అమెరికన్ మల్టీ నేషనల్ టెక్నాలజీ కంపెనీ అమెజాన్ మరోసారి వేలాది ఉద్యోగుల్ని తొలగించేందుకు సిద్ధమైంది. క్లౌడ్ కంప్యూటింగ్, ఇ- కామర్స్, ఆన్లైన్ అడ్వర్టైజింగ్, డిజిటల్ స్ట్రీమింగ్, ఆర్టిఫిషియెల్ ఇంటెలిజెన్స్ రంగాల్లో కార్యకలాపాలు నిర్వర్తిస్తున్న అమెజాన్..
కొంత కాలంగా పలు విభాగాల్లో పెద్ద సంఖ్యలోనే ఉద్యోగుల్ని తొలగిస్తుండగా.. ఇప్పుడు మరోసారి ఉద్యోగులపై వేటు వేసేందుకు సిద్ధమైంది. ఇక్కడ ముఖ్యంగా తన మానవ వనరుల విభాగంలో (HR) 15 శాతం వరకు ఉద్యోగుల్ని.. ఇతర కార్పొరేట్ విభాగాల్లో కూడా మరికొంత మంది ఉద్యోగుల్ని తొలగించనుంది.
పీపుల్ ఎక్స్పీరియెన్స్ టెక్నాలజీ (PTX) టీమ్గా పిలుచుకునే అమెజాన్ హెచ్ఆర్ విభాగంలో ప్రస్తుతం ప్రపంచవ్యాప్తంగా 10 వేల మందికిపైగా ఉద్యోగులు ఉన్నారు. ఈ రౌండ్లో ఈ విభాగంలోనే ఎక్కువగా ఉద్యోగాలు పోనున్నట్లు ప్రముఖ ఆంగ్ల మీడియాల్లో కథనాలు వస్తున్నాయి. ఇతర విభాగాల్లో వినియోగదారుల విభాగాలు (కోర్ కన్జూమర్ బిజినెస్) కూడా కొంత వరకు ప్రభావితం కావొచ్చని తెలుస్తోంది.
>> కంపెనీ పునర్వ్యవస్థీకరణలో భాగంగా.. కొంత కాలంగా అమెజాన్.. ఉద్యోగుల ఖర్చుల్ని తగ్గించుకునేందుకు చూస్తోంది. ముఖ్యంగా అమెజాన్.. ఆర్టిఫిషియల్ ఇంటెలిజెన్స్ ప్రొడక్ట్స్, AI వినియోగం, మౌలిక సదుపాయాలపై పెద్ద ఎత్తున పెట్టుబడులు పెడుతోంది. ఇందులో భాగంగానే.. ఇది భర్తీ చేయగల విభాగాల్లో ఉద్యోగుల్ని తగ్గించుకుంటోంది.
2025లోనే అమెజాన్.. ఏఐ డేటా సెంటర్స్, క్లౌడ్ కంప్యూటింగ్ సెంటర్ల నిర్మాణం కోసం ఏకంగా 100 బిలియన్ డాలర్లకుపైగా పెట్టుబడులు పెట్టాలని నిర్ణయించింది. ఈ ఏడాది జూన్లో కంపెనీ సీఈఓ ఆండీ జెస్సీ ఉద్యోగులకు అంతర్గత మెయిల్లో కీలక విషయాల్ని వెల్లడించారు. అప్పుడే ఏఐ ఆవశ్యకతను నొక్కి చెప్పారు. ఏఐ మార్పుల్ని స్వీకరించి.. దాన్ని మరింత మెరుగుపర్చేందుకు ఉపయోగపడేవారు కంపెనీలో అధిక ప్రభావాన్ని చూపగలరని అన్నారు. ప్రతి ఉద్యోగి ఏఐని అందిపుచ్చుకోవాలని జెస్సీ చెబుతున్నారు.
ఆండీ జెస్సీ బాధ్యతలు చేపట్టినప్పటి నుంచి ఉద్యోగులు వేలాదిగా బయటికి వెళ్తున్నారని చెప్పొచ్చు. పునరుద్ధరణ చర్యల్లో భాగంగా.. 2022-23 మధ్య సుమారు 30 వేల మంది వరకు అమెజాన్లో ఉద్యోగాలు కోల్పోయారు. ఏఐ సామర్థ్యాన్ని పెంచుకోవడం ద్వారా.. కొనుగోలుదారులకు, వినియోగదారులకు మరింత మెరుగైన సేవలు అందించేందుకు సహాయపడుతుందని జెస్సీ అభిప్రాయపడుతున్నారు.
ఇక్కడ అమెజాన్ ఉద్యోగాల కోతలు ప్రకటిస్తూనే మరోవైపు హాలిడే సీజన్ (పండగ సీజన్) ఉద్యోగాల్ని ప్రకటించింది. దాదాపు 2.50 లక్షల మంది తాత్కాలిక, పార్ట్ టైమ్, ఫుల్ టైమ్ ఉద్యోగుల్ని నియమించుకునేందుకు కట్టుబడి ఉన్నట్లు స్పష్టం చేసింది. వీరు ప్రధానంగా గిడ్డంగులు, లాజిస్టిక్స్ నెట్వర్క్స్ కింద పనిచేయాల్సి ఉంటుంది. గత రెండేళ్లుగా ఈ సీజనల్ ఉద్యోగాల్లో పెద్దగా మార్పు ఉండట్లేదు.
