్వవిద్యాలయ అధికారులు ఓ ప్రకటనలో తెలిపారు. తాజా ప్రకటన ప్రకారం నవంబరు 15 వరకు దరఖాస్తు చేసుకోవడానికి అవకాశం కల్పించారు. యూనివర్సిటీలో చేరిన ద్వితీయ, తృతీయ సంవత్సరం చదువుతున్న విద్యార్థులు ట్యూషన్‌ ఫీజు, గతంలో వర్సిటీలో చేరి ఫీజు చెల్లించని విద్యార్థులు కూడా నవంబరు 15వ తేదీలోపు ట్యూషన్‌ ఫీజును చెల్లించాలని తెలిపారు. వారంతా ఆన్‌లైన్‌లో ఫీజులు చెల్లించాలని పేర్కొన్నారు.
ఎంబీఏ ప్రవేశాలకు నోటిఫికేషన్ విడుదల
డాక్టర్‌ బీఆర్‌ అంబేడ్కర్‌ సార్వత్రిక విశ్వవిద్యాలయం ఎంబీఏ కోర్సుల్లో చేరడానికి నోటిఫికేషన్ విడుదల చేసింది. ఈ కోర్సులో చేరేందుకు నవంబరు 15 వరకు దరఖాస్తు చేసుకునేందుకు అవకాశం ఉందని వర్సిటీ అధికారులు బుధవారం ఓ ప్రకటనలో తెలిపారు. ఇందుకు సంబంధించిన పూర్తి వివరాలకు www.braouonline.in, www.braou.ac.in వెబ్‌సైట్‌ల ద్వారా తెలుసుకోవచ్చు. అలాగే విశ్వవిద్యాలయం హెల్ప్‌ డెస్క్‌ నంబర్లు 7382929570/580, 040-23680222 333/444/555 ద్వారా కూడా సంప్రదించవచ్చు. టోల్‌ఫ్రీ నం 18005990101లోనూ సంప్రదించాలని అధికారులు సూచించారు.
