ఇంటర్నెట్‌ డెస్క్‌: రానా (Rana), వెంకటేశ్‌ (Venkatesh) ప్రధాన పాత్రల్లో నటించిన వెబ్‌సిరీస్‌ ‘రానా నాయుడు’ (Rana Naidu). నెట్ఫ్లిక్స్ వేదికగా గతేడాది విడుదలైన ఈ సిరీస్‌ అత్యధిక వ్యూస్‌తో బ్లాక్‌బస్టర్‌ విజయాన్ని అందుకుంది. దీంతో దీనికి సీక్వెల్‌ను తీయనున్నట్లు నెట్ఫ్లిక్స్ గతంలోనే ప్రకటించింది. తాజాగా దీనికి సంబంధించిన అప్‌డేట్‌ను సంస్థ షేర్‌ చేసింది.
సీజన్‌ 2 షూటింగ్‌ ప్రారంభమైనట్లు తెలిపిన నెట్ఫ్లిక్స్ చిత్రీకరణ జరుగుతోన్న చిన్న వీడియోను షేర్‌ చేసింది. అందులో రానా, వెంకటేశ్‌ల మధ్య యాక్షన్‌ సన్నివేశాలు జరుగుతున్నట్లు చూపించారు. దీంతో త్వరలోనే సీజన్‌ 2 ప్రేక్షకుల ముందుకురానున్నట్లు తెలుస్తోంది. గతంలో సీజన్‌ 2 గురించి నెట్ఫ్లిక్స్ బృందం ఓ సందర్భంలో మాట్లాడుతూ.. మన దేశంలోనే కాకుండా, ప్రపంచవ్యాప్తంగా ఈ సిరీస్‌కు విశేష ప్రేక్షకాదరణ లభించిందని దానిని దృష్టిలోపెట్టుకొనే సీజన్‌-2ను ప్రేక్షకుల ముందుకుతీసుకువస్తున్నామని తెలిపింది. మరెన్నో ట్విస్టులు, మరింత ఫ్యామిలీ డ్రామాతో ‘రానా నాయుడు-2’ త్వరలో విడుదల చేస్తామని ప్రకటించింది. దీనిపై పలువురు సినీ ప్రియులు ఆనందం వ్యక్తంచేస్తున్నారు.
తాజాగా ఈ సిరీస్‌లో నటనకు గాను రానా ‘ఇండియన్‌ టెలీ అవార్డు 2024’లో ఉత్తమ నటుడిగా అవార్డును అందుకున్న విషయం తెలిసిందే. ఈ సిరీస్‌ విమర్శలు ఎదుర్కొన్నప్పటికీ నెట్‌ఫ్లిక్స్‌లో (Netflix) చరిత్ర సృష్టించింది. గ్లోబల్‌ స్థాయిలో ఎక్కువ వ్యూస్‌ను సొంతం చేసుకున్న వాటిలో ఇది టాప్‌లో నిలిచింది. అమెరికన్‌ టీవీ సిరీస్‌ ‘రే డొనోవన్‌’కు రీమేక్‌గా ‘రానా నాయుడు’ రూపొందింది. దీనికోసం రానా, వెంకటేశ్‌ మొదటిసారి స్క్రీన్‌ షేర్‌ చేసుకున్నారు. యాక్షన్‌, క్రైమ్‌ డ్రామాగా వచ్చిన ఈ సిరీస్‌లో వీరిద్దరూ తండ్రీ కొడుకులుగా కనిపించారు.
