పథనంథిట్ట: శబరిమల అయ్యప్ప భక్తులకు కేరళ పోలీసులు శుభవార్త చెప్పారు. మండలం-మకరవిళక్కు వార్షిక యాత్ర సందర్భంగా విచ్చేస్తోన్న వారికి సులభంగా దర్శనమయ్యేందుకు వీలుగా ప్రత్యేక పోర్టల్‌ను ప్రవేశపెట్టారు.
‘శబరిమల-పోలీస్‌ గైడ్‌’ అనే ఈ పోర్టల్‌ ఆంగ్ల భాషలో అందుబాటులో ఉంటుంది. ఈ పోర్టల్‌లో భక్తులకు ఉపయోగపడే ముఖ్యమైన సమాచారాన్నంతా పొందుపరిచారు. పోలీస్‌ హెల్ప్‌లైన్‌ నంబర్లు, పోలీస్‌ స్టేషన్‌ ఫోన్‌ నంబర్లు, ఆరోగ్య సేవలు, కేఎస్‌ఆర్టీసీ, అంబులెన్సు, అగ్నిమాపక దళం, ఫుడ్‌ సెఫ్టీకి చెందిన సమాచారం ఈ పోర్టల్‌లో అందుబాటులో ఉంటుంది. వీటితోపాటు శబరిమల చరిత్ర, వాహనాల పార్కింగ్, ప్రతి జిల్లా నుంచి శబరిమలకు ఉన్న వాయు, రైలు, రోడ్డు మార్గాల వివరాలను ఇందులో పొందుపరిచినట్లు పోలీసు అధికారులు ఓ ప్రకటనలో తెలిపారు.
