సీఎంపై ఉన్న కేసులను సీబీఐకి అప్పగించాలని హైకోర్టులో పిల్
తెలుగుదేశం పార్టీ అధినేత, ముఖ్యమంత్రి చంద్రబాబు నాయుడుకు ఓ జర్నలిస్ట్ బిగ్ షాక్ ఇచ్చారు. ముఖ్యమంత్రి చంద్రబాబు సహా పలువురు టీడీపీ నేతలు, వ్యాపారవేత్తలపై ఉన్న కేసులన్నీ సీబీఐ, ఈడీలకు అప్పగించేలా ఆదేశాలు జారీ చేయాలంటూ హైకోర్టులో పిల్ దాఖలు చేయడం సంచలనంగా మారింది.
స్వర్ణాంధ్ర పత్రిక ఎడిటర్ కొట్టి బాలగంగాధర్ తిలక్ హైకోర్టులో ఈ వ్యాజ్యాన్ని దాఖలు చేశారు. వైసీపీ హయాంలో చంద్రబాబు నాయుడుతో పాటు మంత్రులు నారా లోకేశ్, పొంగూరు నారాయణ, అచ్చెన్నాయుడు, కొల్లు రవీంద్ర, ఎమ్మెల్యే చింతమనేని ప్రభాకర్, మాజీ మంత్రి దేవినేని ఉమామహేశ్వర రావు, వ్యాపారవేత్తలు లింగమనేని రమేశ్, వేమూరు హరికృష్ణ సహా మొత్తం 114 మందిని ఈ కేసులో ప్రతివాదులుగా పేర్కొన్నారు. హోం శాఖ ముఖ్య కార్యదర్శి, ప్రస్తుత డీజీపీ హరీశ్ కుమార్ గుప్తాను వ్యక్తిగత హోదాలో ప్రతివాదిగా పేర్కొన్నారు.
కేసులను ఈడీ, సీబీఐకి అప్పగించాలి
ముఖ్యమంత్రి చంద్రబాబు నాయుడుతోపాటు మెుత్తం 114 మంది నాయకులు ఎదుర్కొంటున్న పలు కేసులను పిల్‌లో పొందుపరించారు. స్కిల్ డెవలప్‌మెంట్ కుంభకోణం, లిక్కర్ కుంభకోణం, ఏపీ ఫైబర్ నెట్ కుంభకోణం, అసైన్డ్ భూముుల కుంభకోణం, ఇసుక కుంభకోణం, ఇన్నర్ రింగు రోడ్ అలైన్‌మెంట్‌లో అక్రమాలు ఇతర స్కామ్‌లకు సంబంధించి దర్యాప్తు బాధ్యతలను సీబీఐ, ఈడీలకు అప్పగించాల్సిన అవసరం ఉందని సీనియర్ జర్నలిస్ట్ కొట్టి బాల గంగాధర్ తిలిక్ అభిప్రాయపడ్డారు. ఈ కేసులకు సంబంధించి నిష్పాక్షిక, పారదర్శక, వేగవంతమైన దర్యాప్తు కోసం కేసులను సీబీఐ, ఈడీకి అప్పగించాలని పిల్‌లో కోరారు.
డీజీపీ చర్యలు చట్ట విరుద్ధం
ఇటీవల జరిగిన సార్వత్రిక ఎన్నికల్లో కూటమి అధికారంలోకి వచ్చిన సంగతి తెలిసిందే. ఫలితాలు వెలువడిన రోజు నుంచి డీజీపీ హరీశ్ కుమార్ గుప్తా సీఐడీలోని ఆర్థిక నేరాల విభాగానికి తాళాలు వేశారని కోర్టు దృష్టికి తీసుకెళ్లారు. ప్రస్తుత సీఎం చంద్రబాబు, ఇతర టీడీపీ నేతలపై నమోదైన కేసులను దర్యాప్తు చేస్తున్న అధికారులకు నో ఎంట్రీ ఇచ్చారని వెల్లడించారు. చంద్రబాబు నాయుడు ముఖ్యమంత్రి కాబోతున్నారని గ్రహించిన డీజీపీ ఆయా కేసులను దర్యాప్తు చేస్తున్న అధికారులను సీఐడీ కార్యాలయానికి రాకుండా అడ్డుకుని వారిపట్ల నిర్లక్ష్యంగా వ్యవహరించారని పిల్‌లో ఆరోపించారు. భారీగా పోలీసులను అక్కడ మోహరించారని.. ఆర్థిక నేరాల విభాగం నుంచి అధికారులందరినీ వెళ్లిపోమ్మన్నారని స్పష్టం చేశారు. ఓ డీజీపీ ఈ విధంగా చేయడం చట్టవిరుద్ధం, ఏకపక్షం, దౌర్జన్యపూరితం అని పిటిషనర్ బాల గంగాధర్ తిలక్ అభిప్రాయపడ్డారు.
రెడ్ బుక్ పేరుతో అధికారులకు వేధింపులు
టీడీపీ అధినేత చంద్రబాబు నాయుడు ముఖ్యమంత్రి అయిన తర్వాత నుంచి డీజీపీ, సీఐడీ అదనపు డీజీలు ఈ కేసుల విషయంలో చూసీ చూడనట్లు వ్యవహరిస్తున్నారని పిటిషనర్ బాల గంగాధర్ తిలక్ ఆరోపించారు. ఈ కేసుల్లో సీఐడీ, ఈడీ దర్యాప్తును నీరు గార్చేలా వ్యవహరిస్తున్నారని కోర్టు దృష్టికి తీసుకెళ్లారు. ఇలాంటి పరిస్థితుల్లో ఈ కేసుల విచారణను సీబీఐ, ఈడీకి అప్పగించేలా ఆదేశాలు ఇవ్వాలని హైకోర్టును కోరారు. ఏపీ బెవరేజస్ కార్పొరేషన్ అప్పటి ఎండీ హోదాలో డి. వాసుదేవరెడ్డి ఇచ్చిన ఫిర్యాదు ఆధారంగా సీఐడీ కేసు నమోదు చేసిన విషయాన్ని గుర్తు చేశారు. ఎన్నికల ఫలితాలు వెలువడిన తరువాత కక్ష సాధింపు చర్యల్లో భాగంగా వాసుదేవరెడ్డిపై కేసు నమోదు చేశారని… ఇసుక కుంభకోణంపై ఫిర్యాదు చేసినందుకు గనుల శాఖ అప్పటి డైరెక్టర్ జి.వెంకట రెడ్డిపై కక్ష తీర్చుకుంటున్నారని ఆరోపించారు. చంద్రబాబుతోపాటు ఇతరులపై ఫిర్యాదు చేసిన వారందరిపై చర్యలు తీసుకుంటామని రెడ్ బుక్ పేరుతో పలువురు అధికారులను వేధిస్తున్నారని పిల్‌లో ఆరోపించారు. ఈ అంశాలను పరిగణలోకి తీసుకుని కేసుల దర్యాప్తును సీబీఐ, సీఐడీకి అప్పగించాలని పిల్‌లో కోరారు.
