ప్రస్తుత రోజుల్లో ప్రతి ఒక్కరికి ఆరోగ్య బీమా అనేది కచ్చితంగా ఉండాల్సిన అవసరం ఉందని నిపుణులు చెబుతుంటారు. కానీ, ఇప్పటికీ చాలా మంది హెల్త్ ఇన్సూరెన్స్ తీసుకునేందుకు వెనకడుగు వేస్తున్నారు. అందులో ప్రధాన కారణం ఇన్సూరెన్స్ ప్రీమియం ఎక్కువగా ఉండడమేనని తెలుస్తోంది. ఈ క్రమంలో హెల్త్ ఇన్సూరెన్స్ పాలసీలపై వస్తు సేవల పన్ను (జీఎస్‌టీ) పూర్తిగా ఎత్తివేయడం లేదా కనిష్ఠ స్థాయికి తగ్గించడం వంటివి చేయాలని కేంద్రం వద్దకు పలు ప్రతిపాదనలు చేరాయి. ఈ విషయంపై గత కొద్ది నెలలుగా చర్చలు కొనసాగుతున్నాయి. ఈ క్రమంలోనే హెల్త్ ఇన్సూరెన్స్ పాలసీలపై జీఎస్‌టి పూర్తిగా ఎత్తివేసేందుకు కేంద్రం నిర్ణయం తీసుకుందన్న వార్తలూ వినబడుతున్నాయి.
జీఎస్‌టీ కౌన్సిల్ సమావేశం వచ్చే నెల డిసెంబర్ 21, 22 తేదీల్లో జరగనుంది. ఈ సమావేశంలోనే పలు ఇన్సూరెన్స్ పాలసీలపై జీఎస్‌టీ పూర్తిగా ఎత్తివేయడం లేదా తగ్గించడం పై నిర్ణయం తీసుకునే అవకాశాలు ఉన్నాయని ప్రముఖ మీడియా సంస్థ టైమ్స్ ఆఫ్ ఇండియా ఓ కథనం ప్రచురించింది. టర్మ్ లైఫ్ ఇన్సూరెన్స్ పాలసీలపై ప్రస్తుతం అమలవుతున్న 18 శాతం జీఎస్‌టీ పూర్తిగా తొలగిస్తూ జీఎస్‌టీ కౌన్సిల్ నిర్ణయం తీసుకునే అవకాశం ఉందని పేర్కొంది. అలాగే 60 ఏళ్ల వయసు పైబడిన సీనియర్ సిటిజన్లు రూ.5 లక్షల లోపు కవరేజీతో తీసుకునే హెల్త్ ఇన్సూరెన్స్ పాలసీలపైనా పూర్తిగా పన్ను తొలగించవచ్చని పేర్కొంది.
మరోవైపు.. ఇదే సమావేశంలో హెల్త్ ఇన్సూరెన్స్ పాలసీలపై పన్ను తగ్గింపు నిర్ణయంతో పాటు ఇతర వస్తు, సేవలపై జీఎస్‌టీ రేట్లలోనూ కీలక మార్పులు చేసే అవకాశం ఉందని టైమ్స్ ఆఫ్ ఇండియా పేర్కొంది. అయితే, పన్నులు తగ్గిస్తే ఆదాయం తగ్గిపోతుందని కేరళ, పశ్చిమ బెంగాల్ వంటి రాష్ట్రాలు ఆందోళన వ్యక్తం చేస్తున్నాయి. ప్రధానంగా నాన్- ఎన్‌డీఏ ప్రభుత్వాలు జీఎస్‌టీ శ్లాబులను 4 నుంచి 3కు తగ్గించాలన్న నిర్ణయాన్ని వ్యతిరేకిస్తున్నట్లు తెలుస్తోంది. ప్రస్తుతం వస్తు సేవల పన్ను రేట్లు 5 శాతం, 12 శాతం, 18 శాతం, 28 శాతం చొప్పున వసూలు చేస్తున్నారు. ఇందులో 18 శాతం, 28 శాతం శ్లాబుల ద్వారానే అధిక ఆధాయం వస్తోంది. ఆదాయాలు తగ్గిపోతాయన్న ఆందోళనలు సైతం ఆరోగ్య బీమాపై జీఎస్‌టీ కోత నిర్ణయాన్ని వాయిదా వేసేలా చేస్తున్నట్లు పలువురు భావిస్తున్నారు. హెల్త్ ఇన్సూరెన్స్ పాలసీలపై జీఎస్‌టీ ద్వారానే రూ.2,500 కోట్ల రెవెన్యూ వస్తున్నట్లు సమాచారం.
బిహార్ ఉప ముఖ్యమంత్రి సామ్రాట్ చౌదరి నేతృత్వంలోని మంత్రుల బృందం ఇప్పటికీ కేంద్రానికి కీలక ప్రతిపాదనలు చేసింది. హెల్త్ ఇన్సూరెన్స్ ప్రీమియంలపై జీఎస్‌టీ తగ్గిచడం, కొన్నింటిపై పూర్తిగా తొలగించాల్సిన అవసరాన్ని సూచించింది. మరోవైపు.. ఆర్థిక శాఖ సహాయ మంత్రి పంకజ్ చౌదరి నేతృత్వంలోని మరో ప్యానల్ పరిహార సెస్ పై సమీక్షించింది. అయితే, ఈ విషయంపై 2025లోనే నిర్ణయం తీసుకోవచ్చు. లగ్జరీ, సైన్ గూడ్స్‌పై సెస్ అనేది మార్చి, 2026 వరకు అమలులో ఉండనుంది. పలు అత్యవసర వస్తువులపై జీఎస్‌టీ తగ్గించే అవకాశాలు కనిస్తున్నాయి. ఇదే సమయంలో లగ్జరీ గూడ్స్‌పై జీఎస్‌టీ పెంచవచ్చనే అంచనాలూ ఉన్నాయి. అయితే, డిసెంబర్‌లో జరిగే సమావేశంలో కచ్చితమైన నిర్ణయాలు వెలువడతాయని భావిచడం లేదని నిపుణులు చెబుతున్నారు. అయితే, ఆరోగ్య బీమా పన్నులపై మాత్రం ఏదో ఒక నిర్ణయానికి వచ్చే అవకాశాలు ఉన్నాయని చెబుతున్నారు.
