భారతీయులకు ముఖ్యంగా మహిళలకు.. బంగారం, బంగారు ఆభరణాలు అంటే ఎంత ఇష్టమో వేరే చెప్పనక్కర్లేదు. చిన్న శుభకార్యం ఉన్నా.. పెళ్లిళ్లు, పండగలు ఉన్నా..
ఇతర వేడుక ఏదైనా సరే కచ్చితంగా బంగారం ధరిస్తుంటారు. ఇది అలంకరణగానే కాకుండా.. సమాజంలో హోదాను కూడా ప్రతిబింబిస్తుంటుందని చెప్పొచ్చు. ఇంకా పెట్టుబడికి సాధనంగా కూడా ఉపయోగపడుతుంది. అందుకే.. వీలైనప్పుడల్లా బంగారు ఆభరణాల్ని కొనుగోలు చేస్తుంటారు. బంగారంతో పాటే వెండి ఆభరణాల్ని కూడా కొంటుంటారు. ఇటీవల సిల్వర్ రేటు రూ. 2 లక్షలకుపైగా చేరిన క్రమంలో.. ఇందులో పెట్టుబడి పెట్టిన వారికి మంచి లాభాలే వచ్చాయి. అయితే.. గత 2-3 నెలలుగా విపరీతంగా పెరిగిన గోల్డ్, సిల్వర్ రేట్లు.. మళ్లీ 10 రోజులు భారీగా పతనం అయ్యాయి. ఇక్కడ బంగారం ధర సుమారు రూ. 12 వేలు తగ్గింది. వెండి రేటు ఈ క్రమంలో రూ. 42 వేలు దిగొచ్చింది.
ఇవాళ దేశీయంగా మళ్లీ బంగారం ధర భారీగా పడిపోయింది. 22 క్యారెట్ల గోల్డ్ రేటు హైదరాబాద్ నగరంలో రూ. 2250 తగ్గడంతో ప్రస్తుతం తులం రూ. 1,10,750 కి చేరింది. కిందటి రోజు చూస్తే ఇది రూ. 2150 తగ్గుముఖం పట్టింది. ఇక అక్టోబర్ 17న ఈ 10 గ్రాముల గోల్డ్ రేటు రూ. 1,21,700 వద్ద ఉండేది. ఇక్కడి నుంచి చూస్తే ఏకంగా రూ. 10,950 తగ్గుముఖం పట్టింది. ఇదే సమయంలో 24 క్యారెట్ల బంగారం రేటు ఇవాళ రూ. 2,460 తగ్గగా 10 గ్రాములు రూ. 1,20,820 కి చేరింది. కిందటి రోజు రూ. 2,340 తగ్గింది. ఇది అక్టోబర్ 17న రూ. 1,32,770 వద్ద ఉండగా.. ఈ క్రమంలో రూ. 11,950 తగ్గింది.
బంగారం ధరలకు మించి వెండి ధర పతనమైంది. ఇది అక్టోబర్ 15 న ఇది కిలోకు హైదరాబాద్ నగరంలో రూ. 2.07 లక్షల వద్ద ఉండగా.. ఇప్పుడు అంటే అక్టోబర్ 29న రూ. 1.65 లక్షలకు చేరింది. ఏకంగా రూ. 42 వేలు తగ్గిందన్నమాట. ఇవాళ రూ. 5 వేలు పతనమైంది. అమెరికా- చైనా ఒప్పందం కుదుర్చుకోనున్నాయన్న సంకేతాలతో.. బంగారం, వెండికి డిమాండ్ తగ్గి.. యూఎస్ డాలర్ పుంజుకుంది. దీంతోనే ఇన్వెస్టర్లు.. వీటిల్లో పెట్టుబడుల్ని ఉపసంహరించుకోగా ధర పతనమైందని నిపుణులు చెబుతున్నారు.
ఇది ఇలా ఉండగా.. ఇంటర్నేషనల్ మార్కెట్లో మాత్రం సీన్ రివర్స్ అయింది. యూఎస్ ఫెడరల్ రిజర్వ్ వడ్డీ రేట్లను తగ్గిస్తుందన్న అంచనాల నడుమ బంగారం ధర అక్కడ మళ్లీ పెరుగుతోంది. గత కొన్ని సెషన్లుగా రోజుకు ఔన్స్ బంగారం ధర 100 డాలర్ల చొప్పున తగ్గగా.. ఇవాళ మళ్లీ 50 డాలర్ల వరకు పుంజుకుంది. స్పాట్ గోల్డ్ రేటు ఔన్సుకు ఇప్పుడు 3970 డాలర్ల స్థాయిలో ఉండగా.. వెండి ధర 47.58 వద్ద ట్రేడవుతోంది.
