స్పామ్ ఇంకా అవాంఛిత సందేశాల్ని అరికట్టేందుకు వాట్సాప్ కీలక నిర్ణయం తీసుకుంది. ఇక్కడ ముఖ్యమైన మార్పును అమలు చేసేందుకు యోచిస్తోంది.
మనకు చాలా వరకు వాట్సాప్లో మన కాంటాక్ట్ లిస్ట్లో లేని వ్యక్తుల నుంచి.. ఇంకా బిజినెస్ యూనిట్స్ (ఉదాహరణకు బజాజ్, మీషో, ఫ్లిప్కార్ట్ Etc..) ఇలా మనం తిరిగి రిప్లై ఇచ్చేందుకు వీల్లేని వాటి నుంచి తరచుగా మెసేజెస్ వస్తుంటాయి. ఇవి మనకు కొన్ని సందర్భాల్లో చిరాకు తెప్పిస్తుంటాయి. వాటి నుంచి మనం తిరిగి మెసేజ్ రాకుండా చేయాలని ఎంత ప్రయత్నం చేసినా వస్తూనే ఉంటాయి. ఈ క్రమంలోనే ఇప్పుడు వాట్సాప్.. ఇలా స్పామ్, అనవసర మెసేజ్ల నుంచి యూజర్లకు ఉపశమనం కల్పించేందుకు కీలక నిర్ణయం తీసుకుంది.
ఇక మీదట మీరు తిరిగి ఎప్పుడూ రిప్లై ఇవ్వని నంబర్స్, బిజినెస్ అకౌంట్స్ నుంచి వచ్చే మెసేజ్లకు అడ్డుకట్ట పడనుందని చెప్పొచ్చు. రెగ్యులర్ యూజర్లకు మెరుగైన చాటింగ్ అనుభవం కల్పించేందుకు ఇంకా.. ప్రమోషనల్, బల్క్ మెసేజ్లు పంపే వారిని నియంత్రించేందుకు ఈ చర్య తీసుకున్నట్లు వాట్సాప్ పేర్కొంది.
అనవసర నంబర్స్ నుంచి వచ్చే మెసేజ్లతో చాట్ బాక్స్ నిండిపోతుంటుంది. ఇప్పుడు ఈ నంబర్లపై ఒక పరిమితి విధించాలని చూస్తోంది. అంటే మీరు రిప్లై ఇవ్వకపోతే.. సదరు నంబర్ల నుంచి నెలలో పరిమిత సంఖ్యలోనే మీకు సందేశాలు అందుకునేందుకు వీలుంటుంది. ఈ క్రమంలోనే వాట్సాప్ ఇప్పుడు కొత్తగా మంత్లీ మెసేజ్ క్యాప్ ఫీచర్ పరిశీలిస్తోంది. ఇక్కడ ఏ యూజర్ అయినా లేదా బిజినెస్ యూనిట్ అయినా వారి కాంటాక్ట్ లిస్టులో లేని వ్యక్తులకు పరిమిత సంఖ్యలోనే మెసేజ్లు పంపే వీలుంటుంది.
అంటే ఉదాహరణకు చూస్తే.. ఒక బిజినెస్ యూనిట్కు 10 మెసేజ్ల పరిమితి ఇస్తే గనుక.. అది నెలలో రిప్లై ఇవ్వకుండా కేవలం 10 మెసేజ్లు మాత్రమే పంపే వీలుంటుంది. మీ కాంటాక్ట్ లిస్టులో లేని వ్యక్తి నుంచి మీకు 3 మెసేజ్లు వచ్చాయనుకోండి. వాటికి మీరు రిప్లై ఇవ్వని పక్షంలో ఆ పరిమితి ఇంకా తగ్గుతుంది. ఆ లిమిట్ పూర్తయితే.. మీరు ఆ వ్యక్తికి మెసేజ్లు పంపే వీలుండదు. అటునుంచి కూడా రాకుండా ఉంటుంది. దీంతో పదే పదే వచ్చే అనవసర మెసేజ్లు తగ్గిపోతాయని చెప్పొచ్చు. ప్రస్తుతానికి దీనిని ప్రారంభించాలని యోచిస్తోంది కానీ.. కచ్చితంగా ఎంత పరిమితి ఉంటుందనే దానిపై క్లారిటీ లేదు. ఇది స్పామ్, ప్రమోషనల్ మెసేజ్లకు అడ్డుకట్ట వేసేదే కాబట్టి.. సాధారణ యూజర్లు ఆందోళన చెందాల్సిన అవసరం లేదని వాట్సాప్ చెబుతోంది.
