ఇంటర్నెట్ డెస్క్: ప్రముఖ ద్విచక్ర వాహన తయారీ సంస్థ హీరో మోటోకార్ప్ (Hero motocorp) అత్యంత ప్రజాదరణ పొందిన తన స్ప్లెండర్+ 2025 మోడల్ను విడుదల చేసింది. డిజైన్ పరంగా పెద్దగా మార్పులు చేయనప్పటికీ.. లుక్ పరంగా చిన్న చిన్న మార్పులు చేసింది. స్ప్లెండర్+ లైనప్లో స్ప్లెండర్ ప్లస్, స్ప్లెండర్+ ఎక్స్టెక్, స్ప్లెండర్ ప్లస్ ఎక్స్టెక్ 2.0 వేరియంట్లను తీసుకొచ్చింది. వీటి ధరలు, ఇతర వివరాలు ఇప్పుడు చూద్దాం..
పాత మోడళ్లకు ఏ ఇంజిన్ ఇచ్చారో స్ప్లెండర్+ 2025 మోడళ్లలోనూ దాన్నే కొనసాగించారు. ఫేజ్-2 ఓబీడీ-2బి ప్రమాణాలకు అనుగుణంగా ఇంజిన్ను తీర్చిదిద్దారు. 2025 ఏప్రిల్ 1 తర్వాత విక్రయించే వాహనాలన్నీ ఈ ప్రమాణాలు పాటించాలని కేంద్రం తప్పనిసరి చేసిన సంగతి తెలిసిందే. ఇందులో 4 స్పీడ్ గేర్ బాక్స్ ఉంది. ఇది 7.91 బీహెచ్పీ పవర్ను, 8.05ఎన్ఎం టార్క్ను ఉత్పత్తి చేస్తుంది. గ్రాఫిక్స్ పరంగా కొన్ని మార్పులు చేశారు. స్పోర్టీ లుక్ను జోడించారు. ఎల్ఈడీ హెడ్ల్యాంప్, ఎల్ఈడీ డీఆర్ఎల్స్, ఫుల్లీ డిజిటల్ ఇన్స్ట్రుమెంట్ క్లస్టర్ వంటివి ఉన్నాయి. స్మార్ట్ఫోన్ను బ్లూటూత్తో కనెక్ట్ చేసుకునే సదుపాయం కూడా ఉంది. సీటు, లగేజీ ర్యాక్లో మార్పులు చేశారు. అయితే, ఇవి టాప్ ఎండ్ మోడళ్లకే పరిమితం.
హీరో స్ప్లెండర్+ మొత్తం ఆరు రకాల వేరియంట్లలో లభిస్తుంది. స్ప్లెండర్+ డ్రమ్, స్ప్లెండర్+ ఐ3, స్ప్లెండర్+ ఐ3ఎస్ బ్లాక్ అండ్ యాక్సెంట్, స్ప్లెండర్+ ఎక్స్టెక్ డ్రమ్ బ్రేక్, స్ప్లెండర్+ ఎక్స్టెక్ డిస్క్బ్రేక్, స్ప్లెండర్+ ఎక్స్టెక్ 2.0 డ్రమ్ బ్రేక్ ఆప్షన్లలో లభిస్తుంది. బేస్ వేరియంట్ ధర రూ.79,096 (ఎక్స్ షోరూమ్) కాగా.. హై ఎండ్ వేరియంట్ ధర రూ.86,051గా కంపెనీ నిర్ణయించింది. ప్రస్తుతం మార్కెట్లో అందుబాటులో ఉన్న టీవీఎస్ స్టార్ సిటీ ప్లస్, హోండా షైన్ 100, బజాజ్ ప్లాటినా 100 వాహనాలతో స్ప్లెండర్ పోటీ పడుతోంది.
