దేశంలోని మహిళా పారిశ్రామికవేత్తలకు సాధికారత కల్పించాలనే ఉద్దేశంతో దేశంలోనే అతిపెద్ద ప్రభుత్వరంగ బ్యాంకు అయిన స్టేట్ బ్యాంకు అఫ్ ఇండియా ఎస్బీఐ స్త్రీ శక్తి లోన్ స్కీమ్ అనే కొత్త పథకాన్ని అందుబాటులోకి తెచ్చింది.
దేశంలోనే అతిపెద్ద ప్రభుత్వరంగ బ్యాంకు అయిన స్టేట్ బ్యాంకు అఫ్ ఇండియా (ఎస్బీఐ), దేశంలోని మహిళా పారిశ్రామికవేత్తలకు సాధికారత కల్పించాలనే ఉద్దేశంతో కొత్త పథకాన్ని అందుబాటులోకి తెచ్చింది. దీని పేరు ఎస్బీఐ స్త్రీ శక్తి లోన్ స్కీమ్. మహిళలు కొత్తగా వ్యాపారాన్ని ప్రారంభించడానికి లేదా ఇప్పటికే ఉన్న వ్యాపారాన్ని విస్తరించడానికి ఈ పథకం రూ. 24 లక్షల వరకు ఆర్ధిక సహాయాన్ని అందిస్తుంది. ఈ పథకానికి సంబంధించిన పూర్తి వివరాలను మీ కోసం కింద తెలియచేయడం జరిగింది.
ఈ పథకంలో భాగంగా మహిళా పారిశ్రామికవేత్తలు తక్కువ వడ్డీకే లోన్స్ ని పొందుతారు, అదే ఒకవేళ లోన్ మొత్తం రూ. 2 లక్షల లోపు ఉన్నట్లయితే, అదనంగా 0.5 శాతం వడ్డీ రాయితీని పొందుతారు. అలాగే రూ. 10 లక్షల లోపు లోన్స్ పై ఎలాంటి పూచికత్తుని సమర్పించాల్సిన అవసరం లేదు. ఇక ఈ పథకం ద్వారా పొందే లోన్స్ పై ఎలాంటి ప్రాసెసింగ్ ఛార్జీలు ఉండవు. అలాగే ఈ పథకం చాలా సౌకర్యవంతమైన తిరిగి చెల్లింపు ఆప్షన్స్ ని అందిస్తుంది.
అయితే ఈ లోన్ పొందడానికి కొన్ని రకాల అర్హతలు ఉండాల్సిన అవసరం ఉంది. వాటిలో ముందుగా వ్యాపారంలో కనీసం 51 శాతం వాటా మహిళల పేరు మీద ఉండాలి. అలాగే మహిళలు కొత్తగా వ్యాపారాన్ని ప్రారంభించడానికి లేదా ఇప్పటికే ఉన్న వ్యాపారాన్ని విస్తరించడానికి మాత్రమే ఈ లోన్ కోసం దరఖాస్తు చేసుకోవాల్సి ఉంటుంది.
ఈ లోన్ కోసం దరఖాస్తు చేసుకోవాలని భావించే మహిళలు, తమకి సమీపంలో ఉన్న ఎస్బీఐ బ్యాంకు బ్రాంచ్ ని సందర్శించి, బ్యాంకు వారు ఇచ్చే అప్లికేషన్ ఫారంను పూర్తి చేసి, వారు అడిగిన డాక్యూమెంట్స్ ని అప్లికేషన్ కి జత చేసి బ్యాంకు వారికి సమర్పించాల్సి ఉంటుంది. ఈ డాక్యూమెంట్స్ జాబితాలో ఆధార్ కార్డు, పాన్ కార్డు, మీరు ప్రారంభించాలని అనుకుంటున్న వ్యాపారానికి సంబంధించిన ప్రాజెక్ట్ రిపోర్ట్, ఇన్కమ్ ప్రూఫ్, పాస్ పోర్ట్ ఫోటో ఉంటాయి.
అనంతరం మీ లోన్ అప్లికేషన్ ని బ్యాంకు పరిశీలిస్తుంది. ఒకవేళ మీరు ఈ పథకానికి అర్హులని బ్యాంకు వారు భావించినట్లైతే, మీ లోన్ ని ఆమోదించడంతో పాటు లోన్ మొత్తాన్ని మీ బ్యాంకు అకౌంట్ కి బదిలీ చేస్తుంది. ఎవరైతే సొంతంగా వ్యాపారాన్ని ప్రారంభించి తమ కాళ్లపై తాము నిలబడాలని భావిస్తారో అలాంటి మహిళలకి ఈ పథకం ఎంతో ప్రయోజనకరంగా ఉంటుందని చెప్పవచ్చు.
