చాలామందికి ఉదయం ఖాళీ కడుపుతో నిమ్మరసం నీళ్లు తాగే అలవాటు ఉంటుంది. ఇది రోగనిరోధక శక్తిని మెరుగుపరిచే మంచి ఆరోగ్యకరమైన అలవాటు. నిమ్మరసం నీటిని అనేక రకాలుగా తీసుకుంటారు. ఉదయాన్నే తేనెను కలిపి తాగడం కొందరికి అలవాటు. అలాగే, వేసవి కాలంలో ఒంటిని చల్లబరిచేందుకు పంచదార కలిపి తాగుతారు. మరింత తాజాదనాన్ని అందించేందుకు పుదీనా ఆకులను కలిపి తీసుకునే వారు కూడా ఉంటారు. నిమ్మరసం నీటిలో విటమిన్ C, యాంటీఆక్సిడెంట్లు, కాల్షియం, ఫోలేట్, పొటాషియం వంటి ముఖ్యమైన పోషకాలు సమృద్ధిగా ఉంటాయి. అయితే, ఉదయాన్నే దీనిని తీసుకోవడం వల్ల కలిగే ఆరోగ్య ప్రయోజనాలను తెలుసుకుందాం.
నిమ్మకాయ నీరు అనేక పోషకాలతో నిండిఉంటుంది. అయితే దీన్ని అధికంగా తీసుకుంటే ఇందులో ఉండే సిట్రిక్ యాసిడ్ పళ్ల ఎనామిల్‌ను దెబ్బతీసే ప్రమాదం ఉంది. అందువల్ల, నిమ్మకాయ నీరు తాగిన వెంటనే నోటిని శుభ్రం చేసుకోవడం మంచిది.
రోజూ నిమ్మకాయ నీరు తాగటం వల్ల ఇది శరీరాన్ని హైడ్రేట్‌గా ఉంచుతుంది. శరీరానికి తగినంత తేమను అందిస్తుంది. రోగనిరోధక శక్తిని పెంచుతుంది. విటమిన్ C సమృద్ధిగా ఉండటం వల్ల శరీరాన్ని అనారోగ్యాల నుంచి కాపాడుతుంది.
నిమ్మకాయ నీరు తరచూ తీసుకోవటం వల్ల జీర్ణక్రియకు మేలు చేస్తుంది. అజీర్ణ సమస్యలను తగ్గించి, జీర్ణ రసాల ఉత్పత్తిని మెరుగుపరుస్తుంది. pH స్థాయిలను సమతుల్యం చేస్తుంది. నిమ్మరసం ఆమ్లభావం కలిగి ఉన్నప్పటికీ, శరీరంలో ఆల్కలైన్ ప్రభావాన్ని కలిగించి సమతుల్యతను కాపాడుతుంది.
అంతేకాదు.. నిమ్మకాయ నీరు బరువును నియంత్రించడంలో కూడా సహాయపడుతుంది. జీర్ణక్రియను మెరుగుపరిచి, ఎక్కువసేప కడుపు నిండుగా ఉన్న భావాన్ని కలిగించడంతో ఆకలిని అదుపులో ఉంచుతుంది. శ్వాసను తాజాగా ఉంచుతుంది. నోటిలో దుర్వాసన సమస్యలను సహజసిద్ధంగా నివారిస్తుంది.
నిమ్మకాయ నీరు చర్మ ఆరోగ్యానికి కూడా తోడ్పడుతుంది. ఇందులో ఉండే యాంటీఆక్సిడెంట్లు చర్మాన్ని స్వచ్ఛంగా, ప్రకాశవంతంగా ఉంచుతాయి. కాలేయాన్ని డిటాక్స్ చేయడంలో సహాయపడుతుంది. నిమ్మకాయ నీరు కాలేయాన్ని శుభ్రపరిచేందుకు ఉపయోగపడుతుంది.
