సీక్రెట్ ఫొటో రాఖీలు: ఇది వరకైతే రాఖీ మీద పొటో ప్రింట్ చేసిచ్చే రాఖీలు బాగానే ట్రెండ్ అయ్యాయి. ఇప్పుడు సీక్రెట్ ఫోటో రాఖీలు తెగ ట్రెండ్ అవుతున్నాయి.
రాఖీ మీద భాగం తెరవగానే కొన్ని ఫోటోలు ఒక దాని తర్వాత ఒకటి వస్తాయి. రాఖీ పండగ తర్వాత రాఖీ లాకెట్‌ను ఫ్రిజ్ మ్యాగ్నెట్ లాగానూ వాడుకోవచ్చు. వీటి ధర రెండు వందల రూపాయల నుంచి మొదలవుతోంది.
డీఐవై రాఖీలు: ఎంత ఖరీదైన రాఖీ కొన్నప్పటికి చేత్తో తయారుచేసి రాఖీ కట్టిన రాఖి ప్రత్యేకంగా అనిపిస్తుంది. దానికోసం ఇంట్లోనే దొరికే బియ్యం గింజలు, వడ్ల గింజలు, గుమ్మడి విత్తనాలు, యాలకులు, లవంగాలు, అనాస పువ్వులతో అందంగా అతికిస్తే రాఖీ రెడీ అవుతుంది. ఒక అట్టముక్క గుండ్రంగా కత్తిరించి దానిమీద మంచి డిజైన్లో అతికిస్తే చాలు. పక్కలకు డోరీలు అతికిస్తే రాఖీ రెడీ.
సీడ్ రాఖీలు: మీ సోదరుడు, మీరు పర్యావరణ ప్రేమికులైతే మీకోసమే ఈ రాఖీలు. ఒక చెట్టుకు సంబంధించిన విత్తనానికి తొడుగులాగా మంచి డిజైన్ ఉంటుంది. లేదంటే ఒక మంచి డిజైన్ మధ్యలో విత్తనం అతికించి ఉంటుంది. ఈ విత్తనానికి వేసే తొడుగును టెర్రాకోట, ఫ్యాబ్రిక్ డిజైన్, ఎంబ్రాయిడరీ, స్టోన్లతో చేస్తారు. రాఖీ పండగ అయ్యాక ఆ డిజైన్ నుంచి విత్తనం తీసి చెట్టు నాటడమే. మిగతా డిజైన్ భాగం కీచైన్ లాగా వాడేసుకోవచ్చు.
చిన్న పిల్లల డీఐవై రాఖీలు: పిల్లలకు కూడా రాఖీ ప్రాముఖ్యత తెలియజాలి అనుకుంటే ఈ డీఐవై రాఖీ కిట్స్ మంచి ఎంపిక. రాఖీ తయారు కోసం కావాల్సిన డిజైన్లు, గ్లూ, స్టోన్స్ అన్నీ వీటిలో వస్తాయి. నాలుగైదేండ్ల పిల్లలు కూడా వీటిని వాడే సొంతంగా రాఖీలు తయారు చేసేయొచ్చు. వాళ్లు చేసిన రాఖీ కడుతుంటే భలే ఆనందపడతారు. ఒకసారి ప్రయత్నించండి.
చిన్న పిల్లల మ్యూజికల్ రాఖీలు: ఈ రాఖీల లోపల చిన్న స్పీకర్ ఉంటుంది. అందులో చిన్న రైమ్ లేదా మంత్రమో, పాటో రికార్డు చేసి ఉంటుంది. దీన్ని మనకిష్టమైన వాయిస్ తోనూ కస్టమ్ చేసే అవకాశం ఉంటుంది. ఒక మెసేజ్ ఏదైనా రికార్డు చేసి పంపిస్తే దాన్నే ఈ రాఖీలో వినొచ్చు. ఇవి చిన్నపిల్లలకు తెగ నచ్చేస్తాయి. వీటి ధర కాస్త ఎక్కువే. వెబ్‌సైట్ బట్టి మూడొందల నుంచి ధర ఉంటోంది.
చిన్న పిల్లల ఎల్‌ఈడీ రాఖీలు: లైట్లంటే పిల్లలకు చాలా ఇష్టం ఉంటుంది. అందుకే ఇలా లైట్లలతో మెరిసే చాలా రకాల రాఖీలు వచ్చేశాయి.ముఖ్యంగా ఎల్‌ఈడీ స్పిన్నర్ రాఖీలు ఈ సారి బాగా ట్రెండింగ్. చేతికి కట్టగానే ఒక బటన్ నొక్కితే లైట్లతో పాటే గిర్రున తిరిగే చక్రం ఉంటుంది. రాఖీలాగే కాకుండా మంచి ఆటవస్తువులాగా చిన్న పిల్లలకు నచ్చుతుంది.
