డబ్బున్న మగాళ్లను ఎలా ప్రేమలో దించాలో చెప్పడమే ఆమె ఉద్యోగం.. ఇక ఇలా పాఠాలు చెప్పినందుకు గానూ ఆమెకు వచ్చేది కోట్లలో జీతం. నమ్మలేకపోతున్నారు కదూ.!
ఇది ముమ్మాటికీ నిజమండీ బాబూ.. సోషల్ మీడియాలో సంచలనానికి కేరాఫ్ అయిన ఈ యువతి ఉండే దేశం చైనా. ఇంతకీ మరి ఆ స్టోరీ ఏంటో చూసేద్దామా..
చైనాలో లీచువాంకూ అనే మహిళ చాలా ఫేమస్. అక్కడ ఈమే చాలా పెద్ద సోషల్ ఇన్ఫ్లూయెన్సర్. ప్రతీ బంధమూ మన అవసరాలు తీర్చేందుకే.. పైగా పెళ్ళంటేనే ఆర్ధికంగా మనం స్థిరపడేందుకు ఓ మార్గం అని నమ్మి.. ఇతరులకు పాఠాలు బోధిస్తోంది లీచువాంకూ. డబ్బు, బట్టలు, బియ్యం.. ఇలా అన్ని కూడా పెళ్లి చేసుకుంటే దొరుకుతాయి.. మన అవసరాలు తీరుతాయని చెబుతోంది. ఇక ఆమె చెప్పే ఒక్కో సెషన్‌కు రూ. 13 వేల నుంచి రూ.1.16 లక్షల వరకూ వసూలు చేస్తోంది. ఇక ఇలాంటి పాఠాలు నేర్పిస్తే.. సోషల్ మీడియా చూస్తూ ఊరుకుంటుందా.. ఆమెపై బ్యాన్ విధించింది.
అయితేనేం సదరు మహిళ తగ్గేదేలే అన్నట్టుగా ప్రత్యామ్నాయ మార్గాలను వెతుకుతూ.. తన ఫాలోవర్స్‌కు అందుబాటులో ఉంటూ కోట్లు కొల్లగొడుతోంది. ఇక చైనాలో ఈమెపై భిన్నాభిప్రాయాలు వ్యక్తం అవుతున్నాయి. మహిళలను తమను తాము లైంగిక వస్తువులా మారేందుకు ఆమె ప్రేరేపిస్తోందని కొందరు విమర్శిస్తుంటే.. మరికొందరు మగాళ్లను డబ్బులు తెచ్చే యంత్రాల మాదిరి చూస్తోందని మండిపడ్డారు. ఏదైతేనేం ఇలాంటి భిన్నాభిప్రాయాల మధ్య ఆమె మాత్రం చైనాలో సంచలనానికి కేరాఫ్‌గా మారింది.
