ఈ మధ్య చిన్న చిన్న అవసరాలకు కూడా బ్యాంకుల్లో పర్సనల్ లోన్ తీసుకునే వారి సంఖ్య పెరుగుతోంది. చాలా మంది తమ అవసరాల దృష్ట్యా..
ఈఎంఐల్లో తిరిగి చెల్లించేందుకు వీలుగా లోన్లు తీసుకుంటున్నారు. మనకు ఎప్పుడు ఏ అవసరం పడుతుందో ముందుగానే చెప్పలేం. అనుకోకుండా ఆస్పత్రిలో చేరాల్సి రావొచ్చు. వైద్య ఖర్చులకు డబ్బులు లేకపోతే ఇది ఉపయోగపడుతుంది. ఇంకా.. ఉన్నట్లుండి ఇంట్లో ఏదైనా ఫంక్షన్ చేయాల్సి రావొచ్చు. దూరప్రాంతాలకు వెళ్లాల్సి రావొచ్చు. ఇలాంటి పరిస్థితుల్లో చేతిలో కాస్త పెద్ద మొత్తంలోనే డబ్బు ఉండాలి. అందుకే.. ఇక్కడ బెస్ట్ ఆప్షన్.. పర్సనల్ లోన్ తీసుకోవడమే. ఇటీవలి కాలంలో చాలా బ్యాంకులు.. లోన్ ప్రాసెస్ను సులభతరం చేశాయి. పెద్దగా డాక్యుమెంటేషన్ లేకుండానే.. వేగంగా అకౌంట్లో డబ్బులు జమ చేస్తున్నాయి.
ఇంకా వడ్డీ రేట్లు అన్ని బ్యాంకుల్లో ఒకేలా ఉండవు. ప్రాసెసింగ్ ఛార్జీలు కూడా వేర్వేరుగా ఉంటాయి. కస్టమర్లను ఆకర్షించేందుకు ఒక్కో బ్యాంకు ఒక్కో రకమైన స్ట్రాటజీ పాటిస్తుంటుంది. తక్కువ వడ్డీ రేటు, ప్రాసెసింగ్ ఛార్జీలతో కస్టమర్లను ఆకర్షించే ప్లాన్స్ ప్రకటిస్తుంటాయి. ఇప్పుడు ప్రముఖ స్మాల్ ఫైనాన్స్ బ్యాంకుల్లో ఒకటైన ఈక్విటస్ స్మాల్ ఫైనాన్స్ బ్యాంకు కూడా డిజిటల్ పర్సనల్ లోన్ ఆఫర్ లాంఛ్ చేసింది. ఈ సదుపాయంతో కస్టమర్లు.. డాక్యుమెంటేషన్ లేకుండా.. చాలా వేగంగా డబ్బులు పొందొచ్చని చెబుతోంది.
>> ఈ బ్యాంకులో పర్సనల్ లోన్ వడ్డీ రేట్లు చాలా తక్కువగా అంటే కనీసం 10.49 శాతం నుంచి ప్రారంభమవుతున్నాయని పేర్కొంది. ఇక్కడ గరిష్ట వడ్డీ రేటు 13.25 శాతం కాగా.. సగటు వడ్డ రేటు 11.07 శాతంగా ఉంది.
>> ఇతర బ్యాంకుల కంటే చాలా తక్కువగా కేవలం ఒక శాతం మాత్రమే ప్రాసెసింగ్ ఫీజును వసూలు చేస్తుంది.
>> కనీసం రూ. 2 లక్షల నుంచి ఈ బ్యాంకులో లోన్ తీసుకోవచ్చు. ఇక సౌకర్యవంతంగా గరిష్టంగా 60 నెలలు (ఐదేళ్లు) లోన్ టెన్యూర్ పెట్టుకోవచ్చు.
>> ఈ లోన్ ప్రాసెస్ పూర్తిగా ఆన్లైన్ ద్వారానే జరుగుతుంది. దరఖాస్తుదారుడి క్రెడిట్ ప్రొఫైల్ కీలక పాత్ర పోషిస్తుంది.
అర్హతలు ఇవే..
ఈ లోన్ కేవలం వేతన జీవుల కోసమే ఉద్దేశించింది. అంటే నెలనెలా జీతం పొందేవారికి అర్హత ఉంటుందన్నమాట.
నెలవారీగా టేక్ హోం శాలరీ రూ. 40 వేలు లేదా అంతకంటే ఎక్కువ ఉండాలి.
దరఖాస్తు దారులకు క్రెడిట్ స్కోరు లేదా సిబిల్ స్కోరు 730 లేదా అంతకంటే ఎక్కువ ఉండాలి. సిబిల్ ఎక్కువంటే.. తక్కువ వడ్డీకే లోన్ పొందే అవకాశం ఉంటుంది.లోన్ ఈఎంఐ కాలిక్యులేటర్..
మరి మనం ఇప్పుడు రూ. 5 లక్షల పర్సనల్ లోన్ తీసుకుంటే.. 2 సంవత్సరాల వ్యవధికి నెలకు ఈఎంఐ ఎంత పడుతుందనేది చూద్దాం. ప్రారంభ వడ్డీ రేటు 10.49 శాతంతోనే చూసుకుంటే.. నెలకు ఈఎంఐ రూ. 23,185 చొప్పున పడుతుంది. రెండేళ్లకు రూ. 56,456 చొప్పున వడ్డీ చెల్లించాల్సి వస్తోంది. దీంట్లో ప్రాసెసింగ్ ఫీజు రూ. 5 వేల వరకు ఉంటుంది.
ఇక దీనిని 3 సంవత్సరాలకు పెట్టుకుంటే అప్పుడు నెలకు ఈఎంఐ రూ. 16,248 కి తగ్గుతుంది. కానీ చెల్లించాల్సిన వడ్డీ రూ. 84,959 కి పెరుగుతుంది. మీరు ఈఎంఐ తక్కువ కావాలంటే.. టెన్యూర్ పెంచుకోవాలి కాబట్టి అప్పుడు వడ్డీ ఎక్కువ చెల్లించాల్సి వస్తుంది. అదే.. టెన్యూర్ తక్కువగా ఉంటే ఈఎంఐ ఎక్కువగా ఉంటుంది కానీ చివరకు చెల్లించాల్సిన వడ్డీ తగ్గుతుంది.
ఇదే విధంగా రూ. 2 లక్షల పర్సనల్ లోన్ తీసుకొని రెండేళ్లకు పెట్టుకుంటే.. ప్రారంభ వడ్డీ రేటుకు నెలకు ఈఎంఐ రూ. 9,274 పడుతుంది. వడ్డీ రూ. 22 వేలకుపైగా చెల్లించాల్సి వస్తుంది. ఇదే సమయంలో ఇదే లోన్పై టెన్యూర్ను మూడేళ్లకు పెంచుకుంటే.. నెలకు ఈఎంఐ రూ. 6,499 కి తగ్గుతుంది కానీ మొత్తం వడ్డీ రూ. 33 వేలకుపైగా చెల్లించాలి.
