ఆళ్లగడ్డ, న్యూస్‌టుడే: బైక్‌ చక్రంలో చీర ఇరుక్కుపోవడంతో రహదారిపై పడి యువ ఉపాధ్యాయురాలు దుర్మరణం పాలయ్యారు. ఏపీలోని నంద్యాల జిల్లా ఆళ్లగడ్డ శివారుల్లోని పడకండ్ల ఎస్సీ గురుకులం వద్ద ఆదివారం ఈ ఘటన జరిగింది.
పోలీసులు తెలిపిన ప్రకారం.. కోవెలకుంట్లలో ఉంటున్న రాణిబాయి(22) భీమునిపాడు ఎంపీపీ స్కూల్‌(స్పెషల్)లో ఉపాధ్యాయురాలిగా పని చేస్తున్నారు. రాణిబాయి, సోదరుడు, ఇతర కుటుంబ సభ్యులు రెండు ద్విచక్ర వాహనాలపై అహోబిలం లక్ష్మీనరసింహస్వామి దర్శనానికి వెళ్లి తిరిగి వస్తుండగా ఆమె చీర బండి వెనుక చక్రంలో ఇరుక్కుపోయింది. ఒక్కసారిగా రోడ్డుపై పడిపోయిన ఆమె అక్కడికక్కడే కన్నుమూశారు. ఆమెకు రెండున్నరేళ్ల కుమారుడు ఉన్నారు.
