మన వంటిల్లే పెద్ద మెడికల్ షాప్ అని పెద్దలు ఊరకనే అనలేదు. మనం రోజువారీ వంటల్లో ఉపయోగించే అనేక దినుసుల్లో దాగి ఉన్న ఆరోగ్య రహస్యాలు తెలిస్తే ఆశ్చర్యపోక తప్పదు.
అందులో ముఖ్యమైనది వెల్లుల్లి. ఘాటైన వాసన, ప్రత్యేకమైన రుచిని అందించే వెల్లుల్లి కేవలం వంటకు రుచిని ఇవ్వడమే కాకుండా మన ఆరోగ్యానికి ఒక సంజీవని లాంటిది.
అయితే వెల్లుల్లిని కూరల్లో వేయించి తినడం కంటే పచ్చిగా తినడం వల్ల కలిగే ప్రయోజనాలు అద్భుతంగా ఉంటాయని ఆరోగ్య నిపుణులు చెబుతున్నారు. చాలామందికి వెల్లుల్లి మంచిదని తెలిసినా కూడా ఎప్పుడు తినాలి? ఎలా తినాలి? ఎంత మోతాదులో తీసుకోవాలి? అనే విషయాల్లో గందరగోళం ఉంటుంది.
ఆరోగ్య నిపుణుల సూచనల ప్రకారం పచ్చి వెల్లుల్లిని ఉదయం నిద్రలేవగానే ఖాళీ కడుపుతో తీసుకోవడం అత్యంత ప్రయోజనకరం. ఉదయాన్నే మన జీవక్రియ చురుగ్గా ఉంటుంది. ఆ సమయంలో వెల్లుల్లిని తీసుకుంటే శరీరం ఇందులోని ఔషధ గుణాలను పూర్తిగా గ్రహించగలుగుతుంది.
ప్రతిరోజూ ఉదయం కేవలం రెండు వెచ్చి వెల్లుల్లి రెబ్బలను నమిలి మింగడం లేదా గోరువెచ్చని నీటితో తీసుకోవడం వల్ల అనేక దీర్ఘకాలిక వ్యాధుల నుంచి ఉపశమనం పొందవచ్చని నిపుణులు చెబుతుంటారు
గుండెకు రక్షక కవచం
పచ్చి వెల్లుల్లిని క్రమం తప్పకుండా తీసుకోవడం వల్ల గుండె జబ్బుల ప్రమాదం గణనీయంగా తగ్గుతుంది. ఇది రక్తపోటును అదుపులో ఉంచడానికి, రక్త నాళాలు గట్టిపడకుండా కాపాడటానికి సహాయపడుతుంది. గుండె పదిలంలో ఉండాలంటే రోజువారీ ఆహారంలో వెల్లుల్లిని భాగం చేసుకోవడం తప్పనిసరి.
కొలెస్ట్రాల్ ను కరిగించే ఆయుధం
శరీరంలో పేరుకుపోయిన చెడు కొలెస్ట్రాల్ అనేక అనారోగ్యాలకు మూలం. పచ్చి వెల్లుల్లి చెడు కొలెస్ట్రాల్ ను తగ్గించడంలో అద్భుతంగా పనిచేస్తుంది.
అదే సమయంలో శరీరానికి అవసరమైన మంచి కొలెస్ట్రాల్ స్థాయిలను పెంచడంలో కూడా ఇది కీలక పాత్ర పోషిస్తుంది. తద్వారా గుండెపోటు, పక్షవాతం వంటి ముప్పులను నివారిస్తుంది.
రోగనిరోధక శక్తికి బూస్టర్
చిన్నపాటి వాతావరణ మార్పులకే జలుబు, దగ్గు, జ్వరం వంటి సమస్యలతో బాధపడుతున్నారా? అయితే మీలో రోగనిరోధక శక్తి తక్కువగా ఉందని అర్థం. వెల్లుల్లిలో సహజసిద్ధమైన యాంటీ బాక్టీరియల్, యాంటీ ఫంగల్, యాంటీ వైరల్ గుణాలు పుష్కలంగా ఉన్నాయి.
ముఖ్యంగా ఇందులోని యాంటీమైక్రోబయల్ లక్షణాలు సాల్మొనెల్లా, ఇ కోలి వంటి ప్రమాదకరమైన బ్యాక్టీరియాలతో పోరాడి మీ శరీరాన్ని ఇన్ఫెక్షన్ల బారి నుంచి కాపాడతాయి.
మధుమేహ బాధితులకు దివ్యౌషధం
డయాబెటిస్ తో బాధపడేవారికి వెల్లుల్లి ఒక వరం. ఇది రక్తంలోని చక్కెర స్థాయిలను నియంత్రించడంలో సహాయపడుతుంది. ఇన్సులిన్ సెన్సిటివిటీని పెంచడం ద్వారా షుగర్ లెవల్స్ అదుపులో ఉండేలా చూస్తుంది.
