ముల్లంగి అంటే చాలా మంది ఆమడ దూరం పరిగెడతారు. ముల్లంగిని తినడానికి అంతగా ఇష్టపడరు. కారణం.. దీని రుచి. వెగటుగా అనిపించే ముల్లంగి ఆరోగ్య ప్రయోజనాలపై సరైన అవగాహన లేకపోవడం అంటున్నారు నిపుణులు. ఇక కొంత మంది మాత్రం ముల్లంగిని తరచూగా తింటూ ఉంటారు. ముల్లంగితో పచ్చడి, సలాడ్, సాంబార్, పరాటాలు వంటివి చేసుకుని తింటుంటారు. ఇదిలా ఉంటే.. చాలా మంది ముల్లంగి దుంపలను వంటకు వాడి.. వాటి ఆకులను పనికి రావని పడవేస్తుంటారు. మరి మీరు కూడా ఇలానే చేస్తున్నారా..? అయితే మీరు చాలా ఆరోగ్య ప్రయోజనాలు మిస్ అయినట్లే అంటున్నారు నిపుణులు. అదేలాగో ఇక్కడ తెలుసుకుందాం..
ముల్లంగి దుంప కంటే.. దాని ఆకుల్లోనే ప్రయోజనాలు పుష్కలంగా ఉన్నాయంటున్నారు నిపుణులు. ముల్లంగి ఆకులను పోషకాల పవర్హోజ్ అంటారు. ఇందులో చాలా రకాలు పోషకాలు ఉన్నాయి. ముఖ్యంగా విటమిన్ సి, విటమిన్ కె, ఐరన్, మెగ్నీషియం, కాల్షియం, ఫోలేట్ వంటి ముఖ్యమైన పోషకాలు ముల్లంగిలో సమృద్ధిగా ఉన్నాయి. రక్తహీనతను నివారించడం నుంచి.. షుగర్ను కంట్రోల్ చేసేందుకు కావాల్సిన పోషకాలు అన్ని ముల్లంగిలో ఉన్నాయి.
ముల్లంగి ఆకులను తరచూ వంటల్లో వినియోగించటం వల్ల రక్తం శుద్ధి అవుతుంది. అంతేకాకుండా.. ముల్లంగి ఆకుల్లో ఐరన్ సమృద్ధిగా ఉంటుంది. ఇది రక్తంలో హిమోగ్లోబిన్‌ స్థాయిలను పెంచుతుంది. అనిమియా కారణంగా బాధపడేవారు.. వారి డైట్లో ముల్లంగి ఆకులు కచ్చితంగా చేర్చుకోవాలని నిపుణులు చెబుతున్నారు. అంతేకాకుండా చర్మ సంబంధిత వ్యాధులైన దద్దుర్లు, దురదలు, మొటిమలు.. మొదలైన వాటిని నివారిస్తుంది. ఇది స్కర్వీని నివారించడంలో కూడా సహాయపడుతుంది.
మధుమేహం బాధితులు ముల్లంగి ఆకులు తప్పనిసరిగా తినాలని నిఫుణులు చెబుతున్నారు. ఇందులో ఉండే పోషకాలు శరీరంలోని తెల్లకణాలను పెంచేందుకు పని చేస్తాయి. దీనితో పాటు, ముల్లంగిలో తక్కువ గ్లైసెమిక్ ఇండెక్స్ ఉంటుంది. దీని కారణంగా రక్తంలో చక్కెర స్థాయి ప్రభావితం కాదు. ఇవి రక్తంలో చక్కెర శోషణను నియంత్రించడంలో కూడా సహాయపడతాయి. దీనిలోని ఫైబర్.. బ్లడ్ షుగర్ లెవల్స్ను కంట్రోల్లో ఉంచుతుంది.
పైల్స్‌తో బాధపడేవారికి ముల్లంగి ఆకులు ఒక వరం అంటున్నారు నిపుణులు. ఎందుకంటే దీని వినియోగం శరీరంలో వేడిని తగ్గిస్తుంది. నిజానికి, ముల్లంగి ఆకుల్లో చాలా తక్కువ కేలరీలు, అధిక ఫైబర్ ఉంటాయి. తక్కువ రక్తపోటుతో బాధపడేవారికి ముల్లంగి ఆకులు చాలా ఉపయోగకరంగా ఉంటాయి. ఎందుకంటే, ఇందులో ఉండే సోడియం రక్తపోటును స్థిరీకరించడానికి తోడ్పడుతుంది.
చలికాలంలో సాధారణంగా ఇమ్యూనిటీ తగ్గుతుంది. దీనివల్ల జలుబు, ఫ్లూ, ఇన్ఫెక్షన్లు ఎక్కువగా దాడి చేస్తాయి. ముల్లంగి ఆకుల్లో విటమిన్ సి పుష్కలంగా ఉంటుంది. ఇది శక్తివంతమైన యాంటీఆక్సిడెంట్‌గా పనిచేస్తుంది. చలికాలంలో ముల్లంగి తినటం వల్ల ఇమ్యూనిటీని బూస్ట్‌ చేస్తుంది.
