సాధారణంగా విమానాశ్రయం అంటే కేవలం విమానాలు వచ్చి వెళ్లే చోటు అని అనుకుంటాం. కానీ ప్రపంచంలోని కొన్ని ఎయిర్పోర్టులు మాత్రం అక్షరాలా ఒక్కో నగరమంత పరిమాణంలో ఉంటాయి.
ముఖ్యంగా సౌదీ అరేబియాలోని కింగ్ ఫాద్ అంతర్జాతీయ విమానాశ్రయం ఈ జాబితాలో అగ్రస్థానంలో నిలుస్తోంది. సుమారు 776 చదరపు కిలోమీటర్ల విస్తీర్ణంతో విస్తరించి ఉన్న ఈ ఎయిర్పోర్ట్, మన ముంబై నగరం కంటే కూడా పెద్దది కావడం గమనార్హం. దీని పరిమాణం చూస్తుంటే విమానాశ్రయమా లేక ఒక ప్రత్యేక దేశమా అనే సందేహం కలగక మానదు.
అగ్రరాజ్యం అమెరికాలోని డెన్వర్ అంతర్జాతీయ విమానాశ్రయం రెండవ స్థానంలో కొనసాగుతోంది. 137.8 చదరపు కిలోమీటర్ల విస్తీర్ణంలో ఉన్న ఈ ఎయిర్పోర్ట్, తన భారీ రన్వేకి ప్రపంచ ప్రసిద్ధి చెందింది. ఇక్కడ సుమారు 16 వేల అడుగుల పొడవైన రన్వే ప్రయాణికులకు ఒక ప్రత్యేక అనుభూతిని అందిస్తుంది. ఆధునిక సాంకేతికత, అద్భుతమైన నిర్మాణ శైలి కలగలిసిన ఈ విమానాశ్రయం గగనతల ప్రయాణాల్లో కీలక కేంద్రంగా మారింది.
ప్రకృతిని ప్రేమిస్తూనే అత్యాధునిక సౌకర్యాలతో నిర్మించిన విమానాశ్రయం మలేషియాలోని కౌలాలంపూర్ ఎయిర్పోర్ట్. 100 చదరపు కిలోమీటర్ల విస్తీర్ణంలో ఉండే దీనిని ‘ఎయిర్పోర్ట్ ఇన్ ది ఫారెస్ట్’ అని ముద్దుగా పిలుచుకుంటారు. విమానాశ్రయం లోపలే పచ్చని అడవిని తలపించే వాతావరణం ఇక్కడి ప్రత్యేకత. అంతేకాకుండా, ప్రపంచంలోనే అతి ఎత్తైన ఏటీసీ (ATC) టవర్ కూడా ఇక్కడే ఉంది. 133.8 మీటర్ల ఎత్తుతో గంభీరంగా కనిపించే ఈ టవర్ పర్యాటకులను విశేషంగా ఆకర్షిస్తుంది.
ఈ భారీ విమానాశ్రయాల జాబితాలో తుర్కియేలోని ఇస్తాంబుల్ (76.5 చ.కి.మీ), అమెరికాలోని డల్లాస్ (69.7 చ.కి.మీ) ఎయిర్పోర్టులు తదుపరి స్థానాల్లో నిలుస్తున్నాయి. ఖండాల మధ్య వారధిలా పనిచేసే ఇస్తాంబుల్ ఎయిర్పోర్ట్ తన విస్తీర్ణంతో ప్రపంచాన్ని ఆశ్చర్యపరుస్తోంది. అయితే, దురదృష్టవశాత్తు ప్రపంచంలోని టాప్-10 అతిపెద్ద విమానాశ్రయాల జాబితాలో మన భారతీయ విమానాశ్రయాలకు చోటు దక్కలేదు. భవిష్యత్తులో మన దేశంలో కూడా ఇలాంటి భారీ మౌలిక సదుపాయాలు వస్తాయని ఆశిద్దాం.
