ఏపీ లాసెట్ కౌన్సెలింగ్ కు సంబంధించి మరో అప్డేట్ వచ్చేసింది. సెకండ్ ఫేజ్ కౌన్సెలింగ్ షెడ్యూల్ విడుదలైంది. నవంబర్ 14వ తేదీ నుంచి ఆన్ లైన్ రిజిస్ట్రేషన్ల ప్రక్రియ ప్రారంభమవుతుంది. నవంబర్ 26వ తేదీన సీట్ల కేటాయింపు ఉంటుంది.
ఏపీలో లాసెట్ 2024 కౌన్సెలింగ్ ప్రక్రియ కొనసాగుతోంది. ఇప్పటికే తొలి విడత కౌన్సెలింగ్ పూర్తి కాగా… అధికారులు మరో అప్డేట్ ఇచ్చారు. సెకండ్ ఫేజ్ కౌన్సెలింగ్ కు సంబంధించిన షెడ్యూల్ ను విడుదల చేశారు. నవంబర్ 14వ తేదీ నుంచి రిజిస్ట్రేషన్లు ప్రారంభమవుతాయని పేర్కొన్నారు. https://lawcet-sche.aptonline.in వెబ్ సైట్ లోకి వెళ్లి పూర్తి వివరాలు తెలుసుకోవచ్చు.
ముఖ్య తేదీలు – 26న సీట్ల కేటాయింపు
సెకండ్ ఫేజ్ కౌన్సెలింగ్ లో నవంబర్ 14వ తేదీన రిజిస్ట్రేషన్లు ప్రారంభం కాగా… 17వ తేదీతో ముగుస్తాయి. నవంబర్ 15వ తేదీ నుంచి 19వ తేదీ వరకు ధ్రువపత్రాల అప్ లోడ్ మరియు వెరిఫికేషన్ కు అవకాశం ఉంటుంది. నవంబర్ 20వ తేదీ నుంచి వెబ్ ఆప్షన్లు ఎంచుకోవచ్చు. ఈ గడువు నవంబర్ 23వ తేదీతో ముగుస్తుంది. నవంబర్ 24వ తేదీన వెబ్ ఆప్షన్లను ఎడిట్ చేసుకోవచ్చు. నవంబర్ 26వ తేదీన సీట్ల కేటాయింపు ఉంటుంది.
ఈ ఫేజ్ లో సీట్లు పొందే విద్యార్థులు నవంబర్ 27వ తేదీ నుంచి ఆయా కాలేజీల్లో రిపోర్టింగ్ చేయాల్సి ఉంటుంది. ఈ గడువు నవంబర్ 29వ తేదీతో పూర్తి అవుతుంది. https://lawcet-sche.aptonline.in వెబ్ సైట్ లోకి వెళ్లి అర్హత కలిగిన అభ్యర్థులు కౌన్సెలింగ్ కోసం రిజిస్ట్రేషన్ చేసుకోవాల్సి ఉంటుంది.
ఈ ఏడాది ఆచార్య నాగార్జున విశ్వవిద్యాలయం ఆధ్వర్యంలో లాసెట్- 2024 ప్రవేశ పరీక్ష నిర్వహించారు. ర్యాంకుల ఆధారంగా రాష్ట్రంలో ఉన్న న్యాయ కళాశాలాల్లో ప్రవేశాలు కల్పిస్తారు. ఈ ఏడాది ఏపీ లాసెట్ పరీక్షను 19,224 మంది అభ్యర్థులు రాశారు. అందులో 17,117 మంది (89.04 శాతం) అభ్యర్థులు ఉత్తీర్ణత సాధించారు. ఈ ఎంట్రెన్స్ పరీక్ష ఫలితాలు జూన్ 27న వెల్లడించిన సంగతి తెలిసిందే.
ఏపీ లాసెట్ ర్యాంక్ ఇలా చెక్ చేసుకోండి…
అభ్యర్థులు మొదటగా https://cets.apsche.ap.gov.in వెబ్ సైట్ లోకి వెళ్లాలి.
Download Rank Card అనే ఆప్షన్ పై క్లిక్ చేయండి.
రిజిస్ట్రేషన్ నెంబర్ , హాల్ టికెట్ నెంబర్ , పుట్టిన తేదీని ఎంట్రీ చేయాలి.
గెట్ రిజల్ట్స్ అనే ఆప్షన్ పై క్లిక్ చేస్తే మీ స్కోర్ తో పాటు ర్యాంక్ కార్డు డిస్ ప్లే అవుతుంది.
ప్రింట్ లేదా డౌన్లోడ్ అనే ఆప్షన్ పై క్లిక్ చేసి ర్యాంక్ కార్డు కాపీని పొందవచ్చు.
అడ్మిషన్ ప్రక్రియలో ర్యాంక్ కార్డు అత్యంత కీలకం.
