దేశీయ స్టాక్ మార్కెట్లు సెప్టెంబర్ లో పీక్ దశకు చేరుకున్నాయి. కానీ ఆ తర్వాత నుంచి క్షీణత నమోదు చేశాయి. నిఫ్టీ సూచీ 10 శాతం దిగొచ్చింది. మార్కెట్ అనిశ్చితికి తోడు ఆర్థిక వృద్ధి మందగించడం, అంతర్జాతీయంగా ఊహించని పరిణామాలు జరుగుతుండటంతో 2025లో స్టాక్ మార్కెట్లు మంచి లాభాలను అందించకపోవచ్చని నిపుణులు అభిప్రాయపడుతున్నారు. అయితే మార్కెట్లు కరెక్షన్ కు గురికావడంతో తక్కువ తక్కువ ధరకు లభించే బ్లూచిప్ స్టాక్స్ ను ఎంపిక చేసుకునే అవకాశం లభిస్తుందన్నారు. లాంగ్ టర్మ్ ఇన్వెస్టర్లు వీటిని పరీశీలించవచ్చన్నారు. ఇక బంగారం, వెండిలో ఇన్వెస్ట చేస్తే భవిష్యత్తులో ఎలాంటి పరిస్థితులు ఉన్నా ఢోకా ఉండదు. ద్రవ్యోల్బణానికి అనుగుణంగా వాటి విలువ పెరుగుతూనే ఉంది. అయితే రూ. 10 లక్షలు చేతిలో ఉండి 2025లో ఎందులో ఇన్వెస్ట్ మెంట్ ప్రారంభిస్తే బాగుంటుందా? అని ఆలోచించే వారి కోసం మార్కెట్ నిపుణులు కీలకమైన సూచనలు చేస్తున్నారు. ఇందుకు సంబంధించిన వివరాలు ఇప్పుడు చూద్దాం.
గడిచిన మూడేళ్లలో భారత స్టాక్ మార్కెట్లు అద్భుతమైన రిటర్నులను ఇచ్చాయి. కానీ, ఈసారి పరిస్థితులు అలానే ఉండకపోవచ్చని నిపుణులు చెబుతున్నారు. కాబట్టి ఇన్వెస్ట్ మెంట్ ను విభజించి విభిన్న పెట్టుబడులకు కేటాయించాలని సూచిస్తున్నారు. మ్యూచువల్ ఫండ్లలో ఇన్వెస్ట్ చేయాలనుకునేవారు అయితే డైనమిక్ గా మేనేజ్ చేసే బ్యాలెన్స్డ్ అడ్వాంటేజ్ ఫండ్స్ను పరిశీలించాలని చెప్పారు.
రూ. 10 లక్షలు ఇలా ఇన్వెస్ట్ చేయండి
ప్రస్తుత పరిస్థితుల్లో కొంచెం రిస్క్ తీసుకునేందుకు సిద్ధపడేవారు మొత్తం అసెట్స్ లో 50 శాతాన్ని ఈక్విటీ, 40 శాతాన్ని డెట్, 10 శాతాన్ని గోల్డ్ లో ఇన్వెస్ట్ చేస్తే బెటర్ అని ఐసీఐసీఐ డైరెక్ట్ రీసెర్చ్ హెడ్ పంకజ్ పాండే పేర్కొన్నారు. అలాగే నిఫ్టీ 5 శాతం తగ్గిన ప్రతిసారి 10 శాతం అసెట్స్ ను డెట్ నుంచి ఈక్విటీకి మళ్లించాలని సూచించారు. ఇలా ఈక్విటీ 70 శాతానికి చేరేవరకు చేయాలన్నారు.
హెచ్డీఎఫ్సీ సెక్యూరిటీస్ ఎండీ, సీఈఓ కూడా అదే తరహా స్ట్రాటజీని సూచించారు. 45 శాతం అసెట్స్ ను ఈక్విటీలలో, 35 శాతాన్ని ఫిక్స్డ్ ఇన్ కమ్ లో (ఎఫ్డీ వంటివి), 10 శాతం అసెట్స్ ను గోల్డ్ లో ఇన్వెస్ట్ చేసుకోవాలన్నారు. మిగతా 10 శాతం అసెట్స్ ను మార్కెట్ పరిస్థితులను బట్టి ఈక్విటీలలో లేదా ఫిక్స్డ్ ఇన్ కమ్ వైపు మళ్లించాలని సూచించారు.
సామ్కో సెక్యూరిటీస్ వ్యవస్థాపక సీఈఓ జమీత్ మోదీ అయితే 50 శాతం అసెట్స్ ను లార్జ్ క్యాప్ స్టాక్స్ లో , 25 శాతం అసెట్స్ ను డెట్ లో, మిగతా 25 శాతం అసెట్స్ ను గోల్డ్ లో ఇన్వెస్ట్ చేయాలని సూచించారు.
360 వన్ అసెట్ సీఈఓ రాఘవ్ అయ్యంగార్ అయితే 50 శాతం అసెట్స్ ను ఈక్విటీలలో, 30 శాతం డెట్ లో, మిగతా 20 శాతాన్ని గ్రోత్ పొందే అన్ లిస్టెడ్ సంస్థల్లో ఇన్వెస్ట్ చేయాలని సూచించారు. అంటే ఫిన్ టెక్, రెనువబుల్ ఎనర్జీ, డీప్ టెక్నాలజీ వంటి హై గ్రోత్ బిజినెస్ లో ఇన్వెస్ట్ చేయాలన్నారు.
గమనిక: ఈ కథనం కేవలం సమాచారం కోసం మాత్రమే. విశ్లేషకుల సొంత అభిప్రాయాలను తెలియజేస్తుంది. స్టాక్ మార్కెట్లో ఇన్వెస్ట్ చేసే ముందు నిపుణుల సలహా తీసుకుంటే మంచిది.
